सेम सेसिमाम
ग्यालाम पोबा हिन्ना
थेतासि नाम्सादिम 
ख्लाबा हिन्ना 
एदामि थाहा मुला ले
ङाइ तिल्दा नाम्सा ख्लाजि बिसिमाम
साइला !

ओइ साइला 
ए थेन वाङ्जुला छ्याम थाल्बा
बिजा दुइ खोपी क्लाङ्बान
झगडा लाबा दुइ
ओम ह्रेच्छाकरिन
कु ख्वाइसि
ङेसिकेन ब्राबा
थे ग्योइ पेरो 
म्हाने गाङला 
थाङ्सिङला दोङ्ला हाँगारि
सोइसोइ लाबान
पिङ क्लाङ्बा
ख्रिनला झ्याङरि 
लासि क्लाङ्बा
फोख्रेन्मा
गिक्खे आम्बा
सोमसेन सिप्बान
गिक्खेन खार्पारि
पाते थेन छ्याम्बा चासि
थाबा रेकादे
देन्बान ह्याङ्ला
ह्रोला साक्षी मुला ।

दिङ छार्सिकेन निमा
याम्बु वाङ्माहेन्से
कलेजला ताङरि
काक्तातेन जोरी क्लाङ्बान
म्हाङ्ला छ्युलिङछेन महासागररि 
फ्योल्सिकेन फ्योल्सिकेन
तिगाइ म्हाङ
याम्बुला गल्लीरिक्यार नोन फेजि
तिगाइ सेमरि नाइजि
तिगाइ जाबा आशम मुला ।

ओइ ! ङ्यान्गोम !
साइला ए थेन वाङ्जु 
दार्से ताम आपाङ रो हिन्ना ? 
तिगा तामरि सेम न्होङ्जि ?
दौतारीजुगु डोबाकेन लामा
न्होर आरेसाइ नोन
जाजाकार ह्रुप्सि
खास्योर छ्योर्तेनला 
होटलला टप फ्लोररि 
चिया थुङ्बान
लाबाला साहरासे
फेर्चिबा जेबा लुङ्दार
च्यासि ताङ्बान
लिउला जेबा म्हाङ
देप्बा ह्रो हिन्ना
ङातेन नोन
थेला दुइ डिक्मा जेक्खे
च्याटरि ताम ताला 
भिडियो कल ओत्ते आता
ताजि बिसाइ नोन
सुख दुखला ताम लाना लानान
खाजिबाइ तामला काठुइ ताना तानान
निस्कर्षरि आदोचिमान 
च्याट, कल बन्द ताला ।

ङा गेसे ब्लाप्मा नोन
दुइ तेसि च्याट लाला
तिगा लाबाकेन मुला ? 
खाइमा योनान दोला
खाइमा ङ्हीरेरि नोन आदो
खाइमा च्यासि जेक्खे टारतिला
थे ह्युलरिन चिसिमाम
सेम पोबाकेन मुला
ङा फिरग्यापह्युल तासि नोन
सिबा सेम नोन बुना लासि
डान्बाकेन मुला
थासि ब्याङ्बा
दोङ्ला ठुटामि
बुबा ताला 
युङ्बा, साप्रा आहिन
ङाला सेम
क्रोसि नोन
अथाह चेगाइ मुला एन्दा ।

थेबा मुबा,
वाङ्जुमि न्हुपला संस्काररि
प्लुम ब्लुम्सि 
नाम्सा नोन ओत्ते आडान रो
प्रिबाजुगु खासाइ नोन
खास वास्ता आता रो
ङ्हाच्छाला ह्रो आहिन
वाङ्जुग्याम ज्याक दोबा मुला रो
निसिमाम तिरेम ह्रुप नोन तासि
मोक्कोन गाउ होइ 
तिगादाम्मान तासाइ नोन
दुखला दुइला
दुख देप्बा ह्रो हिन्ना ।

ओम साइला 
क्याम्साङ नाम्साला
पाल्मोला तिगा मुला होइ तामसोर ? 
थेबा मुबा
ब्रेल्साङ लाबारि कुटुम्बासे
च्याबारि खाबा मुला रो
जि, आइराक थुङ्बा म्हितेन
ब्रेल्साङ लासिमाम 
माच्चा दिला पाराङस्या
चाङ्गेनला ह्राङ्बान केवा
ताला बिसि राजी आरे रो
एसे ह्रुप ताजि बिसाम
परदेशी च्याङ्बासे
कुनाङ डान्बा मुला रो
फेसबुक म्हाइबा आस्याप्नि रो
चोदे फेसबुक चलाप लाबा मुला बिसाम
एड लाउ रो बिसि
साङ्ग्युर थेना लाउ ।

दोःबा : यकिना अगाध