तिल्मा थे कोन्ज्यो ला
ह्युलरिर वाङ्मा हिन्दे
ङाला गोर्कि काङ क्युइजि
या क्युइजि
म्हुक्कि क्राबा कोलाला
‘आपा ! आपा ! आपा’ काइसे
ङाला तिङ क्युइजि
ओइमा सिम्बु खास्योररि
डाम्फु ङ्हाच्छा थान्सि
फापर ह्वाइरि
कात्तेन दुङाल खासाइ
छ्याम चिला
छ्याम प्रला सुङ्बा
तिनि ङादा म्हाङ ताजि
ङादाइ म्हान्बा
ज्याबालचिबिल नामे ह्राङ
ङेसि ङोसि साप्रा थोसि
ज्याबा तिङ्ला दिम स्होबा ।
थाहा ताजि–
प्राङ्बोला
न्हा सेम ताला न्हा रहर
थेन दुङाल ताला
ग्रेन ग्रेन डुइ ताला
ख्राङ्गरि क्राजिबा
तार लुङ्दार म्राङ्मा
एसे ङ्योइला व्हा
सेमरि म्हान्बा मुला
ह्वारि बुरि सार्चिबा
नामनाम म्हेन्दोसेन
एदा ङ्योइबा मुला रो
ह्याङ्ला सिन्सुरले पाङ्बा
तिनि ङाला सेम
क्राबा मुला पाराङ
एदा डान्सि,
गोर्कि सेमसे बिला
बेल्बो गोनेला गान्दिरि
फाल पुङगे
गोर्कि सेम
तिङ, का चुङ्सि नोन
कोलादा ग्रेन स्होतोला बिला
ङाला पाराङ
ङादाइ छ्याम बोर्गो एतेन
ङाला तिङ क्रोबा मुला
स्वाबा मुला एदा डान्सि
नाम्सा दिमरि डम्फु ह्राप्मा
लामासे ङ्हा, ग्यालिङ ह्राप्मा
ङाला सेम स्हुखाला
ओइ कोन्ज्यो
ङाला पाराङदा
स्यान्दो कोन्ज्यो ह्युलरि
खाइमाइ आसिबा
कोको म्हेन्दो स्होउ ह्या
कोको म्हेन्दो !
मण्डन देउपुर न.पा–०१, काभ्रेपलान्चोक ।
तपाईको प्रतिक्रिया दिनुहोस