पोखरा । नेपाल तामाङ घेदुङ गण्डकी प्रदेशला प्रदेशस्तरीय सोमछा फेल्बाकि चिसाङ २०८३ दुगु १० गते पोखराला बुद्धचोकरि मुबा रोयल दिदीबहिनी किचेनरि ताबा मुला । 
चिसाङ प्रदेश चोहो राम तामाङला चोहोदानरि ताबा चु गेताङरि ग्रेनडोन्बो धनप्रसाद तामाङ मुबा ।

ग्रेनडोन्बो धनप्रसाद तामाङसे तामाङ समुदायला सशक्तिकरणला लागि चिसाङ, प्रशिक्षण थेन सचेतनामूलक गेताङजुगु आउदिन तोबा पाङ्जि । छ्यामरि, नेपाल तामाङ घेदुङ दारे समुदायला लागि टुबादुइ दोना नेतृत्व पिन्बारि खाम्बा सक्षम नायक म्हाइचिबा उल्लेख लाबान सन्तबीर तामाङ थेन दामन पाख्रिन ह्राङ्बा निरन्तर नेतृत्व पिन्बारि खाम्बा व्यक्तित्व तोबा उन्पाङ्जि ।

संघीय घेदुङला छ्याचोहो कुमार घिसिङसे तामाङ समुदायसे ह्राङ्ला ग्योइ अनिवार्य स्ह्रुगरि पाङ्तोबारि बाङ पिन्बान ग्योइ नोन ह्याङ्ला ग्रेन ङोसेबा थेन बाङ ताबा पाङ्जि । थेसे ल्होछारहेन्छे तामाङ ग्योइ दिवस दोनाला तिथि–मिति स्हेङ्बारि घेदुङसे महत्वपूर्ण भूमिका क्लाङ्बा उल्लेख लाजि ।

वरिष्ठ स्यानचोहो रामकृष्ण ब्लोन तामाङसे ‘ह्याङ ङ्हाच्छा जाति, थेलिच्छा पार्टी’ बिबा धारणा प्रस्तुत लाबान समुदाय एकता अपरिहार्य मुबा पाङ्जि । थेसे नाम्सा बस्तीरि दोसि अभियान चलप लाबा थेन व्यक्तिगत हानि तासाइ नोन समाज थेन समुदायदा थुइबा गे जारी थान्सेला प्रतिबद्धता व्यक्त लाजि ।

स्यानचोहो दिपक वाईबासे घेदुङ न्हाङरि ग्यालठिपा प्रभावला ङ्यान्दि काक्ता म्राङ्बा उल्लेख लाबान गेन्दुनदा कोङ्ना लाबारि छार लि थेन छार सोच तोबा पाङ्जि ।

गाउराइ जयमान वाईबासे तथ्यांकरि तामाङ समुदायला संख्या च्याङ्ना म्राङ्बा बिबान वास्तविक संख्या दोब्ब बिमा ल्हाना ताखाम्सेला दाबी लाजि । छ्यामरि, रोजगारीला ङ्यान्दि स्यान्दो जातिला मिन प्रयोग लामा ह्राङ्ला मौलिक ङोसेबा थेन रिमठिम सोना लाबारि चुनौती मुबा उल्लेख लाजि ।

न्होरचोहो रुप योन्जानसे नेपाल तामाङ घेदुङला १० छा छेजोमछेन सफल स्होबारि मोक्कोन जोङ ओसेम प्रवासग्याम ल्हाना बिमा ल्हाना बोकिन्बारि सुनिश्चित लाबा दोन्ताला छ्याम ङ्योइसाङ पिन्बा मुबा । छ्यामरि, गोछापा दाम्बा प्रक्रियाफिरि नोन स्पष्ट लाजि ।

छ्यान्होरचोहो साबित्र गोम्जा ओसेम संघीय ह्रोमिजुगु बिलाम मोक्तान, शुकदेब घ्लान, सुन्दर थोकर, चन्द्र ग्याबाक, सुजन लामा, शुबास मोक्तानसे ज्याबाम्हान्बा सेमताम व्यक्त लाबा मुबा ।

गण्डकी प्रदेश न्हाङ्ला ल्होलो जोङ चोहोजुगुसे ह्राङ्ह्राङ्ला प्रगति विवरण प्रस्तुत लाबा मुबा ।

लिच्छारि, प्रदेश चोहो राम तामाङसे चिसाङ सफलतापूर्वक स्योल्बा कापाङ लाबान बोकिन्बा मोक्कोनदा थुजेछे ज्ञापन लाजि ।

(छिगकि दोनः फेल्बाकि– विस्तारित, चिसाङ– बैठक, उन्पाङ्जि– औंल्याए÷जनाए, छ्याचोहो– सहअध्यक्ष, स्ह्रुग– रुप, स्यानचोहो– उपाध्यक्ष, ग्यालठिपा– राजनीतिक, ङ्यान्दि– कारण, काक्ता– समस्या, गेन्दुन– संस्था, छेजोमछेन– महाधिवेशन, दोन्ता– उद्देश्य, ङ्योइसाङ– निमन्त्रणा, गोछापा– प्रतिनिधि, ह्रोमि– सदस्य, स्योल्बा– सम्पन्न, कापाङ– घोषणा)