याम्बु । मुदबान डोवा ह्रिडुक सेमच्यानला हितला लागिरि स्हेङ्बा न्हिरेला चासुम लामा, हिदम थेन खाण्डोला वाङ गेताङ ताजि । नाम्दुङ ४ थेन ५ कुनु बौद्धनाथ क्षेत्रविकास दाछोकला स्हेङ्बा, छ्योर्तेन टासी केन्द्रीय तामाङ गुम्बा थेन बौद्ध जागरणला डिछ्यानारि ताबा हिन्ना । तामाङ टुल्कु लोसाङ नाम्गेल रिन्पोछेला म्होइजेनरि क्याब्जे सेचेन रब्ज्याम रिन्पोछेग्याम वाङ पिन्बा मुबा ।
बौद्ध नयाँवस्ती बाहुनधारारि मुबा बुद्ध एकेडेमीरि ताबा गेताङरि ल्होलो जोङरि मुबा गोन्बोकादेग्याम लामाजुगु, म्हानिपा छोक्पा, उपासक–उपासिका लासि छ्योआछ्यो तोङ डु बिमा ल्हाना बौद्ध धर्मावलम्वीकादेसे बोकिन्बा बौद्धनाथ क्षेत्रविकास दाछोकला गेकाठाक्पा मोहन कुमार तामाङसे ग्रादाङ पिन्जि ।
न्हिरेला गेताङरि लोसाङ नाम्गेल रिन्पोछे, बौद्धनाथ क्षेत्र विकास दाछोक, छ्योर्तेन टासी केन्द्रीय तामाङ गुम्बा, खान्डोमा म्हानिपा आमा छोक्बा, बुद्ध एकेडेमीसे रिन्पोछेदा कुसुम म्हेन्डल फुल्बा छ्योर्तेन टासी केन्द्रीय तामाङ गुम्बाला चोहो हरि बहादुर बलसे पाङ्जि ।
ल्हानान दिङ ङ्हाच्छाहेन्से चुराङ्बा गेताङ स्हेङ्बा सेमसे म्हाइसाइनोन चु दिङरि जे रिन्पोछे ला दुइ याङ्बा बिसि क्याब्जे सेचेन रब्ज्याम रिन्पोछे थोरि बौद्धनाथ क्षेत्रविकास दाछोकला चोहो राज कुमार लामासे थुजेछे फुल्जि । छ्यामरि मुतेबान गेताङरि बो किन्बा लामा, म्हानिपा आमा छोक्बा, डिछ्याबा टोली, ल्होलो ल्होलो गेन्दुनलाछ्याम म्होकोदन चोहोसे थुजेछे फुल्बा मुला ।
छ्यामरि ५ गते कुनुन स्ह्योरि क्याब्जे सेचेन रब्ज्याम रिम्पोछेग्याम छयोर्तेन टासी तामाङ गुम्बारि स्हेङ्बा गुरु रिन्पोछे थेन चेन्रेसिगला कू ला नोन ह्राब्ने लामुबा ।
तपाईको प्रतिक्रिया दिनुहोस