छार दिङ खासि नोन निजिन्जिम थाहा नोन आतानि !
ङादा खेःबा–खेःबबा स्होसिकेन 
ए छार दिङ दोसिमाम
फ्लिक दोसिमाम
दुगु ला दोसि खाजि । 
ल्हानान ल्हानान दिङजुगुला लागि स्होबा
चिला पानाजुगु डेजि
केवाला ल्हामदा तुन्ना लाजि
काम्बा–केकेबा अनुभुतीला ब्रोइजुगु म्ह्याङ पुङ्जि
केवादा गोबा कोसिसजुगु लाजि
दुःखला जंघार वाइजि
सुखला खर्कजुगुरि केवा न्हासिमाम
ए दोसि छार दिङ दोसि खाजि
ङादा खेःबा–खेःबा स्होसिकेन ।

ल्हागाङला कुरि
बषन्तला बहारतेन ङोसिकेन
वाफ्युर पाडाम्हेन्दो सार्जि
थाक स्योङ्ला चाङ्बा क्युइ
कालीला नुब्बा गर्भला ग्याम ताबान
गंगादा स्याप्बारि निरन्तर ब्योङ्चिजि
ङा कुनिरि थोमताचिजि
ए दोसि
छार दिङला छार अंक थोसि
फ्लिक दोसि खाजि । 
छार दिङ.....
केवासे जवानीदा ख्लासि जिन्बा मुला । 
उर्जाशील गाबोला छोनजुगु
गोल्छे गोल्छे फिक्का ताबा
छोर्बाकेन मुला । 
ए दोसि छार दिङ दोसि खाजि
ङादा खेःबा–खेःबा स्होसिकेन ।

छार दिङ !
नाम्दुङ लाला लिच्छाला म्हुन
ङादा सेम आनिबाजुगु
ङादा सेम निबाजुगु
ङादा घृणाला दृस्टिकोणसे च्याबाजुगु 
ङादा सहानुभूतिला मिसे म्राङ्बाजुगु
पटके ह्रोला खोल न्हान्बाजुगु
केवाद सोसि थान्बारि लोप्बाजुगु 
केवादा न्होङ्ना लाबारि गाबो पिन्बाजुगु
मोक्कोन मोक्कोन खाजि
खालाइसे गोसिमाम छार दिङला व्हाइ कोजि
खालाइसे आगोना नोन गोबा ह्राङ्बा दोसिमाम
ज्याबाम्हान्बाला व्हाइ कोजि । 
चुह्राङ्नोन लासि ए छार दिङ दोसिमाम
कात्ते ल्हाना रेम ङाला केवारि खाजि
ए नोन खेःबा दिङजुगु दोसिमाम
ङाला केवाला साक्षी दोसि
ङाला डान्बाला धरोहर दोचिजि
ङा एला छार जेबोला छ्यामरि
सोबा कोसिस लाचिजि । 
दिङ ए छार दोसि खाजि
ङादा खेःबा–खेःबा स्होसिकेन ।

पाँचखाल –११, काभ्रे, दातेः लिमासोल, साईप्रस ।

(छिगकि दोनः खेःबा– पुरानो, दुगु– वैशाख, चि– पात्रो, केवा– जीवन/जीन्दगी, ल्हागाङ– पहाड, सोसि थान्बा– सम्हालेर राखेको, ल्हाम– यात्र, गाबो– उत्साह, जेबो– उमंग, छोन– रंग, नाम्दुङ– चैत्र)

दोःबा : यकिना अगाध