खाइमा जुला
खाजिबाइ दाङ्बोला नगरला वाङ्बा म्रापला युङ्बा तिबा ग्यालाम
ङा वाङ्बाकेन लाबा थे नाम्साला मेग्याम
ङाला आपा थोन्बाकेन लाबा छोर्सिमाम विचलित ताला ।
आपा डान्मा
ङाइ डान्ना
युङ्बा तिबा गल्लीजुगु
ईँटा तिबा गल्छेडाजुगु
जलबिन्दु, काडि, पुइमु पुइमु के
ओम थोबोनाङ ग्लिङम्हेन्दो
नाबा नासिमाम अप्ठ्याराजुगु
फलैँचारि ब्लाप्बा न्हाबा आपा,
थेसे ब्राबाकेन लाबा ग्यालाम
सोझो छोर्मुबा, सरल छोर्मुबा
आरेमुबा कुङ्गिल, ग्याम ङ्ही–ग्याम ब्लि आरेमुबा छोर्मुबा
फेबाकेन लाबा दिनिला स्युग मुबा
नुप्के लाबा दिनिला गोङ्मा दाङ्बारि
ओम तिक्खुरि स्याप्सिन ख्लाबारि
खाजिबाइ चिन्ताला नुर नोन मि आरेमुबा
आपा ब्रासिकेन ब्रास्ह्युजि
ङा कोल्चिजि ।
ङाइ ग्लिङला ङ्याम्बा म्राङ्बा मुबा
ओम नाबा मुबा कठोरता नोन
तासाइ ग्लिङ ह्राङ ङाला आपाला ङ्याम्बा थेन कठोरता न्हाङरि
ङाइ खाइमाइ म्राङ्बारि आखाम्नि क्युइ
दारेम खाइमाइ म्राङ्सेला नोन आरे
थे युङ्बा तिबा गल्लीजुगु
ईँटा तिबा गल्छेडाजुगु तासिकेन ब्योङ्जिन्जि....।
ङाजा लेपतापस फ्लाक्सि चिमाहेन्से
आपाला मधुमेह, उच्चरक्तचाप थेन केकेबा केकेबाला रहर
ङाला कठोरतारि, ङाला ङ्याम्बारि
ओस्सोन गाप्बारि चुबा मुला क्युइ
भूमिगत कुला कुलेसाला कलकल काइ
ङ्यान्बा फुर्सद खाल्दा ?
खाजिबाइ दुइला ङा थेन ङाला व्यस्तता
दारे ल्हेबा मुला
ङाला तान्बाजुगु ह्राङ्ला जाम्बुलिङ राबारि व्यस्त मुला !!
आपा निमाहेन्से
ङादा चु दाङ्बोला नगरला रेकिगेजुगु
आपाला ह्राङ्बा छोर्बारि चुबा मुला
ख्लाबा दाङ्बोला नगर ङा ह्राङ्नोन
आपा ह्राङ्बान छोर्बारि चुबा मुला
थाहा मुला
छ्योङ्ना छ्योङ्नान ङाला क्रिपसे
दारे तिरेकुनु
नगरला वाङ्बा म्रापरिन स्याप्सेला मुला ह्राङ्दा टुस्याल
ङा बिसाम प्योल थोन्सि जिन्सेला मुला
थेनोन दाङ्बोला नगरला मेला ग्यालाम !!!!!
(छिगकि दोनः कुङ्किल– घुम्ती, स्युग– तेज, नुर– विषय, नाबा– भोग्नु, तान्बा– सन्तान, रेकिगे– दैनिकी, टुस्याल– असिनपसिन)
दोःबा : यकिना अगाध
तपाईको प्रतिक्रिया दिनुहोस