ह्याङ्नोन हिन्ना
तिनिला दुइला बामरि
न्हाङ्गारला ह्याल पुइसि ब्राबा छारिब्योन,
दोङरापला क्रिप आहिन ह्याङ
दोङराप ब्रिबा या हिन्ना ।
मोबाइलला पर्दान्हाङरि डुङ्बा
म्हाङ जेक्खे आहिन ह्याङ्ला,
थेनोन पर्दाग्याम
जाम्बुलिङ गोबा मि नोन ह्याङतेन मुला ।
ग्राला भीडरि
देन्बा दाम्बा विवेक
तिनिला मोक्कोन बिमा ग्रेन बाङ हिन्ना ।
ह्याङ ब्लाप्बारि खाम्ला,
तासाइ ब्रेबारि लोप्बा आरे ।
निराशाला धुलो ल्हागतिसाइ नोन
आशाला बु दान्तेनोन लेङ्बा मुला ।
तिल्दाबिसाम मुतेबा युग
छारिब्योनलान विश्वासरि जुसि
ङ्हाच्छा वाङ्बा मुला ।
जात, ग्योइ, धर्म, गोइलो
ह्याङ्दा फेबारि आहिन,
ह्याङ्दा थुइबा चाम दोगाइ ।
घृणाला ग्यालठिपा आहिन,
मानवताला रिमठिम
ह्याङ्से दाम्तोला ।
डोबा जेक्खे प्रमाण स्योला लागि आहिन,
ग्युइ जेक्खे रोजगारीला लागि आहिन
डोबा मि
समाज गोबा मि हिन्ना,
ग्युइ मि
अन्यायतेन छेबा हिम्मत हिन्ना ।
ह्युल खाजिबाइ नक्सारि सीमित आहिन,
ह्युल मि
आमाला टुरि,
आपाला थिबा यारि,
सानाम्पाला डेबा काङरि
ओम मजदुरला प्राक प्राक थिबा गोरि सोचिबा मुला ।
चोदे ह्याङ मौन चिजि बिसाम
अन्यायसे ताम पाङ्ला,
चोदे ह्याङ म्हेर्जि बिसाम
लिउ क्राचिला ।
थेतासि रेगो, ओइ छारिब्योन
ङ्योइबा लाउ, सोचतिउ ओम ग्युरपोबा दोगो ।
तिनि याखारगि जाजाबा गोङ्मा
न्हाङ्गार ग्रेन क्रान्ति दोखाम्ला ।
तिल्दाबिसाम डान्गो,
न्हाङ्गारला दोङराप
तिनिला छारिब्योनला
चेतनाग्याम नोन केला ।
मिरिक, दार्जीलिङ, भारत ।
(छिगकि दोनः सानाम्पा– किसान, लिउ– भविष्य, ङ्योइबा– प्रश्न, ग्युरपोबा– परिवर्तन)
दोःबा : यकिना अगाध
तपाईको प्रतिक्रिया दिनुहोस