खाइमा फासीबाद खासेला मुला
थेसे म्राप बोसेला आरे
ज्युम ङेसिमाम न्हाङरि वाङ्सेला मुला–
पुइमु जुसिमाम कुर्सेला मुला
जयजयकार कोसेला मुला
ओम ह्याङ्ला कोन्ज्योसोमदा
ह्याङ्लान लिब्रो भड्काप लासेला मुला । 
थेसे जुलुस थेन छोबाजुगु लामा बजारबादला भजन कोसेला मुला–
सडकला छोङ्खाङहेन्से
सिसाला अट्टालिकाजुगु दोना
मुतेबा ग्लारि थेला मिन तासेला मुला ।

थेसे दर्शकदीर्घाग्याम ताली ह्राप्सेला मुला
चुसे बिमा आलाबा प्राङ्बो म्हि, क्योन्बा आयाङ्बा नाबादा
सडकरि ब्याङ्पिन्सेला मुला । 
थेसे ह्राङ्ला नायकजुगुला सालिक स्होसेला मुला
ओम थेन्ना लागि मिख्लि पुइसेला मुला
थेन्ना युङ्बाला काङरि म्हेन्दो फुल्सेला मुला
ग्रेनाइटला डेङरि छ्वाबा मिनजुगुदा ओस्सो जुम्बिसे स्योम्सेला मुला
ओम सिपाहीजुगुदा सिबाला लागि पुइचिसेला मुला
ल्हागाङजुगुरि, मरुभूमिजुगुरि ।

थेसे परेवाजुगुदा पुइसेला मुला
शत्रुजुगुला मि थिबारि
तिल्दाबिसाम थेतेन दारे जगेडा ग्वाइजुगु आरे ।

खाइमा फासीबाद खासेला मुला
सत्ताला बरन्डारि चिसिमाम चिया थुङ्सेला मुला
ओम सडकनाङ ख्युन रुइसेला मुला । 
मस्जिद, गिर्जाघर, लाथानला गुङरि
थेसे डोबाला डेङ रेनपिन्सेला मुला– 
‘छोर्गो, दुश्मन एला ख्यारख्युर नोन मुला
थेसे क्वान्बा क्वानला दाःनरि ङोसेगो ।’

थेसे छिगला छार भण्डार फुइना लासेला मुला–
निगमीकरण, निजीकरण,
ओम घृणाला नीति स्होसेला मुला । 
रेडियोरि थेलान ङ्हार्बा तासेला मुला
स्क्रिनरि थेलान लि
ओम ग्योइसे–
गोल्छे गोल्छे ह्राङ्ला दोन म्हाना लासेला मुला
थेतेन स्होथान्बा बयान तासेला मुला
याखारगि फेसबुक पेज तासेला मुला
ओम छ्यामरि आडम्बरी छिगजुगु व्हा कठोर होङ्बाला
ज्याआखाम्बा घृणा तासेला मुला । 
थेसे डोबा गोबा बाङ आला 
विश्वविद्यालयदा खतरा बिबान
थेसे बेनाना किताबजुगुदा छ्याकछिक डेसेला मुला
थेसे चुदा ख्राङ्सेला आरे
तासाइ थेसे गेआतिबा बिसेला मुला ओम उपयोगीहीन स्होपिन्ना ।

थेसे लोप्बोनदा कठ्घरारि राप्पुङ्सेला मुला
युनियनजुगुदा गैरकानुनी कापाङ्कि लासेला मुला
मूढतादा मिन पिन्सेला मुला ग्याल्साभक्तिला ।

फासीबाद खाइमा खासेला मुला
थे आकर्षक म्राङ्सेला मुला । 
थेला रुङ्बा क्रा तासेला मुला, ईस्त्री ल्हागाब लाबा सूट
थेसे मोक्कोन च्यानलजुगुरि नियन्त्रण लासेला मुला ।

थे सर्वोच्च अदालतरि वाङ्सेला मुला
ओम कानुनला ग्योइरि अन्याय ब्रिसेला मुला
थेसे डोना लासि व्हाम्सेला मुला
थेसे ह्याङ्दा केकेबा आश्वासन पिन्सि कोल्ना लासेला मुला ।

फासीबाद खाइमा खासेला मुला
थेसे शेयरबजार ह्राङ्से ब्यान्ना
थे फ्युक्पो दोसेला मुला ओम झन ग्रेनफ्युक्पो
थेलिच्छा कर फाबारि बन्द लासेला मुला ।

थेसे ह्राङ्दा बुडुइरि ब्याङ्सेला मुला
नाङ्सिमाम सेगाइह्राङ छोर्बा ब्रान्बारि । 
ह्याङ्दा दारे दोसि नोन मूर्ख स्होबारि
थेसे टु नोन ब्योङ्तोसेला आरे ।

ह्याङ ‘थेला असफल ताबा’ ब्रान्सेला मुला
ओम चोते देःबा लासि तासेला आरे । 
थेसे ह्याङ्दा ब्रेना लासेला मुला
लडप आलानान ब्रेना लासेला मुला
ओम ह्याङ्से थाहा नोन याङ्सेला आरे
ह्याङ्से ब्रेजिन्बा तासेला मुला 
दोसि तिरेम ।

फासिबाद खाइमा खासेला मुला
थे ह्याङ्ला निशब्द, उदासीनता थेन 
आत्मतुष्टीला लाबाजुगुला बाम क्रेसि खासेला मुला । 
ओम थेकुनु व्हाइखाब्रिखेनजुगु जोम्सेला मुला
किताब छोङ्खाङरि, पुस्तकालयरि, बारजुगुरि ओम कफि शपजुगुरि–
थेनि जोम्सेला मुला
क्राबान, ङेबान, क्रिङ्बान ।

थेन्छे म्हिजुगुला उदास ह्रोल्ज्याङदा
छिगला जाजा जाजा प्लेनजुगुरि छ्याप्सेला मुला
ओम थेदा मोलमदा ह्राङ्लासि
केवा दोङरि फ्लाकपिन्सेला मुला । 

२३ सेप्टेम्बर २०११, अमेरिका ।

(छिगकि दोनः छोबा– सभा, क्योन्बा– उपचार, नाबा– बिरामी, ख्युन– विष, डोबा– त्रास, दाःन– आधार,
ङ्हार्बा– हुङ्कार, दोन– अर्थ, होङ्बा– ध्वनि, लोप्बोन– शिक्षक, कापाङ्कि– घोषति, बुडुइ– धुलो, देःबा– सजिला, प्लेन– टुक्रा, छ्याप्बा– पट्याउनु)

नेपाली दोःबा : जय कार्की, तामाङ दोःबा : यकिना अगाध