हेराङ । हेराङला महांकाल गाउँपालिका स्यानचोहो डोल्मा माया गोलेसे ग्याल्साग्याम लालातिरेम याङ्बा तलबभत्ताला न्होर सामाजिक साप्तोला थुमरि खर्च लाबा कापाङ लाबा मुला । ८ मार्चकुनु स्यानह्युल जामेकोला दिवसला दुइसाङरि स्यानचोहो गोलेसे चु कापाङ लाबा हिन्ना ।

अनलाइनखबर डटकमला २०८१ दिङ्ला ५० प्रभावशाली जामेकोलारि दाम्बा गोलेसे सामाजिक सन्जालरि ब्रिबा मुला, ‘जामेकोला दिवसला दुइसाङरि ह्राङ्नि आमा, नाना, आङादा साक्षी थान्छि दारेहेन्से ङाइ ग्याल्साग्याम याङ्बा तलव भत्ताला न्होर आकिन्बा थेन लालातिरेम खाबा तलब भत्ताला न्होर जेष्ठ नागरिक, अपाङ्गता, जामेकोला, सानाम्पा, लोप्बोन, छारिब्योन, ल्हुइथाङ ह्राङसाप्तोपाला थुमरि खर्च लासेला कापाङ लाबा मुला ।’

थेसे ब्रिबा मुला, ‘ङाइ प्रयोग लासिकेन खाबा सरकारी सवारी साधन सुताइ दिमथेमेरि खालाइ सहारा आरेबा जेष्ठ नागरिक, खजा ताबा, आउदिन प्राङ्बो नागरिकजुगु सरकारी साप्तो किन्बारि पालिका थेन वडा खाबारि खाबा निबाला लागि लालातिरेम वृद्धभत्ता किन्बारि पालिका केन्द्रला बैंकदोना दोना लाबारि सहजीकरण लासेला मुला ।’

पालिकानाङ ग्याम्से जेक्खे चु साप्तो उपभोग लाबारि म्याङ्सेला थेसे पाङ्बा मुला । थेला लागि महांकाल गाउँपालिका जामेकोला ओसेम बिजाबुमोला शाखासे ब्रेल्चिबाकि वडा चोहो जनप्रतिनिधि ओसेम गाउराइ थेन ल्हुइथाङ ह्राङ्साप्तोपाजुगुतेन समन्वय लासि चु साप्तो किन्बारि खाम्सेला स्यानचोहो गोलेला पाङ्बा मुला ।

फेसबुकरि ह्राङ्ला मोबाइल नम्बर सुताइ सार्वजनिक लासि थेसे बिबा मुला, ‘खुलाप तासि पाङ्स्ह्युगो, ह्राङ्ला आपत–विपत, दुःखला स्हेररि ङा छ्यामनोन चिसेला मुला ।’

(छिगकि दोनः कापाङ– घोषणा, हेराङ– ललितपुर, स्यानचोहो– उपाध्यक्ष, ग्याल्सा– राज्य, साप्तो– सेवा, स्यानह्युल– अन्तर्राष्ट्रिय, सानाम्पा– किसान, लोप्बोन– शिक्षक, ल्हुइथाङ– स्वास्थ्य, ह्राङ्साप्तोपा– स्वयंसेवक, खजा– अपाङ्ग, बिजाबुमो– बालबालिका, ब्रेल्चिबाकि– सम्बन्धित)