मौसमसे दुइ
स्योङसे बगर
छ्युलिङसे छाल 
पोबा ह्राङ्नोन
आउदिन जेबो, ताङ्बा थेन उल्लास 
थोसिमाम खाबा 
छार दिङ !
छार ल्हो !
ङाइ एदा डेन लाचिमा 
ए ङाला दिम ख्राङ्गारि
खाराङ्लासि खाला ? 
ताङ्बा थोसि खाला कि 
स्हेर थोसि ? 
ङाइमि ताङ्बा खागाइ बिसिमाम
डेन लामुला 
ह्युलहेन्से
फिह्युलदोना मुबा बेनासे
ताङ्बालान लागि मोलम 
लाबान ताला
मुबा चाबादा
सातान छार दिङ
छार ल्हो
ओस्बान मुला
प्राङ्बोदा
नोन देन्बान चुरेम 
छार दिङ खाबा हिन्ना ले ? 
चोदे हिन्ना बिसाम
जेबा तिङसे डेन मुला 
छार दिङ एदा
ए खामाहेन्से
खेप्पा आपा, आमा नाम्सारि
जा जामेला आशरि 
ग्यालाम च्याचिबा मि
ब्लाप्सि मिख्लि पुइबा
रेजुगु ङ्यान्आतोगाइ
म्राङआतोगाइ
केवा फुल्बा
म्हाङ खानाङ दोजि 
थे म्हाङ साकार लाबारि 
सेम जाजामेरि बुगाइ
छार ल्हो
एदा डेन मुला
खाबामि ए ल्हानान रेम खाजि
ओम निजि नोन
तासाइ ए खामा
ङ्हाच्छा देन्बान
सेम जेबो ताबा आरे
दारे हेन्से
चु रेमला खाबा लिच्छा
बेनासे छाकगि टारतिबारि
ओम ल्हुइ गापखाम्बा तागाइ 
ङाला बोरि परआतिबा 
विश्वासदा 
अविश्वासरि ग्युर्बा 
ङाला ल्हामला तिगाइ पात्रजुगु 
म्राङ्बामि तिगा 
डान्बा सुताइ आखाबा तागाइ
रेरि ङेसाइ नोन
म्हुनला बोल्बारि
ह्राङ्से ह्राङ्दा
माफ लाबारि खाम्बा साहस थान्सि
स्हेर स्हुरि मलम ल्हागाब लाबारि खाम्बा
स्हिवाङ्ला ह्याल नाङ्साल
म्रासि खाउ
डेन मुला
छार ल्हो
छार दिङ एदा ।

(छिगकि दोनः छ्युलिङ– समुद्र, जेबो– उमंग, स्हेर– पीडा, मोलम– कामना, ग्युर्बा– परिणत, ल्हाम– यात्र, स्हिवाङ– शान्ति)

दोःबा : यकिना अगाध