तामाङ डाजाङ स्योस्यो ङाला तिङ्ला ब्रेल्बा
डाजाङ जेक्खे याखारगि स्योस्यो आहिन,
चु ङाला तिङ्ला धड्कन हिन्ना ।
चुरि छिगजुगु जेक्खे हिगि दोसि आहिन,
आत्मा दोसि ब्योङ्ला ।
खाइमा ङाइ गिक्छारेम डाजाङला पानाजुगु ओर्जि,
थे जेक्खे डोबा आरेमुबा–
थे ह्राङ्लान ङोसेबा छ्यामला पुनर्मिलन मुबा ।
छोर्मुबा, म्हाबा ग्योइ
दोसि ङादा कु ख्वाइबाकेन मुला ।
ह्याङ्से खाइमाइ ब्रिबारि आम्याङ्बा राप,
ह्याङसे नाबा तासाइ पाङ्बारि आखाम्बा स्हेर,
ह्याङ्ला नाम्सा, ह्याङ्ला रिमठिम, ह्याङ्ला दोङराप–
मोक्कोन डाजाङला हिगिरि छोन्बो मुला ।
खालाइसे बिला–
चु याखारगि लाला तिरेम थोन्बा स्योस्यो हिन्ना ।
तासाइ ङाला लागि,
चु ङाला अस्तित्वला दस्तावेज हिन्ना,
ङाला ग्योइला बु हिन्ना,
ङाला रिमठिमला ऐना हिन्ना ।
खाइमा–खाइमा ङाला ग्योइ लिपख्वाइला,
डाजाङ ह्याल दोसि दाराप्ला ।
खाइमा–खाइमा ह्याङ्ला ङोसेबा कमजोर ताला,
डाजाङ काइ दोसि ताम पाङ्ला ।
चुसे ङादा ब्रिबारि लोप्जि,
सोचतिबारि लोप्जि,
ओम मोक्कोन बिमा ग्रेन ताम–
ह्राङ ताबाला गर्व लाबारि लोप्जि ।
तिनि ङा खानाङ मुला,
ङाला चेतनाला याखारगि बो
डाजाङलान पानाजुगुग्याम स्होबा मुला ।
थेतासि ङाइ पाङ्खाम्ला–
डाजाङतेन ङाला ब्रेल्बा
डोखेन थेन स्योस्योला जेक्खे आहिन,
चुमि तिङ थेन बुला ब्रेल्बा हिन्ना ।
डाजाङ छोन्बो चिगाइ,
तिल्दाबिसाम चुरि ह्याङ्ला दोङराप सोला,
ह्याङ्ला दातेला दुइ पाङ्ला,
ओम ह्याङ्ला लिउला म्हाङ म्राङ्ला ।
ललितपुर ।
(छिगकि दोनः ब्रेल्बा– सम्बन्ध, ङोसेबा– पहिचान, नाबा– भोगेका, स्हेर– पीडा, बु– स्वास, बो– हिस्सा, लिउ– भविष्य)
तपाईको प्रतिक्रिया दिनुहोस