नुवाकोट । ‘ग्योइ थेन रिमठिम ह्याङ्ला ङोसेबा, ग्युबा थेन दोङराप म्हाइबा ह्याङ्ला अभियान’ बिबा नारादा सार्थकता स्होबारि जाम्बुलिङनाङ ठाम्सि चिबा तामाङ जाति न्हाङ्ला ग्लानजुगुला पुख्र्यौली बाप्सा नुवाकोट गोल्फु नम्सापुरानरि विशेष गेताङ तासेला ग्रा मुला ।

खाबा दुगु १८ गते ग्लानजुगुला बाप्सा दुप्चेश्वर गाउँपालिका वडा नं. ४ ला गोल्फु नम्सापुरानरि स्हेङ्सि जिन्बा रिमठिमकि दिमग्रेन ‘ग्लान ङारदिम’ ला ठ्वाङ्सेन थेन ग्लान समाज नेपालला गिक्छा ग्याल्साङ जोम्नाछेन ताइ लाबा मुला ।

ग्लानला दोङरापकि ङोसेबा थेन पुख्र्यौली बाप्सादा सोना लासि थान्बा दोन्तासे स्हेङ्बा ‘ग्लान ङारदिम’ संग्राहलयला स्ह्रुगरि ङ्हाच्छा बोर्सेला तामुला ।

ङारदिम स्हेङ्बाला लागि ङ्हाच्छाला रिमठिम पर्यटन ओसेम नागरिक उड्डयन ब्लोन हितबहादुर तामाङसे संघीय सरकारला बजेट विनियोजन लाबा मुबा । ङारदिमदा संघीय सरकारग्याम ९० बुम थेन दुप्चेश्वर गाउँपालिकाग्याम ९ बुम न्होर ह्रो लासि स्हेङ्बा जिन्ना लाबा मुबा ।

आयोजक दाछोकला थुछापा अर्जुनबहादुर तामाङला आन्सार जोम्नाछेनसे जाम्बुलिङनाङ ठाम्सिमाम चिबा ग्लानजुगुदा गिक्खेन सूत्ररि खिबारि थेन ह्राङ्ला पुख्र्यौली बाप्साला ख्युरछ्या ल्हेछ्या लाबान रिमठिमकि धरोहरला ङोसेबादा कोङ्ना लाबा दोन्ता थान्बा मुला ।

(छिगकि दोनः ग्याल्साङ– राष्ट्रिय, जोम्नाछेन– सम्मेलन, ग्युबा– वंश, ग्रा– सूचना, रिमठिमकि– सांस्कृतिक, दिमग्रेन– भवन, दोङरापकि– ऐतिहासिक, दोन्ता– उद्देश्य, स्ह्रुग– रुप, ब्लोन– मन्त्री, बुम– लाख, दाछोक– समिति, थुछापा– संयोजक, ख्युरछ्या– संरक्षण, ल्हेछ्या– संबर्धन)