मेलम्ची नगरस्तरीय वडाचोहो कप भलिबलला बेनान उपाधि दुवाचौरसे डाजि
सिन्धुपाल्चोक । त्रिशक्ति युवा क्लव, मेलम्ची –९ ग्याम आयोजित मेलम्ची नगर स्तरीय वडाचोहो कप ह्रेमकोला भलिबल प्रतियोगिताला उपाधि योङ स्टार युवा क्लबसे डाबा मुला ।
रोमाञ्चक फाइनल प्रतिस्पर्धारि उत्कृष्ट प्रदर्शन लाबान योङ स्टार युवा क्लबसे प्रतिद्वन्द्वी टोली दुवाचौर सामुदायिक युवा क्लवदा २५˗२१ २५˗२० थेन २५˗१७ ब्रेना लाबान उपाधि डाबा हिन्ना ।
प्रतियोगितारि दुवाचौरलान दबदबा म्राङ्बा मुला । दुवाचौर सामुदायिक युवा क्लबसे ङ्हीछा ग्ला डामा दुवाचौरलान श्रीजनशील युवा क्लबसे सोमछा ग्ला या पारतिबा हिन्ना । थेन्छे ताङ्से बु गि, ५० तोङ्जा थेन २५ तोङ्जाला छ्याम ट्रफी, मेडल थेन प्रमाणस्यो याङ्बा मुला ।
चुह्राङ्नोन लासि शीर्ष सोम नोन ग्ला मेलम्ची–७ दुवाचौरला टोलीजुगुसे डाबान क्यो १ बुम ७५ तोङ्जा रुपैयाँ पुरस्कार राशी वडारि बोर्बा मुला ।
चु प्रतियोगितारि गिक्छा, ङ्हीछा थेन सोमछा ताबा मोक्कोन टोली गिक्खेन वडाग्याम तामा विशेष डुप्बा तेन्बा मुला । छ्यामरि, चु रेमला मोक्कोन पुरस्कारजुगु दुवाचौररिन सीमित ताबा मुला ।
मेलम्ची नगरपालिकाला न्होरकि ह्रोरि ओसेम त्रिशक्ति युवा क्लबला आयोजनारि जनता माबिला ख्राङ्गारि ताबा प्रतियोगितासे स्थानीय क्लाङ्छ्योङ फेल्गेबा, छारिब्योनजुगु गुङरि एकता ओसेम ल्हुइथाङफिरि सचेतना ल्हेना लाबारि महत्वपूर्ण योगदान दोना लाबा आयोजकसे उन्पाङ्बा मुला ।
मेलम्ची नगर ग्रेन्पो आइतमान तामाङसे दुगु १८ गते ठ्वाङ्सेन लाबा स्योल्बा क्लाङरि खेलमा स्यानग्रेन्पो उमा प्रधान, वडाचोहो किरणदिप खड्काला छ्याम ल्होलोसे बोकिन्बा मुबा ।
(छिगकि दोनः क्लाङ्छ्योङ– खेलकुद, फेल्गेबा– विकास, छारिब्योन– युवा, ल्हुइथाङ– स्वास्थ्य, उन्पाङ्बा– जनाएको, ग्रेन्पो– प्रमुख, स्योल्बा– समापन, क्लाङ– खेल, स्यानग्रेन्पो– उपप्रमुख)
तपाईको प्रतिक्रिया दिनुहोस