कामरेला बिजाव्हाइखा प्रतियोगिताला लागि प्रविकसे व्हाइखा ब्रिबा तयारी लाबाकेन मुबा । ‘ज्योज्यो ह्राङ तिगा लास्ह्युबाकेन मुला ?’ प्रवृत्तिसे ङ्योइजि ।

प्रविकसे आङादा निसाल पिन्सिकेन पाङ्जि, ‘माइ कामरे लोप्खाङरि व्हाइखा प्रतियोगिता ताबाकेन मुला । थेनोन प्रतियोगितारि बोकिन्बारि व्हाइखा ब्रिबाकेन मुला ।’

प्रविकसे ह्राङ्ला आङादा गोना लासिकेन पाङ्जि, ‘माइ एसे कोलोङ्जि बिसाम ङाइ व्हाइखा ब्रिबारि आखाम । ए क्याच्चा कोठारि निसि होमवर्क लाउ होइ ।’

प्रवृत्ति ‘ताला ज्योज्यो’ बिसिमाम क्याच्चा कोठारि निसिमाम होमवर्क लाबारि चुजि । गणित, नेपाली, अंग्रेजी, विज्ञानला होमवर्क जिन्छि झोलारि किताब कापी थान्सि दोसि ज्योज्यो मुबा कोठारि निजि ।

‘ज्योज्यो ह्राङ्से व्हाइखा ब्रिसिमाम जिन्जि ? ओम तिगा थान्स्ह्युजि ओम व्हाइखाला क्राछिग ?’ थेसे ज्योज्योसे ब्रिचिबा कापी स्योत ब्यान्सि व्हाइखा डोबारि चुजि ।

व्हाइखाला क्राछिग डोसि प्रवृत्तिसे ‘उफ्’ लासिकेन पाङ्जि, ‘तिगा बिजाबुमोसे ब्रिबा व्हाइखारि आमाला चेगाइ थेन ह्युलला चेगाइ बिमा स्यान्दो क्राछिग आता कि तिला हिन्ना ? आमाला चेगाइ तामा आपाला नोन चेगाइ तातोबा, ह्युलला चेगाइ ताबादा समाजला नोन चेगाइ तातोबा, आहिन ओम ज्योज्यो ?’

प्रविक कोल्बाह्राङ लासि सीसाकलम ख्राप्सिकेन कालकोल ताजि । थेसे ङोजुइबा लि स्होसिमाम आङादा प्लिकप्लिक जेक्खे च्याचिजि ।

प्रवृत्तिसे प्राबा काइरि पाङ्जि, ‘हिन्बाम आमासे नोन ह्याङ्दा ज्याबान तागाइ बिसिमाम केस्ह्युला । खाइमामि तोनोन स्ह्युला । तासाइ नोन आपासेम केआस्ह्यु, तोनोन आस्ह्यु । ओम तिल्दा ह्राङ्निसे व्हाइखा ब्रिबा दुइरि ‘आपाला चेगाइ’ बिसिमाम व्हाइखा ब्रिआस्ह्यु !’

प्रविकसे जाकि थोबा गोरथिसि पाङ्जि, ‘च्यागो माइ आमाजुगुसे लाकुदोना गर्भरि थान्सि केबा पिन्ना । ओम ह्राङ्ला धारा च्युइ ङ्हे ख्वासि छार्ना लाला । थेतासि स्यान्दो क्योङ्ला बिमा ल्हाना आमाला चेगाइ ल्हागआति ओम !’

‘ए ! थेह्राङ हिन्साम आपाजुगुचा शत्रु नोन हिन्ना बिसिमाम म्हान्स्ह्युबा ?’ प्रवृत्तिसे छेर्सिकेन ङ्योइजि– ‘आमाला फोरि लाइनु छार्बाकेन लामा आपाला नोन ओतेबान जिम्मेवारी ताला ले ! लाइनु फोरि मुबा दुइरि थेन लाइनु केबा ह्रेङ्बा दुइदोना आमासे गेलाबारि आखाम । थेदुइरि आमा–लाइनुदा पौष्टिक चाबास्हे डुप्ना लाबाहेन्से आमाला गेसुताइ आपासे लातोबा ताला ।’

‘पाङ्स्ह्युगोम ज्योज्यो तिल्दा आपाला चेगाइला खानाङए ताम आता, जेक्खे आमाजुगुला चेगाइला ताम लाला । याखारगिदा डेन लामा स्यान्दोदा खोबा स्हुखाना लाबारि नोन आतानि ले । आहिन ओम ज्योज्यो !’

ह्राङ्दा थाहा मुला, ओइमा ह्याङ्से होमवर्क आलामा आपा बोमो खाबाह्राङ लासि ‘एदा तोउ’ बिस्ह्युबा । ङाइ ‘ताला, तिनिदोना आतोबा आपाला या चाबा सेम मुला ।’ बिजि ।

ताम थेबातेन आपासे मिनाङ मिख्लि ताना लासि ङ्हिदान कुरि थान्सि होमवर्क लोपपिन्स्ह्युजि । ओम ‘आपाला चेगाइ तिदा ल्हागाब आता ङान्दा ? प्रवृत्तिसे बिजि ।

‘हिन्ना लाइनु । ह्याङ्ला आपा आमासे ह्याङ्दा च्योच्यो चेगाइ लास्ह्युला । आमासे ल्हाना दिमरि दुइ पिन्बा ताबासे ह्याङ्दा आमासे ल्हाना चेगाइ लाबाह्राङ छोर्बा हिन्ना ।’ प्रविकसे ह्रेङ्बा बु छेङ्सि पाङ्जि ।

‘ज्योज्यो आमासे दिमरि क्युइ बाबा, साङ्सेङ लाबा, कान दाइबा गे लास्ह्युला ओम अफिस ब्रास्ह्युला । ओसो च्यामा मुतेबा गे आमासे जेक्खे लाबाह्राङ छोर्ला ।’

‘आपा स्ह्योरि ह्याल ताबा बिमा ङ्हाच्छान ब्रास्ह्युला, ङ्यासे दोप तामाहेन्से जेक्खे ज्योन्खास्हिला । आपासे थेह्राङ्लासि गे लाबा नोन ह्राङ, ङा थेन ह्याङ्ला क्योङ दिमम्हेला भलाइलान लागि हिन्ना ले !’ प्रवृत्तिसे पाङ्जि ।

प्रविकसे ह्रेङ्बा बु डुइसि पाङ्जि, ‘ठिक पाङ्जि लाइनु । आपा आमा च्योच्यो मुस्ह्युला थेतासि ङाइ व्हाइखा प्रतियोगितारि बोकिन्बाला लागि ब्रिबा व्हाइखारि आपा आमा ङ्हिदान चेगाइ थेन डेन लाबा व्हाइखा ब्रिला ।’

‘लाइनु पाङ्गोम दारेम ङाइ व्हाइखाला क्राछिग तिगा थान्गो ?’ प्रविकसे आङातेन सझुाब ह्रिजि ।

प्रवृत्तिसे याजुम्बि ख्राप्बान कोल्सि कोल्सि पाङ्जि– ‘हाजि हाजि ।’

प्रविकसे ङेसिकेन पाङ्जि, ‘तिगा हाजि लाइनु ?’

प्रवृत्तिसे हौसब तासि पाङ्जि, ‘व्हाइखाला क्राछिग !’

‘तिगा ओम व्हाइखाला क्राछिग ?’ प्रविकसे गाबोला छ्याम ङ्योइजि ।

प्रवृत्तिसे फ्याट्टा पाङ्जि, ‘आपा आमाला चेगाइ ।’

‘आउदिन ठिक पाङ्जि लाइनु । दारेम ङा चु क्राछिगरि व्हाइखा ब्रिला ।’ आङासे व्हाइखाला क्राछिग जुराप लापिन्बासे प्रविकसे थुजेछे पिन्जि ।

‘ल्हाउ ज्योज्यो ह्राङ व्हाइखा ब्रिस्ह्युगो । ङाचा लेङ्बा होमवर्क लाबारि निजि’ बिबाकेन याखारगि काङ थिसि खैंञ्ल खुट्टी क्लाङ्बा तोसोरि क्याच्चा कोठारिक्यार वाङ्जि । प्रविक आङा क्याच्चा कोठा न्हाङरि आवाङ्तेदोना थोमथोम तासि च्याचिजि । ह्रेच्छाक लिच्छा तिगाइ सोचतिबान प्रविकसे व्हाइखा ब्रिबारि चुजि ।

(छिगकि दोनः क्राछिग– शीर्षक, निसाल– जवाफ, कोलोङ्बा– हल्ला, ङोजुइबा– झोक्रिनु/मलिनो हुनु, छेर्बा– झोक्किनु/झर्किनु, डुप्ना लाबा– जुटाउने, खोबा– चित्त, चेगाइ– माया, डेन– सम्मान, बु– स्वास, गाबो– उत्साह)

दोःबा : यकिना अगाध