तिनि स्ह्योरि झ्याल ठ्वाङ्जि– मु ओस्बान मुबा, पिङ थेन स्हिवा । तासाइ यारि चुङ्बा मोबाइलसे स्यान्दोन जाम्बुलिङ उन्चिबा मुबा– म्युगु, फ्रेबा, क्रिङ्बा । छिगजुगु चुह्राङ्बा छोर्मुबा, बिले तिङनोन ताइचिबा मुला ।
‘युद्ध दोसि चार्काप ताजि ।’
‘इन्धन आडुप्बा गम्भीर...’
सेम न्हाङरि सिम्बा फेल्जि । ङा माङ्ग्यार थोन्जि । सडक कुनिरि ह्रेङ्बा लाइन मुबा– पेट्रोलला लागि । लिजुगुरि ब्लाप्बा जेक्खे आहिन, याखारगि तोसोला असहाय ब्रान्बा फ्लाक्बा मुबा ।
खिम्जे आकुला जाजाबा छोङ्खाङरि दोमा रेडियोसे दोसि थेनोन राप पाङ्चिबा मुबा ।
आकुसे सा बुन्सि पाङ्स्ह्युजि– ‘जाम्बुलिङ न्होङ्बाकेन मुला, तासाइ म्हिसे म्हिदा ख्लाला आदे ।’
ओतेबारिन याखारगि जाजाबा केटो खाजि, यारि खेःबा बोतल ।
‘आकु, जाजाकि मट्टितेल याङ्ला ?’
आकुसे ह्रेच्छाक सोचतिजि । न्हाङरि स्टक दान्नाइ जिन्बा मुबा । तासाइ ह्रोसे तिगाइ आसुङ्ना बोतल प्लिङ्ना लास्ह्युजि ।
‘दिमरि नाङ्साल सिना लापुङ्ला आदे’, ह्रोला काइ स्हिवा मुबा ।
केटोला लि ह्याल ताजि– थे ह्याल, खाजिबाइ बिजुलीबिमा ह्याल छोर्जि ।
ङा फ्लिदोसि खामा ग्यामरि याखारगि आमा ह्राङ्ला लाइनुदा कुरि थान्सि गोल्छेसे लोरी कोबाकेन मुबा । ख्यारख्युर चिन्ता मुबा, आडुप्बा मुबा तासाइ थे काइरि अचम्मला डुइ मुबा । थेसे ह्रेच्छाक जाम्बुलिङदान थेन्ताना लाजि ।
थे दुइरि छोर्जि–
स्हिवा सायद खाजिबाइ थुन्च्यास्यो आहिन, न्हा ओम ग्रेन भाषणरि । चुमि चुनोन जाजाबा गेजुगुरि सोचिला । आडुप्बारि नोन बोलाचिबा यारि, लोङ्बाला गुङरि नोन ज्युमङेबा साहसरि ।
जाम्बुलिङरि दातेनोन स्हिवा आरे । तामसोर दातेनोन क्रिङ्चिबा मुला । तासाइ सेमन्हाङरि याखारगि जाजाबा नाङ्साल लुङ्जि ।
थेसे बिला– ‘दोप कात्तेन नुप्बा तासाइ नोन, मानवता आसि ।’
मिरिक, दार्जीलिङ, भारत ।
(छिगकि दोनः स्हिवाङ– शान्ति, स्हिवा– शान्त, आडुप्बा– अभाव, फेल्बा– फैलिएको, तोसो– किसिम, खिम्जे– छिमेकी, छोङ्खाङ– पसल, खेःबा– पुरानो, थुन्च्यास्यो– सम्झौतापत्र)
दोःबा : यकिना अगाध
तपाईको प्रतिक्रिया दिनुहोस