याम्बु, ३ सोङराति । व्हाइखाब्रिखेन ओसेम ग्योइखाइब्रिखेन ईश्वर थोकरला कुछा कृति ‘आमा’ सार्वजनिक ताबा मुला । व्हाइखाब्रिखेन थोकरसे ह्रोजुगुला गुङरि ह्राङ्ला कृति सार्वजनिक लाबा हिन्ना । व्हाइखापोप ‘आमा’रि १४ व्हाइखा पोप्बा मुला । व्हाइखाकृति आमालान क्राछिगरि थान्बा मुला ।
व्हाइखाब्रिखेनसे ह्राङ्ला व्हाइखापोपदा ताङ्ला व्हाइखापोप बिबा मुला । आमाला चाङ्मा थेन निस्वार्थ चेगाइफिरि फुल्बा थेला १४ व्हाइखा तुन्बा थेन सरल मुला । तासाइ थेसे केना लाबा संवेदना, ङ्यान्पाङ लाबा साङग्युर, भाव थेन भावना तोच्चा कोटीला मुला ।
वि.सं. २०४४ ल्होरि तेमाल गाउँपालिका–९, मुक्पा, काभ्रेपलाञ्चोकला केबा व्हाइखाब्रिखेन थोकरसे तामाङ थेन नेपाली ग्योइरि व्हाइखा थेन डान्बा ब्रिबा, दोःबा गे लासिकेन खाबा मुला थेला पिङ्गाई (गजलपोप, २०६८), प्लिक्सी (व्हाइखापोप) २०६९), नोरी (व्हाइखापोप, २०७४), सिरिया (व्हाइखापोप, २०७५), वाला सुइटर (डान्बा पोपा, २०७५), ल्हुइला गोडमा (डान्बा पोपा, २०७६), लीला (ताङ्ला व्हाइखा पोप, सन् २०२१), प्रेमको आदिम गीत (संयुक्त व्हाइखापोप, सन् २०२५), याङ्जी थोकरला रापजुगु (दोःबा), द एसिया फाउन्डेसन (लेट्स रिड) थेन सिर्जनालयग्याम तेःबा दर्जन गिक बिमा ल्हाना बिजारापला पुस्तकजुगु (दोःबा) मुला ।
ग्याल्साङ ग्योइला गजलजुगु (अनाममण्डली, याम्बुग्याम तेःबा, २०६७, डिक्लाबा) थेन चन्द्रमा भाग २ (रिजेन्ट रेसिडेन्सियल स्कुल, ललितपुर २३, धापाखेलग्याम तेःबा, २०८१, डिक्लाबा) छिपा मुला । थे तामाङ ग्योइकाइ पुरस्कार २०७१ ग्याम पुरस्कृत ताजिन्बा मुला ।
(छिगकि दोनः व्हाइखाब्रिखेन– कवि, ग्योइकाइब्रिखेन– साहित्यकार, क्राछिग– शीर्षक, ताङ्ला– श्रृखंला, चाङ्मा– निश्चल, चेगाइ– माया, फुल्बा– समर्पित, ङ्यान्पाङ– संचार, केबा– जन्मेको, डान्बा– संस्मरण, ग्याल्साङ– राष्ट्रिय, डिक्लाबा– सम्पादन)
तपाईको प्रतिक्रिया दिनुहोस