आमा ए स्वर्ग निजि बिमुला बिबाजुगुसेम
तासाइ ए चु ख्यारख्युर मुला,
चुरिक्यार ङान्तेन छ्याम । 
चु ख्यारख्युर नोन मुला पक्कान ।
ङान्ना थोबोरि एला यासे
स्योम्चिबा छोर्बा मुला
तिगाइ न्हा तिगाइ मोलम पिन्चिबा मुला
एसे एला आमाग्याम थेबा स्वारापजुगु
ङान्दा ब्लेखु आम्हान्ना पाङ्चिबा मुला
एला नाबा क्योङ पाङ्चिबा मुला
ङान्दा डिक्सिमाम चिबारि लोप्चिबा मुला
आमा रातुला होनरि ह्राङ क्युना क्युना नोन
ङान्दा गुरिक्यार आङ्चिबा मुला
म्हान्मुला दाते नोन
चुरेला ह्रिग्याम छेला ग्रेन दोइ
फोइदान सेम्चेनला लागि
ह्राङ्ला वजन बिमा ग्रेन दोइ बाचिबा मुला । 
आमा एला ब्लाप्बा खाराङ्बा मुबा !
खाजिबा दुइ ब्लाप्मुबा ङान्छे थाहा आयाङ्नि
एदा फोख्रेन्मुबा व्हा आख्रेन्मुबा 
ङान्छे खाइमाइ थाहा आयाङ्नि 
जेक्खे एसे ङान्ना फोख्रेन्बा म्राङ्जि
फोख्रेन्जिमा हेन्से
योना योना कुदापरि व्यस्त तासि
ङान्ना फोख्रेन्बा म्हाना लाबारिन आँतुर तामुबा । 
आमा !
एदा एला ह्रोजुगुसे दातेनोन बिमुला–
‘आउदिन असल मुबा पाक्कान स्वर्गरि सुख याङ्बा मुसिम !’
तासाइ ङान्छे म्हान्बा मुला स्वर्गला लोभ एसे आलानि 
ङान्ना ख्यारख्युर ङान्ना ह्रावा कवज दोसि
चु जाम्बुलिङरिन चिचिबा मुला
छायाछुयादा क्लाङ्चिबा मुला । 
एला दुइला रापरि दुइ आन्सार परिमार्जन लासि
‘भिडिओ गेम आक्लाङ्गो’
‘फेसबुकरि दुइ आब्याङ्गो’
बिसिमाम नैतिक ग्युइसेर लोप्चिबा मुला !

तापाग्रेन ९ गते २०८०

रातुबाहुनमारा मिथिला न.पा., धनुषा ।

(स्वाराप– दन्त्यकथा, नाबा– भोगाइ, होन– भेल÷बाढी, क्युबा– डुब्नु, सेम्चेन– गाइबस्तु, ह्रावा– रक्षा, छायाछुया– नातीनातिनी, ग्युइसेर– शिक्षा, तापाग्रेन– मंसिर)

दोःबा : यकिना अगाध