छारिब्योनजुगुसे घ्याङलेखरि गिक्छा जेन्जी कप आयोजना लाजि
सिन्धुली । घ्याङलेख गाउँपालिका, सिन्धुलीरि छारिब्योनजुगुसे आयोजना लाबा गिक्छा ‘जेन्जी कप’ क्लाङ्छ्योङ प्रतियोगिता सफलतापूर्वक स्योल्बा मुला ।
प्रतियोगितारि फुटबल व्हना घ्याङलेख गाउँपालिका–३ तामाजोरला तेरी एफसी डाबा मुला बिसाम भलिबल व्हना वडा नम्बर–२ हायूटारला हायूटार युवा क्लबसे डाबा मुला ।
दुगु ३ गते ताबा फुटबलला फाइनल क्लाङरि तेरी एफसीसे वडा नम्बर–४ ला जिएफसी गोपे छोक्बादा पेनाल्टी सुटआउटरि ६–५ गोल फेबासे ब्रेना लाबान उपाधि डाबा हिन्ना । निर्धारित ६० मिनेटला क्लाङरि गोल आताना च्योच्योरि थुम्मा हेन्से पेनाल्टी ग्याम डाबा दाम्बा मुबा ।
भलिबलला फाइनल क्लाङरि हायूटार युवा क्लबसे सर्लाहीला टोलीदा ब्रेना लाबान उपाधि डाबारि सफल ताजि ।
फुटबल व्हना डाबा तेरी एफसीसे नगद ४० तोङ्जा रुपैयाँला छ्याम शिल्ड थेन मेडल याङ्बा मुबा बिसाम स्यानडाबा जिएफसी गोपेसे नगद ३० तोङ्जा रुपैयाँला छ्याम शिल्ड थेन मेडल याङ्बा मुबा ।
भलिबल व्हना डाबा हायूटार युवा क्लबसे नगद ३० तोङ्जा रुपैयाँला छ्याम शिल्ड थेन मेडल याङ्बा मुबा बिसाम स्यानडाबा सर्लाहीला टोलीसे नगद २० तोङ्जा रुपैयाँला छ्याम शिल्ड थेन मेडल डाबा मुबा ।
छार दिङ २०८३ ला दुइसाङरि प्रगतिशील युवा समाज, घ्याङलेख गाउँपालिकासे प्रतियोगिताला आयोजना लाबा हिन्ना । समाजला चोहो छिरिङदोर्जे लामाला चोहोदानरि स्योल्बा गेताङरि गाउँपालिकाला स्यानचोहो शंकरमान घलानसे डाबा टोली थेन क्लाङमिजुगुदा पुरस्कार बोठाबा मुबा ।
(छिगकि दोनः क्लाङ्छ्योङ– खेलकुद्, स्योल्बा– सम्पन्न, व्हना– तर्फ, क्लाङ– खेल, छोक्बा– समूह, तोङ्जा– हजार, स्यानडाबा– उपविजेता, स्यानचोहो– उपाध्यक्ष, क्लाङमि– खेलाडी)
तपाईको प्रतिक्रिया दिनुहोस