ए मुर्ख हिन्ना,
ह्राङ्ला धरातल म्लेसि
तिल्दा स्यान्दोला तामरि फिर्ला ?
एमि ह्राङ्लान साप्राला तान्बा हिन्ना,
तिल्दा स्यान्दोला काइरि
ह्राङ्ला तिङ म्हाना लाला ?
गुङरि बुबा म्हि ए,
न्हा ओम टा नुप्ना क्याखाम्बा,
न्हा ओम जोरि च्योखाम्बा–
गुङ ग्यामरिन कोल्बा ल्हाम
अधूरो म्हाङ थोसि कोर्चिमुला ।
लाबासे खानाङ आङ्जि
थेरिन ब्योङ्बा बा ह्राङ्बा
तिला ह्राङ्ला छ्यो म्हाला ?
एमि लुङसुर नाबारि खाम्बा
युङ्बा ह्राङ कोङ्तोबा मुबा ।
स्यान्दोला छिगसे
तिल्दा एला सोचदा डुङ्जि ?
तिल्दा ह्राङ्ला ङोसेबादा
भीडला काइरि म्ह्युना लाजि ?
डान्गो–
थे साप्रा, खानाङ ए फुइजि
थेरिन मुला एला अस्तित्वला टा ।
थे टु, थे संघर्ष,
थेरिन मुला एला देन्बा गौरव ।
क्रिपला भररि आहिन,
ह्राङ्लान ह्यालरि सोबारि लोप्गो
स्यान्दोला ग्यामरि आहिन,
ह्राङ्लान गोङ्मा कोरतिबारि लोप्गो ।
गुङरि बुबा केवादा
तिल्दा अधुरोन ख्लाला ?
टा नुप्ना क्यागो
मुरिक्यार मि थिगो
ह्राङ्ला ग्यालाम ह्राङ्सेन स्होउ ।
तिल्दाबिसाम–
स्यान्दोला गोङ्मा दाङ्बाजुगु
सातान लिच्छा परतिला
ह्राङ्ला ग्यालाम स्होबाजुगु
दोङरापरि ह्याल ताला ...!
१/३/२०८३, ललितपुर ।
(छिगकि दोनः बुबा– पलाएको, तान्बा– सन्तान, छ्यो– दिशा, ङोसेबा– पहिचान, लुङसुर– आँधी, म्ह्युब– बिलाउने, देन्बा– साँचो, केवा– जीवन, दाङ्बा– पछ्याउनु)
दोःबा : यकिना अगाध
तपाईको प्रतिक्रिया दिनुहोस