याम्बु, २२, बेल्बो । काठाक्पा दिपेन्द्र लामासे न्होरछाबा फिल्म जेक्केन ज्याबा आहिन पाङ्बा मुला ।

लानिरे याम्बुला भृकुटीमण्डपरि ताबा ‘चलचित्र कन्फ्रेन्स’ गेताङरि ताबा ‘फेस्टिभल भर्सेस डोमेस्टिक मार्केट’ काठुइ दुइसाङरि लामासे राङ्ला सेमताम थान्बा हिन्ना । ‘नेपालरि छोङ्नापा लासि न्होरछाबा ल्हानान फिल्मकादे जाम्बुलिङरि तासिन चिबा फेस्टिभलकादेरि बो किन्बारि खाम्बा आरे’, लामासे पाङ्जि, ‘थेराङ्नोन तासि ह्याङ्ला दिम नाङ्रि न्होरछाबा फिल्मदा जेक्केन ज्याबा थेन सफल फिल्म बिसि पाङ्बा दिङ आरे ।’

नेपालरि स्होबा थेन ओन्बा नेपाली फिल्मकादे तिदा जाम्बुलिङला ल्होलो ल्होलो ग्लारि दोआखाम्नि ? चु नुरदा क्योङ्सेन सेमरि किन्तोबा लामासे पाङ्जि । नेपालरि फिल्म ओन्बा हल थेन फिल्मदा बोलामा कादेसे फिल्मदा आगोबा लामाला पाले मुला । 
थेसे पाङ्जि, ‘फिल्म बजाररि ग्युर्बा ग्रेन ग्रेन थोपोकादे दयाहाङ राई, प्रदीप खड्का मुला बिसाम हल मुबा थेन बोलापासे फिल्मदा ओन्बारि सेम लाला । जाचा कलाकारकादे मुबा फिल्मदा ओन्बा शो नोनजा आपिन । चु तामसे लासि ज्याबा गेलाबा कादेता काक्ता ताबा मुला ।’

काठुइरि फिल्मकर्मीकादे अर्पण थापा, विनोद पौडेल थेन केकी अधिकारीसे नोन बोकिन्बा मुबा । थेनिकादेसे नोन नेपालरि फिल्मदा ल्हेना लाबाला लागि चुला देबाः ग्यालाम म्हाइतोबा पाङ्बान क्योङ्ला सेमरि फिल्म ग्युइ तातोबा सेमताम थान्जि । चुह्राङ तामा जेक्केन फिल्म थुम फेल्गेबा तासेला क्योङ्ला सामतेन मुबा ।

(छिगला अर्थः काठाक्पा– निर्देशक, लानिरे– सोमबार, न्होरछाबा– आयआर्जन/पैसा कमाउनु, छोङ्पा– व्यवसायिक, छोङ्नापा– व्यवसायी, बोलाबा– वितरण, बोलापा– वितरक, काठुइ– छलफल, थेन– र, तेन– सँग, देबाः– सजिलो, फेल्गेबा– विकास, सामतेन– विचार)