माफ ह्रिबा छिग
गाङ्साल खाजि
एसे पुइगाबा हिगे ह्राङ
तासाइ ङानोन डान्सि क्योङ्नोन खेजि ।
एसे पाङ्बा ह्राङ
खिबा या मुबा हिन्साम
ओराङ्बान परिबन्धरि मुबा ङाला यानोन
बिनोन तोमा ह्याङ ङ्ही
ह्राङ ह्राङ्लान विचारला च्युप्खाङरि च्युप्पा मुबा ।
एसे अपुइगाबा चेकाइला हिगे
श्रद्धासे खेसिटिबा सेम
मुतेबान छिग खेबा न्हाङरि
म्हाइबा मुबा एला मिन
तासाइ एमि परिबन्धरि मुबा
म्हान्बा मुबा ङा ग्यामनोन
थार्बाला उच्छबास ।
एसे दाम्बा ग्याम
एला जेक्खेन आरेबा
क्रिप दोसि ङा थेरिक्यारनोन लिछा मुबा
ह्याङ गिकसेम गिकग्याम थारेङ आतासाइ
ह्याङ ग्यामसेन ह्याङ म्हाबा मुबा ।
एसे दाम्बा ज्युम नेबा
ङाइ एला मिग दोना, दोना लाबारि आखाम्जि
पहरासे काबारि आखाम्बा मुबा
ह्याङ ङ्हीलान आँट खालाङरि ग्योइबा मुबा
मुरि फ्याङ्बारि आखाम्ना ।
ए ! ए न्हाङरिन ब्लुम्सि टिमा
ङा कुनिरि राप्सि
एदान डान्सि टिबा मुबा
तासाइ थे काइकादे
ह्याङ न्हाङ्ला नाबेङसे थेबारि खाम्बा आरेबा ।
एसे एदान च्युप्पा म्हि स्होजि
ङा ठ्वाङ्बा स्हे पुइसि राप्सि टिजि
तासाइ म्राप ठ्वाङ्बा आँट
ह्याङ ङ्हीतेन आरेबा ।
दारेम एसे पाङ्जि– ‘माफ लासि पिन्गो’
ङाइ पाङ्ला
माफ मि थे दुइरि पिन्ना
खाइमा एसे एदान माफ लाबारि खाम्ला ।
तिल्दा बिसाम
ह्याङ फेबा आहिन
ह्याङ दातेनोन
थेरिन खालाङरिन
गिक्सेम गिकदा ह्रुप ताबा ग्यामरिन मुला ।
२२ नाम्दुङ २०८२
तपाईको प्रतिक्रिया दिनुहोस