ङाइ छासि म्रेन्ना लाबा म्लाङ्माइ थेन
वाला व्हाबा लाथान गाङरि बोर्सि
लाथान क्यासि
आपग्रेनसे थाबा म्राङ्बा हिन्से
आताङ्बा म्हेनाङ
दात्ते दोनान आताङ्जि ।

ङाइ ङ्हे चाबा मोती माइदा 
गाराङ्ला फालाङ्गारि बोर्सि
थाबा म्राङ्बा हिन्से आताङ्बा
म्हेनाङ दात्ते दोनान आताङ्जि ।

खेप्पास्हुङ डेन्बा दुइरि
रेम्बोर्छेला मिन ज्यासि
नाकाला का फोर्बा बुजु चामा
रुइबा हिन्से आताङ्बा म्हेनाङ
दात्ते दोनान आताङ्जि ।

छ्योरे कुनु मायाङला बोम्बोला दिमरि
पोब लासि थाबा नाकाकादेला
काला स्योङ म्राङ्बा हिन्से
चोनलोङसि आताङ्बा म्हेनाङ
दात्ते दोनान आताङ्जि ।

टिका ख्याप्पाकुनु
म्हेमेला टिका ताबारि बिसि
हाबा तोयाङ्ला कोन साँजीदा 
मायाङला कोन थेबासे छेक्सि
थोबो थिना लाबा हिन्से
तोयाङला म्हि डिक्सि मायाङला म्हिला
काङ क्युइना लसि बोमो सोसि ब्राबा
म्राङ्बा हिन्से आताङबा म्हेनाङ 
दात्ते दोनान आताङ्जि ।

म्हेनाङला दुइरि
आइरकसे ङ्ह्योइसि
क्यायाङला च्याङ्बासे
तोसि थेन मेसे ख्राङ्सि क्रोसि रेबा
चाङ च्याङ्बाला गोला छ्युल्दुर
म्राङ्बा हिन्से आताङ्बा म्हेनाङ
दात्ते दोन्हान आताङ्जि ।

म्हेनाङला दुइरि आइरकसे ङ्ह्योइसि
पाप्सि राइ क्युइबा म्हेमेदा
आइराकसेन ङ्ह्योइसि
सेम कोल्सि, ताम कोल्सि, गे कोल्सि
योना आलान थोम बोर्सि सिना लाबा
थे म्हिकादेदा म्राङ्बा हिन्से
आताङबा म्हेनाङ
दात्ते दोनान आताङ्जि ।

स्ह्यान दुइरि खु आरेना चाचा मार्चा जे
म्हेनाङला दुइरि
कुदाब हिन्से म्रापला फिदोना
साङ्सि थान्बा स्या नरि ग्याम्से
ङाइ चाबाइगेन लाबा कानला
खार्बा फिरि च्योलोङ ताइबा हिन्से
आताङबा म्हेनाङ
दात्ते दोनान आताङ्जि ।

म्हेनाङलन दुइरि क्लाङ्बा जुवासे
ब्रेमा फाबरि आहाम्बा छेसे
क्रोसि म्योसि, च्योसि सिबा
आपसाँजीला सिल्हुइ म्राङ्बा हिन्से
आताङ्बा म्हेनाङ दात्ते दोनान आताङ्जि ।

म्हेनाङला दुइरि गोन्पोरि ङ्युङ्ने चिबारि
बोर्बा क्यायाङला म्हेन्दोदा
फादा निबा बिसि ताम थाबा
ह्युल्बा म्राङ्बा हिन्से आताङ्बा म्हेनाङ
दात्ते दोनान आताङ्जि ।

निक्युङमाला म्हेनाङरि ङा ब्राबा ग्यालामरि
ज्योहो डेन्सि खेप्पासुङ स्होजिबा म्राङ्सि
म्हेनाङला अभियान्तकादेदा पिन्बारि बिसि
थेला बारेरि ङ्योइसि भिडियो स्होसि
ङ्हाच्छा वाङमा हाइमाइ आथोर्बा ग्यामरि सुत्ताइ
ग्यालाम थोर्सि थामथोम तासि ङा
थे ग्लागिरिन दिग्गि चितोबा हिन्से
आताङ्बा थे म्हेनाङ
हाइ हाइमा ताङसे ?

ओराङ्बान स्युङ्से दाङ्बा हिन्से
साइबा थाबा आलाना आताबा हिन्से
हाराङ लासि ज्याबा प्रिबा बिबारि हाम्से
हाराङ लासि दाङ्से
हाराङ लासि ताङ्से
म्हेनाङ हाजि बिसि !

काभ्रे ।