मोरङ । नेपाल तामाङ घेदुङ प्रदेश नं. १ ला ङ्हीछा ऐतिहासिक छेजोम पथरी शनिश्चरे–७, लामाटोलला तामाङ बौद्ध रिमठिमकि भवनरि भव्य स्ह्रुगरि स्योल्बा मुला ।

प्रदेश चोहो रेखबहादुर घिसिङला चोहोदानरि आयोजित ठ्वाङ्सेन सत्र संघीय चोहो मोहन गोले तामाङला ग्रेनडोन्बोरि ताबा मुबा । गेताङरि संघीय छ्याचोहो कुमार घिसिङ, वरिष्ठ स्यानचोहो रामकृष्ण ल्बोन तामाङ, न्होरचोहो रुप योन्जान,  प्रहरी सेना कर्मचारी समन्वय विभाग ग्रेन्पो मित्रसेन तामाङ, संघीय ह्रोमि बिलाम मुक्तान, दिलबहादुर पख्रिन, शान्ता मोक्तान, धनबहादुर तामाङ युवा घेदुङ संघीय स्यानचोहो मनोज योन्जान, सशिकार लामातेन स्यान्दोकादेसे बोकिन्बा मुबा । प्रदेशला १४ जोङग्याम खाबा गोछापा ओसेम ल्होलो गेदुङ–गेन्दुनला पदाधिकारीजुगुसे उल्लेखनीय बोकिन्बा मुबा ।

ठ्वाङ्सेन सत्रदा सम्बोधन लाबान डोन्बोग्रेन मोहन गोले तामाङसे तामाङ समुदाय नेपालला आउदिन खेःबा समुदाय तासाइ नोन ग्याल्साला नीतिला ङ्यान्दि लिच्छा परतिबा उल्लेख लाजि । थेसे तामाङ समुदायला ग्युइसेरकि नाछाल दातेनोन कमजोर मुबा थेन थिग्युनला लागि सामूहिक प्रयास लातोबा पाङ्जि ।

संघीय छ्याचोहो कुमार घिसिङसे नेपाल तामाङ घेदुङ २००८ दिङहेन्से स्हेङ्सि २०१३ दिङहेन्से गेन्दुनकि स्ह्रुगरि ङ्हाच्छा वाङ्बा उल्लेख लाबान ह्युल ओसेम फिह्युलरि संगठन फेल्सिकेन खाबा पाङ्जि । थेसे तामाङजुगुला संस्कार, रिमठिम सोना लाबारि अग्रजजुगुला योगदान महत्वपूर्ण मुबा धारणा व्यक्त लाजि ।

वरिष्ठ स्यानचोहो रामकृष्ण ब्लोन तामाङसे समुदायदा सचेत थेन एकताबद्ध ताबारि म्होइजेन लाबान ग्यालठिपा पहुँच फेल्ना लातोबा पाङ्जि । ‘ङ्हाच्छा जाति थेन थेलिच्छा पार्टी’ बिबा भावनासे जेक्खे एकता सम्भव तासेला थेसे पाङ्जि ।

चुह्राङ्नोन लासि मित्रसेन तामाङसे ह्रेङ्बा दुइहेन्से प्रशिक्षण थेन अभियान सन्चालन तामा नोन म्हान्बाह्राङ्बा एकता आखाबा उल्लेख लाबान दारे एकताबद्ध तासि ग्यालठिपा स्ह्रुगरि सशक्त दोतोबारि बाङ पिन्जि ।

संघीय न्होरचोहो रुप बहादुर योन्जानसे छार निर्वाचित नेतृत्वदा थुजेछे पिन्बान सफल ग्यत्दुइला ज्याबाम्हान्बा व्यक्त लाबा मुबा । 

छेजोमला बन्दसत्रग्याम निर्वाचन प्रक्रिया स्योल्ना लाबान छार नेतृत्व क्योङ्डिक्सि दाम्बा मुला । दाछोकला चोहोरि जगत तामाङ, स्यानचोहोजुगुरि एकराज तामाङ, रुपनारायण तामाङ गोले थेन जामेकोला स्यानचोहोरि बिनिता थिङ तामाङ मुला ।

मुख्य गाउराइरि फणीन्द्र तामाङ बिसाम ह्रोमिजुगुरि हस्ताबहादुर तामाङ, खड्का कुमार तामाङ, धनबहादुर तामाङ, टेकबहादुर तामाङ, इन्द्रकुमार योन्जान, जयबहादुर तामाङ, जितेन्द्र तामाङ मुला ।

छेजोमसे छार निर्वाचित पदाधिकारीजुगुदा थुजेछे ओसेम सफल ग्यात्दुइला ज्याबाम्हान्बा व्यक्त लाबा मुला । छ्यामरि, तामाङ समुदायला ङोसेबा, याङ्ताम ख्युरछ्या थेन बेनान फेल्गेबाला लागि खाबा रेरि झान सशक्त स्ह्रुगरि ङ्हाच्छा वाङ्बा प्रतिबद्धता व्यक्त लाबान गेताङ स्योल्बा मुबा ।

(छिगकि दोनः छेजोम– अधिवेशन, स्योल्जि– सम्पन्न भयो, स्योल्बा– सम्पन्न, स्ह्रुग– रुप, छ्याचोहो– सहअध्यक्ष, स्यानचोहो– उपाध्यक्ष, गोछापा– प्रतिनिधि, गेदुङ–गेन्दुन– संघसंस्था, ग्रेन्पो– प्रमुख, खेःबा– पुरानो, ग्याल्सा– राज्य, ङ्यान्दि– कारण, ग्युइसेरकि– शैक्षिक, नाछाल– अवस्था, थिग्युन– सुधार, गेन्दुनकि– संस्थागत, फेल्सिकेन– विस्तार हुँदै, ग्यालठिपा– राजनीतिक, दाछोक– समिति, ह्रोमि– सदस्य, ग्यात्दुइ– कार्यकाल, ङोसेबा– पहिचान, ख्युरछ्या– संरक्षण, याङ्ताम– अधिकार, फेल्गेबा– विकास)