उर्दी जारी मुला ओन्माहेन्से
ब्रिबारि बन्द लाउ
पाङ्बारि बन्द लाउ
सोबारिन बन्द लाउ
लिग आरेबा कुल्चिबा रेल ह्राङ्बा
क्रिप आरेना छ्योङ्चिबा म्हि ह्राङ्बा
गुलामी याजुगुसे
ब्रिचिबा बर्बर दस्ताबेज ह्राङ्बा,
चु दातेला काकार पन्नाजुगु
छ्योदे मुला केना लाबारि
ङ्योलोकला छार अध्याय ।
ओइ ह्युललान मोक्कोन बिमा काँतर म्हि
दिङ्छा हेन्से ए
याखारगि सत्ता
याखारगि अधिनायक
याखारगि तानाशाह
ङा दिङ्छा हेन्देला
याखारगि बिद्रोह
याखारगि ङ्योलोक
याखारगि युद्ध
जुगौहेन्सेला नीलडाम
एला सत्ताला कुइनेटोरि ब्याङ्बा याखारगि क्योङ ह्युल ।
कादेखाम्बा छेप्गो एला दुल्बाला फोहोराजुगु
कादेखाम्बा चलप लाउ सत्ताला कोर्राजुगु
ल्हागाब लाउ गु गु निषेधला मौसमी आदेशजुगु
ग्यार्जाछा छालजुगुसे छेप्सि छोन्बो युङ्बा ह्राङ्बान
सेबारि म्हाइना म्हाइनान
दोङरापला गर्तरि सोचिबा
ङाला डोबा दोङराप ह्राङ्बा,
मुला ङा न्हाङरि लुङ्चिबा पोरला व्हापव्हाप्बा ल्हाम ।
क्यासिमाम म्हुनदा ग्योइग्याम खाइमा आफेबा मुला दिनि
ब्योङ्सि खाइमा ब्लाप्बा मुला लाबा
ब्योङ्सि खाइमा जिन्बा मुला गान्दिला धारिलो स्युग ?
ह्युल एला संसद आहिन
लोकतन्त्र एला क्लाङ्बास्हे आहिन
याखारगि नुब्बा एला
याखारगि चुतिबा ङाला
मुतेबा बाङ ल्हागाब लासि थिगो दारेम लिच्छाला अस्त्र
एला अधिनायकत्वला कुङ क्युइना लासि
ब्रिसेला मुला दारे सोमछा दोङराप
छ्यापला छ्याप सत्ता ङ्हाप्बा लिब्रो
साजाम्बुलिङ तेत्थेबा बोमोसे
ध्वस्त तासेला मुला एला तानाशाही एक्सप्रेस ।
(छिगकि दोनः क्रिप– छाया, ङ्योलोक– आन्दोलन, दुल्बा– दमन, व्हापव्हाप्पा– भरभराउँदो, ल्हाम– लप्का, स्युग– बेग, नुब्बा– अन्त्य, चुतिबा– आरम्भ, छ्याप– खात, ङ्हाप्बा– चुसाइ, लिब्रो– बिरुद्ध)
दोःबा : यकिना अगाध
तपाईको प्रतिक्रिया दिनुहोस