याम्बु ५ दुगु । रिमठिम ओसेम पर्यटनब्लोन सुरेश श्रेष्ठसे नेपाल मौलिक सम्पदाला ग्रेन सम्भावना मुबा ह्युल ताबासे चुला ख्युरछ्या थेन ल्हेछ्यारि मोक्कोनसे ध्यान पिन्तोबा पाङ्जि ।

जाम्बुलिङ सम्पदा दिवसला दुइसाङरि कामरे आयोजित सम्पदा ख्युरछ्या थेन पर्यटन ल्हेछ्या समृद्धिला दाःन नुरकि गेताङरि थेसे चु ताम पाङ्बा हिन्ना । ‘मुबा सम्पदाला ख्युरछ्या लाबारि ग्रेन्पो चुनौती म्राङ्बा मुला, छारिब्योन पुस्तादा चु अभियानरि ल्हागाब लाबारि आखाम्साम सम्पदा नष्ट ताबारि खाम्ला’ थेसे पाङ्जि, ‘दाते दोना सम्पदाला ख्युरछ्या ताबा मुला, ह्याङ लिच्छाला पुस्ताला पालोरि चुला ख्युरछ्या ताला कि आता बिबा चिन्ता मुला ।’

छारिब्योन पुस्तादा सम्पदा ख्युरछ्या अभियानरि ल्हागाब लाबारि आखाम्सेला हिन्ना बिसाम ह्याङ्ला ङोसेबा थोबा सम्पदा म्हासतिबारि खाम्सेला थेसे चिन्ता व्यक्त लाजि । नेपाली सम्पदा च्याबाला लागि जाम्बुलिङनाङ ग्याम पर्यटजुगु खाबा लाबासे न्होरकि उपार्जनरि ग्रेन ह्रो ताबा बिबान थेसे चुला ख्युरछ्यादा झन ज्याना लाखाम्साम ल्हाना पर्यटक बाबारि खाम्सेला थेला पाङ्बा मुला ।

चुर्ला पाटी–पौपा, लाथान, वात्ति, ग्योइ ह्राङ्बा सम्पदा ख्युरछ्या लाबारि आडुप्बा म्राङ्बा बिबान थेसे प्रदेश सरकारसे चुरि ध्यान पिन्सेला प्रतिबद्धता उन्पाङ्जि । नेपालला सम्पदा नेपालीला ङोसेबा ताबासे चुला ख्युरछ्याला खाँचो मुबा थेसे चर्चा लाजि ।

रिमठिम थेन पर्यटन प्रदेश गाउराइ दिपेन्द्र सुवेदीसे नेपालरि ह्राङ्ज्युङकि थेन रिमठिमकि सम्पदा मुबा थेन थेला ख्युरछ्यारि मोक्कोनला हातेमालो तोबा पाङ्जि । सरकारसे जेक्खे सम्पदाला ख्युरछ्या लाबारि आखाम्सेला बिबान थेसे क्योङ नागरिकदा चु अभियानरि ल्हागतिबारि थेसे आग्रह लाजि । नेपालरि अथाह ह्राङ्ज्युङकि थेन रिमठिमकि सम्पदा मुबासे पर्यटक बाबा दाःन कोङ्बा मुबा थेला पाङ्बा मुला ।

सम्पदाखेन्पो प्राडा. सुदर्शनराज तिवारीसे हाँडी नाम्साला ओनमाला ग्योइ, वात्ति, थेन लाथान म्हाइ लाबा पाङ्जि । किरात दुइला ग्योइजुगुला अस्तित्व सोना लाबारि आखाम्बा थेन मुबा ग्योइला अस्तित्व नोन पोबा थेला पाङ्बा मुला । ओन्माला सम्पदा नेपालीला ङोसेबा ताबासे ख्युरछ्यारि ग्याल्सासे लगानी ल्हेना लातोबा थेसे सुझाव पिन्जि ।

नेपाल ललितकला प्रज्ञा प्रतिष्ठानला कुलपति नारदमणि हार्तम्छालीसे सम्पदाला ख्युरछ्या लाबा नेपाल थेन नेपालीला ङोसेबा सोना लाबा अभियान ताबासे मोक्कोनला हातेमालो तोबा पाङ्जि । नेपालला ज्योस्हेङ, ग्योइ, ग्योइकाइ, सम्पदा, पर्या पर्यटनला ल्हानान सम्भावना ताबासे चुला ख्युरछ्यारि ल्हागतिबारि आग्रह लाजि ।

पशुपति थुम फेल्गेबा विकास कोसला ङ्हाच्छाला ह्रोमिगाउराइ डा. गोविन्द टण्डनसे नेपाली सम्पदा सङ्कटरि मुसाइ नोन दातेदोना अस्तित्वरि मुबा बिबान थेला ख्युरछ्या थेन ल्हेछ्या लाबारि खाम्साम माङ्ग्यारला पर्यटक बाबारि खाम्सेला सम्भावना मुबा पाङ्जि ।

पर्यटन गेदिम, याम्बुला ग्रेन्पो पवनकुमार पोखरेलसे याम्बु लाथान नोन लाथानला सहर ताबासे चुसे स्हिवाङला सन्देश पिन्चिबा पाङ्जि । ह्याङ्ला प्रिबा, ह्याङ्ला केवाज्यो थेन ङोसेबा ताबासे चुला ख्युरछ्या लाबारि खाम्साम ङोसेबातेन पर्यटन फेल्गेबा लाबारि खाम्सेला पाङ्जि । सम्पदा ख्युरछ्या लाबा ह्याङ् मोक्कोनला साझा दायित्व ताबा थेला पाङ्बा मुला ।

नेपाल सम्पदा गेदुङला चोहो धर्मराज शाक्यला चोहोदानरि ताबा गेताङरि वक्ताजुगुसे सम्पदा म्हासतिसिकेन निबा नाछालरि ग्याल्साला लगानी ल्हेना लासि क्योङ नागरिकसे ख्युरछ्या अभियानरि जुटप तातोबा सुझाव पिन्जि ।

(छिगकि दोनः ब्लोन– मन्त्री, ख्युरछ्या– संरक्षण, ल्हेछ्या– संबर्धन, दुगु– बैशाख, दाःन– आधार, नुर– विषय, न्होरकि– आर्थिक, आडुप्बा– अभाव, उन्पाङ्जि– जनाए, ह्राङ्ज्युङकि– प्राकृतिक, रिमठिमकि– सांस्कृतिक, खेन्पो– विद्, ग्योइ– पोखरी, ग्याल्सा– राज्य, ज्योस्हेङ– कला, फेल्गेबा– विकास, ग्रेन्पो– प्रमुख, स्हिवाङ– शान्ति, केवाज्यो– जीवनशैली, गेदुङ– संघ, नाछाल– अवस्था)