सिन्धुपाल्चोक । मेलम्ची नगरपालिका न्हाङ्ला फेल्गेबा स्हेङ्बा गेला स्युग थेन गुणस्तरफिरि चासो थान्बान नगरग्रेन्पो आइतमान तामाङ थेन निर्माण छोङ्पा गुङ मिरे सार्थक ताम ताबा मुला । ग्रेन्पो तामाङला चोहोदानरि स्योल्बा काठुइरि ङ्ही नोन तिलोसे ह्राङ्ला धारणा स्पष्ट थान्बान छिम्ना लाबा प्रतिवद्वता लाबा मुला ।

ग्रेन्पो तामाङसे लिच्छाला दुइ ल्होलो योजनारि म्राङ्बा गाइबा थेन गुणस्तर ब्रेल्चिबा जनगुनासोफिरि गम्भीर असन्तुष्टि व्यक्त लाजि । ‘ह्युल्बाला करग्याम सञ्चालित योजनारि गाइबा थेन कमजोर गुणस्तर खाइमाइ स्वीकार्य आता’ ग्रेन्पो तामाङसे बिजि, ‘तोकतिबा दुइ न्हाङरि थुन्च्या आन्सार गुणस्तरीय गे स्योल्ना लाबा निर्माण छोङ्पाला दायित्व हिन्ना ।’ थेसे बिबा दुइरि गे आलासाम कानुन आन्सार कारबाही लाबारि नगरपालिका बाध्य तासेला पाङ्जि ।

काठुइरि बोकिन्बा निर्माण छोङ्पाजुगुसे बिसाम गेरि गाइना लाबा सेम आरेबा बिबान दातेला बजार परिस्थितिसे चुनौती काप्बा गुनासो थान्जि । ‘इन्धनला साइ ल्हेबातेन ढुवानी खर्च थेन निर्माण बार्बुला साइ मुथुर्ना नोबा मुला’, छोङ्पाजुगुसे पाङ्जि, ‘चुसे लागत थेन दुइ डिछ्यानारि असर पारतिबासे नगरपालिकाग्याम यथार्थ नाछालदा च्यासिमाम तिगाइ पुनरावलोकन लापिन्तोला ।’

काठुइरि ग्रेन्पो प्रशासकीय अधिकृत निमेष मिश्रसे नगरपालिका साप्तो पिन्बारि सहजीकरण लाबारि सातान प्रतिबद्ध मुबा उल्लेख लाबान निर्माण गेला स्युग आउदिन गोल्छेसे ताबा बिसि चिन्ता व्यक्त लाजि । ‘ङान्छे प्रशासनिक प्रक्रिया तुन्बा थेन सरल स्होबा प्रयास लाबा मुला ।’ थेसे पाङ्जि, ‘तासाइ गेला प्रगति सन्तोषजनक आरे । थुन्च्या आन्सार बिबा दुइ न्हाङरि गे स्योल्ना आलासाम चु न्होरकि दिङरि म्याद काप्बा नाछाल आरे ।’

तिनि ताबा ङ्ही नोन तिलोला चु तामसे खाबा रेरि फेल्गेबा स्हेङ्बाला गेदा दुइरिन ओम गुणस्तरीय स्ह्रुगरि ङ्हाच्छा बोर्सेला नगरपालिकासे अपेक्षा थान्बा मुला ।

(छिगकि दोनः फेल्गेबा– विकास, स्युग– गति, छोङ्पा– व्यवसायी, स्योल्बा– सम्पन्न, तिलो– पक्ष, छिम्बा– समाधान, ब्रेल्चिबा– सम्बन्धी, थुन्च्या– सम्झौत, बार्बु– सामाग्री, डिछ्याना– व्यवस्थापन, साप्तो– विचार, न्होरकि– आर्थिक, नाछाल– अवस्था)