गे लाबाजुगु लोङ्ला–
गे आयाङ्कि बिसिमाम ।

गे आयाङ्बाजुगु लोङ्ला–
खाइमाइ गेनोने आयाङ्कि बिसिमाम ।

खाल्दा फोइदानसे पिराप लाबा आरे
थेन्दा नोन लोङ्बा मुला–
न्हाङ्गार चाबारि आम्याङ व्हा बिसिमाम ।

लोकतन्त्र लोङ्ला–
म्हिजुगुदा छोर्ना लाला व्हा बिसिमाम
ग्योइ लोङ्ला–
देन्बा पाङ्तोला व्हा बिसिमाम ।

साधारण नागरिक लोङ्ला सेनातेन, 
सेना लोङ्ला–
हतियार च्याङ्ना थोप्ला व्हा बिसिमाम ।

हतियार ह्राङ्नोन लोङ्ला–
खानाङए युद्ध आतागाइ बिसिमाम ।

चु लोङ्बाला युग हिन्ना ।

जामेकोलाजुगु लोङ्ला हिंस्रक ह्रेमकोलातेन, 
ह्रेमकोलाजुगु लोङ्ला
निर्भीक जामेकोलातेन ।

ह्योला लोङ्बा, प्रहरीला लोङ्बा,
ताल्चा ल्हागाब आलाबा म्रापला लोङ्बा

दुइ आरेबा घडीला लोङ्बा 
बिजाबुमो आरेबा टेलिभिजनला लोङ्बा,

निद्राला मान आरेना थाल्बा म्हुनला लोङ्बा,
ओम चेतना आरेनान थाल्बा रेला लोङ्बा ।

भीडला लोङ्बा, याकार म्हान्बाला लोङ्बा
तिगा ताजिन्बा मुला थेला लोङ्बा
ओम तिगा ताबारि खाम्ला थेला लोेङ्बा ।

सिबाला लोङ्बा
ओम सोसेला लोङ्बा ।

(छिगकि दोनः लोङ्बा– भय÷डर, तिलो– पक्ष, स्ह्रुग– रुप, दुल्थान्बा– दबिएका, ग्योइकाइकि– साहित्यिक, ज्यो– शैली, नुब्बा– गहिरो, दोन– अर्थ, ग्युरपोबा– परिवर्तन, स्हेग्या– माध्यम)

एदुआर्दो गलियानो (Eduardo Galeano) सन् १९४०रि केसि २०१५ रि डोङ्बा उरुग्वेला प्रसिद्ध ब्रिखेन, स्योमि थेन विचारक मुबा । थे ल्याटिन अमेरिकी समाज, दोङराप थेन ग्यालठिपाला नुबबा तिलोदा सरल तासाइ प्रभावशाली ग्योइरि प्रस्तुत लाबा ब्रिखेनला स्ह्रुगरि ङोसेला । थेला ब्रिबारि विशेष लासि अन्याय, शोषण, असमानता थेन मानव स्हेरला राप म्राङ्ला । थेसे छिगग्याम्से समाजला दुल्थान्बा काइदा माङ्ग्यार बाबा गे लामुबा ।

थेला मोक्कोन बिमा चर्चित कृति Open Veins of Latin America हिन्ना, थेरि ल्याटिन अमेरिकाफिरि ताबा ऐतिहासिक शोषणला विश्लेषण लाबा मुला । छ्यामरि, Memory of Fire नोन थेला महत्वपूर्ण ग्योइकाइकि योगदान हिन्ना । गलियानोला ज्यो विशेष मुला– तुन्बा, काव्यात्मक थेन नुब्बा दोन थोबा । थेला ब्रिताम थेन व्हाइखाजुगुसे डोखेनदा सोचतिबारि बाध्य स्होला ओम समाजफिरि सचेत ताना लाला । थेला केवा थेन सिर्जनासे उन्ना कि कि ग्योइकाइ जेक्खे मनोरन्जन आहिन, ग्युरपोबाला शक्तिशाली स्हेग्या नोन हिन्ना । दोःबा : यकिना अगाध)