ङाला ह्युल तिरे ग्लोङ्सेला मुला
आहिन ङाला ह्युल दाते ग्लोङ्बाकेन मुला–
कुटिसि
गोल्छेसे,
तासाइ
कठोर निर्ममतापूर्वक ।

ग्लोङ्बाकेन मुला,
क्रान्तिला मिनरि 
दाज्र्यु थोबा छोङ्पा पार्टीजुगु
थेसे विचार आहिन
सत्ता थेन सरकार भोट किलोरि क्योइला
ब्लोनला लागि नाइबा आत्माजुगु चुङ्ला
चुरि पार्टीजुगु 
ह्युल्बाला दुःखतेन ग्यालठिपा लाला ।

ह्युल्बा राप्पुङ्ला
लाइनरि आहिन अपमानरि
कुर्सीरि चिबा कर्मचारी साप्तोमि आहिन
हाकिमला स्ह्रुगरि 
ह्राङ्ला तोसोसे कानुन चलाप लाला 
कर्मचारी टेबलरि 
ह्युल आहिन 
फाइल चिम्ला 
फाइलन्हाङरि
दररेट थान्बान
घुससे लिउला फैसला ब्रिला ।

नेता पाङ्ला– ‘धैर्य लाउ !’
कर्मचारी पाङ्ला– ‘ओइ ! ङ्यान्गोम न्हाङ्गार खाउ’
ङा खाइमादोना ब्रान्सि चिसे ?
कर्मचारी ह्युल्बाला 
मिख्लि, का थेन टुला कररि ह्राङ्ला केवा थेन दिमथेमे न्हाला 
मुतेबा आप्तारि 
ह्युल जाजाकार क्रोबाकेन मुला
मुतेबा नियुक्तिरि 
न्याय सिजिन्बा मुला ।

नेताजुगुसे
वाइडबाडी ग्लोङ्बा ह्युल हिन्ना
महाकाली ग्लोङ्बा ह्युल हिन्ना 
उद्योगजुगु ग्लोङ्बा ह्युल हिन्ना
सरकारी सा ग्लोङ्बा ह्युल हिन्ना
कान्डान कान्डासे ग्लोङ्बा ह्युल हिन्ना
स्यान्दो दोसि च्यानह्राङ ङ्होर्बा मुला
सहकारी ग्लोङ्बा च्यान
सिंहह्राङ ङ्होर्बा मुला
एमसीसीला मिनरि ह्युल ग्लोङ्बाजुगु 
चितुवासे ह्राङ दाउ सेबा मुला
सिंहदरबार, सर्वोच्च ल्होलो ख्राङ्बाजुगु
स्यान्दोव्हना फिर्बा मुला
साप्रा... साप्रा... साप्रा...
हिन्ना,
ङाला ह्युल तिरे ग्लोङ्सेला मुला 
जेक्खे आहिन
ङाला ह्युल चुन्छे दाते ग्लोङ्बाकेन मुला ।

व्यक्ति, पार्टीजुगु थेन कर्मचारीजुगु डिक्सिमाम
ह्युल्बादा मुर्ख स्होसि
चु ह्युलसे दारे आना 
चु ह्युलसे दारे आतेन
लुबाला काइजुगु थेन खोक्रो नाराजुगु 
ओम घुसला थाङ्जुगु 
खाइमा ग्लोङ्जिन्सेला मुला
थेकुनु ङाला ह्युल
थोमथोम च्यासि चिबा आहिन
थेकुनु भ्रष्ट प्रणालीरिन मे दोसेला मुला ।

२०८२/०९/१३ गते दिनिरे

(छिगकि दोनः दाज्र्यु– झण्डा, छोङ्पा– व्यापारी, ब्लोन– मन्त्री, ग्यालठिपा– राजनीति, साप्तोमि– सेवक,
स्ह्रुग– रुप, चिम्ला– थन्कन्छ, लिउ– भविष्य, आप्ता– निर्णय, व्हना– तर्फ, दिनिरे– आईतबार)

दोःबा : यकिना अगाध