याम्बु । याम्बु महानगरला १५ नम्बर वडाला आयोजक थेन बिजेश्वरी युवा क्लबला छ्याआयोजकरि दुगु १२ गतेहेन्से १९ गतेदोना सिम्बुरि दोङरापकि सिम्बु काप्तोछेन ताचिबा मुला । चु काप्तोनछेनरि तामाङ डाजाङ गेन्दुनतेन स्यान्दो ल्होलो गेदुङ गेन्दुनजुगुसे नोन बोकिन्बा मुला ।

गेताङरि तामाङ डाजाङ गेन्दुनसे जाम्बुलिङलान ग्रेन डम्फु प्रदर्शन लाबा डाजाङला चोहो फूलकुमार बम्जनसे ग्रादाङ पिन्बा मुला । काप्तोनछेनला र्यालीरि तामाङ डाजाङ टिमसे डम्फुला छ्याम मौलिक तामाङ सेलो व्हाइकोसि स्यासिकेन बोकिन्बा मुबा ।

वडा नंं १५ ला वडाचोहो ईश्वरमान डंगोलला ग्रेनडोन्बोरि गेताङला ठ्वाङ्सेन ताबा मुबा बिसाम गेताङ बिजेश्वरी युवा क्लबला चोहो बीरबहादुर तामाङला थुछापारि ताबा मुबा । चोहो फूलकुमार बम्जनला ग्रा आन्सार गेताङला ठ्वाङ्सेन तिल्मा किमडोल गाङरि ताबा मुबा बिसाम तिनि चमति थेन न्हाङ्गार बिजेश्वरी गाङरि तासेला मुला । काप्तोनछेनरि डम्फुरेजुगुला व्हाइ थेन ह्रोल्ज्याङसे बोकिन्बाकादेरि गाबो काप्बा मुबा ।

बिजेश्वरीला तामाङ कुताप धिम रेस्टुरेन्टरि थान्बा ग्रेन डम्फुसे कलाकार थेन ह्रोल्ज्याङला पाराखीजुगुदा मोहित स्होबा मुबा । चु काप्तोनछेनरि कुदाप दिम रेस्टुरेन्टसे तामाङ ग्योइ, कलाकृति, रिमठिम, चाबास्हे थेन रिमठिमदा न्हाङ्ला थेन माङ्ग्यारला पर्यटन गुङरि ल्हेछ्या लाचिबा मुला ।

(छिगकि दोनः सिम्बु– स्वयम्भू, दोङरापकि– ऐतिहासिक, काप्तोनछेन– महोत्सव, गेदुङ– संघ, गेन्दुन– संस्था, ग्रादाङ– जानकारी, थुछापा– संयोजक, ग्रा– सूचना, ह्रोल्ज्याङ– संगीत, गाबो– उत्साह, ल्हेछ्या– संबर्धन)