“जेबा ! जेबा !! ए खालाङ निबारि ?” आमासे जेबा दिमग्याम थोन्बा दुइरि ङ्योइस्ह्युजि ।

“आमा, ङा आलेकादेदा ह्रुप ताबारि निजि ह्या ?” ओते बिसि जेबा आमासे ङ्योइना ङ्योइनान दिमग्याम राङगारि निजि ।

जेबा ५ डारि डोबा जात्तुकु हिन्ना । जेबादा नागिकादे सेम निमुला । जेबासे मोक्कोन ग्यामला नागिकादेदा ह्राङ्लान आलेदा ह्राङ्लासिन चेगाइ लामुला । सात्तानह्राङ जेबा तिनि नोन आलेकादेदा ह्रुप ताबारि दिमग्याम थोन्जि । जेबादा  म्राङ्सि थे ग्लाला नागिकादे जेबाला ओन्साङ मे ह्योङ्सि, ले फिक्र्याप तेसि, ताङ्सि खाजि । जेबा नोन आलेकादेदा म्राङ्सि फुर ताङ्जि ।

जेबाला ग्राम्बारि नागिकादेसे चेकाइ लामा जेबा ल्हानान ताङ्जि । जेबाला आमा बिसाम जेबाला चुराङ्बा ह्रिक्पासे लासि ल्हानान बोमो रेबा मुबा । जेबा दिमरि खाजि । सात्तानह्राङ आमासे जेबादा क्रिङ्जि, “जेबा, एदा कादे पाङ्तोबा ? थे ग्यामला नागिकादेतेन छ्याम आक्लाङ्गो बिसि ?”

“आमा, नागि आबिउले । थेनिकादेमि ङाला आले हिन्ना ।” जेबासे आमादा कासाल पिन्जि ।

“चु छाउरादा तिलाइ लाबारि आखाम ङाइ ।” ओतेबिसि आमा दिगु स्होबारि बिसि कानस्होबा कोठारि निजि ।

जेबाला आमा जेबाला ह्रिक्पासे लासि ल्हानान दुङाल किन्मुला । “ग्यामला नागिकादे चाङ्मा आता, नोइ कोला ।” बिसि जेबादा नागिकादेतेन छ्याम आब्राउ बिमुला । जेबाबिसाम आमासे तिल्दा ङाला आलेकादेदा चेकाइ आलाबा मुला बिसि सेमन्हाङरि आज्याबा म्हान्सि या ख्रुसि टिला । जेबा या ख्रुसि आङ्सि स्होबा कापिरि ह्राङ्सेन स्होबा आङ्सि च्यासि टिला । जेबासे ल्हानाह्राङ्बा आङ्सि ह्राङ्सेन म्राङ्बा नागिकादेला स्होबारि सेम लामुला । जेबासे जात्तुकुहेन्देन आङ्सि स्होबारि सेम लाबा हिन्ना । आङ्सिरि जेबासे खाइमा ह्रुप ताबा, नागिला ह्रिक्पा मोक्कोन ब्रिबा लामुला । थे आङ्सिकादे च्यासि जेबाला सेम ताङ्जि । थेलिच्छा जेबासे याखारगि जुक्ति लाजि । जेबाला आमाला केबा रे खाबाइगेन मुबा । जेबासे ह्राङ्ला आमादा याखारगि नागितेन छ्याम टिबा आङ्सि स्होसि पिन्बा सेम लाजि । जेबासे आङ्सि थेन जाजाबा नागि नोन आपादा पाङ्सि उपहार पिन्बा सेम लाजि । जेबासे गोल्छेसे आङ्सि स्होबा चुजि । आङ्सिरि जेबासे जाजाबा म्लाङ थेन तार छोनला नागिला आङ्सि आमासे चुङ्सि टिबा स्होइ बिबा म्हान्जि ।

जेबासे ल्हानान दुइ किन्सि आङ्सि स्होजि । आङ्सि जाजाबा मुबा । जेबासे थे आङ्सिरि ब्रिजि, “ङाला आमा थेन आले ।” जेबा ल्हानान ताङ्जि । आपा गे ग्याम दिमरि दोगाजि । जेबा ह्यार्सि ह्यार्सि आपादा ह्रुप तानिजि । जेबादा म्राङ्सि आपा ताङ्जि । जेबासे आपाला झोला चुङ्सि आपाला लिरि च्यासि नेजि । खाइमाइ चुराङ्लासि आखाबा जेबाला ओराङ्बा ह्रिक्पासे आपा च्याबाला च्याबान लास्युजि । सेमन्हाङरि म्हान्जि, “ङाला जामेदा तिलाइ तोबाह्राङ्बा टिम ।” बिनाबिनान, जेबासे आपाला न्हाबेङरि पाङ्जि, “आपा, आमाला केबा रे खाबाइगेन मुला । थे तासि आमादा तिलाइ किन्सि दोन्तोला ह्या ?” आपासे ताङ्सि “तालामाले जामे, तिला पिन्बा सेम लाजि एसे ?” जेबासे जाजाबा काइ तेसि आपाला न्हाबेङ ओन्हाङ निसि बिजि, “जाजाबा नागि !” आपासे उदेक तासि सुङ्जि, “एला आमादा नागिकादे सेम आनिबा मुला बिसि था मुनामुनान तिल्दा पिन्बारि छेबा जेबा ?”

“ङाइ ज्यानालासि था मुला आपा । थे तासिगा पिन्बारि बिबा ।” जेबासे मि च्युम लाबान बिजि ।

“आमादा बोमो रेसाम तिलासे ?” आपासे ङ्योइजि ।

“थे तामलाम ह्राङ्से तिलाइ सुर्ता किन्आस्ह्युगो । ह्वाम्लामाले !” जेबासे आपाला न्हाबेङरि पाङ्जि ।

ताला बिसि आपा दिगु सोल्बारि छ्या ख्रुनिजि ।

तिनि आमाला केबा रे । जेबा योनान रेसि आपातेन नागि किन्बारि बजाररि निजि । आमाबिसाम चु आपा–जामे यो नोन खालाङ निबारि छेबा बिसि उदेक ताजि । आमा दिम साङ्बारि तालारि सेजि । आमा दिम चाङ्ना लाबाइगेन मुबा, थे दुइरिन मार्से राङगाग्याम काइ थेजि–

“ह्याप्पी बर्थ डे टु यु ... ह्याप्पी बर्थ डे टु यु ... 
ह्याप्पी बर्थ डे आमा ...
ह्याप्पी बर्थ डे टु यु ...”

आमा ताङ्जि । मार थोन्स्ह्युजि । मार दोबाइतेन आमासे म्राङ्स्युजि– आपाला छ्यारि केक, जेबाला यारि जाजाबा म्लाङ्गाइ नागिला कोला । आमा ल्हानान ताङ्जि, ल्हानान । जेबासे नागिला कोला आमाला छ्यारि पिन्जि । आमासे नागिदा ज्यानालासि चुङस्युजि । जेबासे आमादा ताङ्सि ङ्योइजि, “आमा, ह्राङ्दा ङाला गिफ्ट खाराङ छोर्जि ?”

आमासे जेबादा ह्राङ्ला कुरि चेप लाबान सुङ्जि, “ल्हानान सेम निजि । ङाला जामे, ए ङ्हीदान ल्हानान थुजेछे ।”

जेबा थेन आपासे ताङ्सि गिसेमगिदा च्याजि ।

“लु, दारेम केक थागो ?” ओते बिबा आबिबारि जेबा थेला कोठारि ह्यार्सि निजि । जेबासे जाजाबा कागज यारि चुङ्सि बासि आमाला छ्यारि पिन्जि । थे जेबासे स्होबा आङ्सि मुबा । थे म्राङ्सि आमा ल्हानान ताङ्जि ओम सुङ्जि, “चु आङ्सि स्होबा नागि थेन ङाला यारि ङाइ पुइबा नागि ओराङ्बान टिम !” आमाला तामसे म्हेमे सोम नोन नेजि ।