ल्होछार खाजिन्जि ?
ल्होछार खाबाकेन मुला हिन्ना ?
ओइ आङा, 
तामाङ ल्होछार खाजि ?
तिगा रो सोनाम ल्होछार खाजि ?
बिसिमाम साता सोम ङ्हाच्छा जेक्खे
तोर ज्योमोगाङ टाग्याम्से 
आङकाजी सेर्पा ज्योज्योसे ङ्योइबाकेन मुस्ह्युमुबा

ला गि ङ्हाच्छा हेन्छेन हिन्ना
सामाजिक सञ्जालनाङ 
कलरफुल लुङ्दारसे स्याम्बा 
ल्होछारला पोस्टरजुगु कात्ते हिन्ना कात्ते 
रेडियो, टेलिभिजन थेन ल्होलो च्यानलजुगुरि 
ल्होछारला ज्याबाम्हान्बा विज्ञापनजुगु 
थेह्राङ्नोन लासि ङ्याचिबा मुला
थेह्राङ्नोन लासि होङ्चिबा मुला !

ओहो ह्याङ्ला तामाङ ज्योज्योआले नानाआङाजुगु 
कात्ते उत्साहित हिन्ना कात्ते हतार,
ओहो कात्ते चटारो हिन्ना 
कादे व्यस्त हिन्ना आम्मामा
खालाइदा बु बुन्बादोना फुर्सद आरे छैन 
ल्होछार काप्तोन दाङ्बारि छ्योङ्बा ल्होछार 
मोक्कोन मोक्कोन अचम्म ताना व्यस्त म्राङला  
तामाङ समुदायदा छार दिङ ल्होछार तासि मुसिम 
खेबाः दिङ्ला विदाइ लासि 
छार दिङ्ला खाबा ताबासे मुसिम !

‘तिनिला चु होइ ल्होछाररि,
खाउले ज्योज्यो, खाउले आले 
स्याइले कोइले ह्याङ्न्हाङरि’ 
कोबान काइपो निमा रुम्बा ज्योज्योसे 
स्यारहेन्से न्हुपदोना ल्होछारदा 
काप्तोनमय स्होबारि स्याप्जिन्जि

चुदुइ, काइपो राजु लामा ज्योज्यो
ह्राङ्ला व्हाइ व्हना ल्होछार ङ्यासेजुगुछ्याम 
न्हुपला ह्युलजुगु ल्होछारमय स्होबारि 
तल्लीन म्राङ्ला 
काइपो रोज मोक्तान ज्योज्यो, विश्व दोङ आले, 
निर्मला घिसिङजुगु ह्राङ्ला ज्योस्हेङ थेन ओल्गोङ्से 
ल्होछार ङ्यासेजुगु रंगीन स्होबारि 
ह्युल ह्युल छ्योङ्सि डम्फुला घेरोफिला 
चराह्राङ ब्याप युसि  
जहाज तासिकेन साजाम्बुलिङ थेन मुला 
ग्यालामला दुरी दाप्सिकेन जाम्बुलिङनाङ फ्याङ्जिन्जि

क्याच्चा नाम्साबा केकी अधिकारी, 
चुच्चा नाम्साबा मेलिना राई, 
गुङ्नाम्साला कुलब्वाइ आले,
थेन दिला नाम्साला तोषिमा कार्कीजुगुसे चुपाल्छे 
सेम ठ्वाङ्सि ल्होछारफिरिसद्भाव उन्जिन्जि !

ङिसरे ङ्हाच्छाहेन्से
ह्युल फिह्युल जाम्बुलिङनाङ 
ल्होछार काप्तोन चलप ताचिमा 
तासाइ, पेबान खाबा खाह्राङ्बा
रुटिन अफ तामाङ मिडिया
ह्राङ्लान सुङ गाप्सि 
‘आहिन ह्याङ्ला ल्होछार ख्रेलारि कि बेनेरि ?’
ङ्योइसिकेन ह्राङ्ला फेसबुक डेङनाङ 
ङ्योइबाला थाङ्मोजुगु हेल्बाकेन मुला !

मुतेबारिक्यार जाम्बुलिङनाङ ल्होछार रौनक चम्कप ताचिबा दुइ,
ह्रोदा ह्राङ्दान ज्याना लासि थाहा मुला 
ब्रिखेन ज्योज्यो प्रतीक ङेसुर बिसाम 
‘ल्होछार खाबान आरे,
ल्होछार खाबारि दातेनोन लेङ्बा मुला’ बिबान 
चुर्से फिह्युलरिक्यार दर्जनौं ल्होछार गेताङजुगुरि 
सोनाम ल्होछार, ग्याल्पो ल्होछार 
दिनि चे, लानि चे 
ओम तिथि मितिला ग्युइकादे बोलाबान 
कु ब्लासि ल्होछार दाङ्बाकेन मुला !

कुटिसि कुटिसि ल्होछारफिरि तिगाइ आपाङ्ना 
टुँडिखेलहेन्से फिह्युलदोना नानाआङा थेन ज्योज्योआलेजुगु 
ल्होछारला ज्याबाम्हान्बा बोलासिकेन
ल्होछार डाजाङजुगुरि ङ्हीरे सोमरे रे म्हुन आबिना 
ताङ्सिकेन गेताङ होस्ट लाचिबा मुला निरन्तर !

ल्होछार गेताङरि म्राङ्बा च्याखेनजुगुला भिडजुगुरि 
स्यान्दोन तोसोला ताङ्बा थेन उल्लास म्राङ्ला 
ह्राङ्लान मौलिक ङोसेबाला छ्याम 
गोइलोरि ज्योसि
ल्होछार व्हाइ कोबाकेन मुला 
क्रेप्सा स्याङ्सि स्याबाकेन मुला

चुनोन दुइरि हिन्ना, 
घेदुङला मोहन गोले ज्योज्यो 
थेन जगत दोङ ज्योज्योजुगु बिसाम 
टुँडिखेल ल्होछार कोप्तोनरि 
स्यान्दोसे ह्राप्बा डम्फुला तालरि 
ताल डिक्ना लाबारि व्यस्त म्राङ्ला 
ङादा छोर्बा मुबा,
ह्रोनि गोरङ्ही ज्योज्योजुगुसे 
ल्होछारला रे, चु रे
खाउ होइ आङा बिसि ङ्योइ स्ह्युसेला मुला
ङाला सेम जाजाकि ल्हिबाम हिन्ना 
मुतेबा ह्राङ्बा ल्होछारजुगुरि ङ्योइबा 
ज्योज्योजुगुसे चु दिङ तिल्दा आङ्योइनि बिसिमाम !

ताङ्बासेन मुसिम ल्होछारला दुइ
खाम्देदोना ङ्हुबा आखा 
म्हुना गुङरि ह्राङ नानाआलेला संवाद ताबाकेन लामा  
नेपाल टेलिभिजनला तामसोरबोन 
वीर बल तामाङ आले ज्युम ङेसि नाना, 
ल्होछारला ज्याबाम्हान्बा मुला जेक्खे बिला

जोङ थेन दुरीला हिसाबसे जाकि थारेङला 
तासाइ ङादा सेमला ङामला आङा डान्बा
ओखलढुंगाला अरुण गोले तामाङ ज्योज्योसे बिसाम 
फिह्युलरिन तासाइ नोन ङादा ङ्योइसिमाम 
ल्होछारला मोलम पिन्स्ह्युजि !

मुतेबा दिङ्ला क्यालेन्डररि ब्रिबा आन्सार
मुतेबा दिङ्ला लिच्छारिक्यार
छार छोन फोर्सि ल्होछारमि खासिन चिसेला मुला चुह्राङ्लासि
तासाइ ह्याङ्ला ओन्माला ज्योस्हेङला गिक्खेन चिनो 
जुगौँ जुगहेन्से म्हेमे आखेजुगुसे सोना लाथान्बा
पेङ्दोर्जेला चु डम्फु खाइमादोना 
स्यान्दोसे ह्राप्बा च्याचिसे ह्याङ ?
ओम, खाइमादोना स्यान्दोसेन ह्राप्बा 
डम्फुला तालरि स्याचिसे ह्याङ ? 
तिगा देन्बान डम्फु ह्राप्बा
ज्योस्हेङ नोन आरे ले ह्याङरि ?
तिगा ह्याङ्ला ह्राङ्लान ङोसेबा 
ह्राङ्लान संस्कार रिमठिम 
ओम ह्याङ्ला ह्राङ्लान रिमठिमकि 
ल्हो, गते, मिति, तिथि, बारला छ्याम 
म्हेमे मामजुगुसे स्होसि थान्बा ह्याङ्ला सभ्यता 
ल्होछारतेन तिगा दाते खासिचा 
ह्याङ तिगाइ आसेबा ताबा हिन्ना ?

(छिगकि दोनः स्याम्बा– सजिएको (बस्तुमा), बु– सास, बुन्बा– फेर्न, काप्तो– उत्सव, खेबाः– पुरानो, व्हना– तर्फ, ज्योस्हेङ– कला, ओल्गोङ– गला, फिह्युल– विदेश, ख्रेला– माघ, बेने– फागुन, ङ्योइबा– प्रश्न, थाङ्मो– विस्कुन, हेल्बाकेन– फिजाउँदै, चे– पात्रो, ज्योसि– सजिएर (मान्छेमा), छोन– रंग, रिमठिमकि– सांस्कृतिक)

दोःबा : यकिना अगाध