छिगरि ब्रिसि आजिन्बा
व्हाइला लयरि कोसि आथुम्बा
केवाला बेनान मोडजुगुरि
चेगाइ थेन भारोसा डेला बिसि
जेबा देन्बा केवादा
तान्बाफिरि लिउ म्राङ्बान
मिला नानीदा ह्राङ्लासि
तिगाइसे ब्लोजि बिसाम मिख्लि ताइला
खानाङए ताइजि बिसाम
नाकाके ह्राङ थिला बिसिमाम
तान्बाला फोक्ख्रेन्बादा फ्याबारि
मेसिन ह्राङ लासि चलप लाबान
प्राकप्राक थिबा 
थे यासे स्योम्बान 
लक्का जवान 
दोबा तान्बा नोन 
मिला ङ्हाच्छा सातान
बिजा ह्राङ्नोन म्राङ्चिबा
डान्चिबा
कल लाचिबा
सेम कोरचिबा
आमाला चेगाइ हिन्ना ।

ज्याबा गे लागाइ
व्हा आज्याबा
आमाला लागि तान्बा
ओत्तेबान चेबो
मिला नानी हिन्ना
सिबामि तिरे सिनोन तोला
अजम्बरी खालाइ आरे
छोन्बो मुतेदोना
खाम्ला सुख पिन्गो
आखाम दुख आपिन्गो
स्हिवाङ थान्बा
व्हा आथान्बा
तान्बा एफिरि भारोसा ।

आमाला म्हाङ ग्रेन आता
ह्राङ्ला तान्बा खुसी म्राङ्बान
युद्धतेन लडतिसि
जाम्बुलिङ डाबा हिन्ना
तान्बा तिगाइ नाबा 
ङ्हाच्छान
ङ्हे स्हुखाबा संकेतसे
थाहा याङ्बा
विज्ञानदा चुनौती पिन्बा
आमा हिन्ना 
थेसे क्योङ केवा 
फुल्बा 
आमाला भरोसा
थालथेल ताबा ल्हुइसे
तान्बाला  साहारा 
म्हाइचिमा
वृद्ध आश्रमदोन दोसि
मिला नानीग्याम थारेङ चिसि
मिख्लिरि क्याल्बा
दोप ताना लाबा
छोन्बोन छेन्देह्राङ स्होबा
तान्बासे नोन तिनिलान रे
स्ह्युल च्याबा रेला मोलम लाचिमा
ल्ुहइला बिमा
तान्बाला चेगाइसे
सहज नोन स्विकार लासि
खाम्बान मुला ?
तिगा चाजि ? 
तिल्दा ज्युइजि ? 
पिर आलाउ ङाला 
ङादा ज्याबान मुला बिसिमाम
मैन नाङ्साल ह्राङ्नोन
ह्राङ् क्रोसि नोन
ह्याल पिन्बा
दयाला खानी 
चेगाइला खानी 
करुणाला खानी
जाम्बुलिङरि म्हाइसि
ग्लुसि आयाङ्बा
अमुल्य महान आमा हिन्ना आमा !

(छिगकि दोनः केवा– जीवन, जेबा– सुन्दर, देन्बा– सत्य, लिउ– भविष्य, तान्बा– सन्तान, प्राकप्राक– चिराचिरा, स्योम्बान– सुमसुम्याउँदै, बिजा– बालक, चेबो– प्यारो, स्हिवाङ– शान्ति, नाबा– बिरामी, क्याल्बा– पौडिनु, छेन्दे– लास, मोलम– कामना)

दोःबा : यकिना अगाध