तिनि म्हिला दिमजुगुरि भीड मुला, ङेबा काइ मुला
तासाइ सेमला कोठाजुगुरि दोप मुला ।
मोक्कोन म्हे ह्राङ्ला फोनला पर्दा न्हाङरि व्यस्त मुला
खालाइला मिरि आत्मीय दृष्टि आरे ।
फोनला ताङरि ग्यार्जाछा मिनजुगु मुला
तासाइ खालाइ नोन आरे
थेन्तेन सेम ब्लासि क्राबारि खाम्गाइ ।
ह्रापह्रुप ताला, ङेबो बो लाला, फोटो खिचप लाला
थे मुस्कानजुगु काते कृत्रिम, काते ब्लाप्बा छोर्ला ।
न्हाङरि खानाङए याखारगि गान्दि मुला
थेरि भावना आब्योङ
मौनता जेक्खे नुप्सिकेन निला ।
ह्याङ्तेन ब्रेल्बाम मुला
ब्रेल्बारि आत्मा म्हाजिन्बा मुला ।
दातेला नाताजुगु उपस्थितमि मुला
उपस्थितिरि दारे आत्मियता आरे ।
ह्याङ ताममि लाला तासाइ आत्माला काइरि आहिन,
औपचारिक बोलीरि मुला ।
ह्याङ चेगाइ लाला, तासाइ थे चेगाइ
सन्देशला छिगरि जेक्खे सीमित मुला
स्योम्बाला स्पन्दनजुगु म्हाजिन्बा मुला ।
चु युग आधुनिक मुला– तासाइ भावनामा प्राङ्बा ।
ह्याङ्तेन ह्राङ्ला मुला तासाइ आत्मीय आरे ।
ह्याङ्तेन दुइ मुला, तासाइ गिसेम गिला लागि आरे ।
ह्याङ्तेन ङेबा मुला, तासाइ ङेबा न्हाङरि मिख्लि लाबा मुला ।
ह्याङ्तेन दिम मुला, तासाइ दिमरि सेम आचि ।
तिल्दाबिसाम दिमजुगु दाते डेङ जेक्खे हिन्ना,
थेरि नाङ्सालमि लुङ्ला, तासाइ ऊष्मा म्हाजिन्बा मुला ।
म्हिजुगुले बिुमला– जाम्बुलिङ व्यस्त मुला, दुइ आरे ।
वास्तवरि व्यस्त ह्याङ ल्हुइसे आहिन,
आत्मासे ताबा मुला ।
ह्राङ्लान न्हाङ्ला प्राबा मौनता ङ्यान्आतोगाइ बिसिमाम
ह्याङ माङ्ग्यारला माजिङ्बारि म्हाबारि म्हाइला ।
भीडरि ब्रामा म्हान्ना– मोक्कोन म्हे ब्राचिबा मुला
तासाइ खालाइ नोन दोखाङरि आदो ।
मोक्कोन ताम पाङ्चिबा मुला, तासाइ खालाइसे आथे
मोक्कोन ङेचिबा मुला तासाइ ङेबारि ताजगी आरे
खाइमागि छोर्ला–
ह्याङ्से चेगाइ म्हाना लाबा आहिन
चेगाइला अनुभूति म्हाना लाबा हिन्ना ।
ह्याङसे ब्रेल्बा बोबा आहिन,
ब्रेल्बाला दोन म्लेबा हिन्ना ।
दारे ‘ह्रोकि’ सामाजिक सञ्जालला फ्रेमरि सोला
‘चेगाइ’ इमोजीला सीमारि सेला
‘भावना’ पोस्टला क्याप्सनरि म्हाला ।
तासाइ तिङ दातेनोन खेःबा मुला–
दाते नोन याखारगि आत्मीय या म्हाइबाकेन मुला
थेसे छिग आरेसाइ नोन महसुस लाबारि खाम्गाइ ।
भीडरि म्हासिकेन निमा नोन,
ह्याङ्ला सेम दाते नोन थेनोन खेःबा ‘ह्राङ्लापन’ म्हाइबाकेन मुला
थेरि ङेबा देन्बा मुगाइ
मिख्लि स्वीकृत तागाइ,
ओम मौनतालदा नोन चेगाइ डिक्गाइ ।
चुह्राङ्बा ह्राङ्लापन दारेम दुर्लभ ताजिन्बा मुला
थे आत्मीयता दारेम विलासी वस्तुह्राङ दोजिन्बा मुला ।
थेतासि नोन, भीडनाङ जाम्बुलिङ म्राङ्बाकेन लामा
म्हिजुगु दाते नोन चोतेबा याकार म्राङ्ला ।
तिनि ह्याङ् मोक्कोनतेन खालाइ न्हा खालाइ मुला
तासाइ मुतेबा तिङ न्हाङरि दाते खालाइ म्हाचिबा मुला ।
ह्याङतेन छ्याम छ्याम ब्राला
तासाइ ग्यालाम फेबा फेबा मुला ।
ह्याङ चेगाइ लाला
तासाइ आत्माला काइरि आहिन–
कर्तव्यला मौन काइरि ।
थेतासि नोन तिनि,
भीडन्हाङ्ला चु याकारपन
मानवताला मोक्कोन बिमा नुप्बा स्हेर दोबा मुला ।
(छिगकि दोनः म्हे– जना, ताङ– सूची, ब्रेल्बा– सम्बन्ध, चेगाइ– माया, स्योम्बा–स्पर्श, प्राबा– चर्को, माजिङ्बा– हल्ला, दोन– अर्थ, ह्रोकि– मित्रता, खेःबा– पुरानो, स्हेर– पीडा)
दोःबा : यकिना अगाध
तपाईको प्रतिक्रिया दिनुहोस