पुर्खासे स्होपिन्बा सिङ्ला दराज तिनि दोसि क्रिङ्जि । याखारगि तोसोला ब्लाप्बा ङ्हार्बा, खाइमा आथेबा ह्राङ्बा ।
ङा दिमरि दोगामा कोठा न्हाङरि अनौठै सन्नाटा मुबा । मेषापट्टीरि मोबाइल चाम्काप ताबाकेन मुबा, तासाइ दराज...दराज कुटिसि, न्हाङरि खानाङए तिगाइ गुर्बा ह्राङ्बा काइ ।
ल्हिबा सेम थोसि ङाइ फ्या तेजि ओम लोङ्सिकेन दराज ठ्वाङ्जि । न्हाङरि मोक्कोन किताबजुगु डिआछ्याबा गुरचिबा मुबा... बिले खालाइसे डेङग्याम आङ्सि ताइना लाबाह्राङ । खाजिबाइला पाना डेबा, खाजिबाइला कपाट होन्दोलोङ ।
ङोन्छाङ याखारगि खेःबा डायरीमि बिल्कुल लिपखाप्बा परतिबा ह्राङ्बा गोल्छेसे म्राङ्बारि चुजि । ङामरि ल्होलोला नोटला छ्याम ।
थेनोन गुङ्ला याखारगि कागजरि ग्रेन हिक्पारि ब्रिबा मुबा–
‘ङानि पुस्ता–पुस्ताला ग्युइ थोबा किताबजुगु, लिच्छारि आत्महत्या लाला । ङान्दा डोबा मिजुगु सिजिन्जि । ङान्दा डान्बा सेमजुगु बाफ दोबारि चुजि । पालेः मोबाइल ।’
ङा सा आबुन्ना थोन्ताजि ।
कागजला गुरि म्लाङ मसीला मिख्लिला दाग । बिले, किताबजुगुला सामूहिक सुसाइड नोट । चु दृश्यसे सेमरि पुजु फुइबारि चुजि– किताबसेमि खालाइदा आथुर्बारि खाम्ला, न्हा पाङ्बारि खाम्ला, तासाइ तिनि थेनिकादेसे ह्राङ्लान मौनताग्याम खारे ङ्हेप्बा मुबा ।
मोबाइलसे तिङरि दार्ना लाजि । मेसिन ह्राङ्बान, भावनाविहीन । तासाइ थे दुइ, ङादा छोर्जि चुनोन चम्काप ताबा स्क्रीसे किताबजुगुला आत्मा ब्यान्पिन्बा मुला ।
ङाइ गोल्छेसे किताबजुगु थिजि, दुडुइ तासि, थेला डेबा पाना डिक्ना लाजि ।
दराज दोसि स्याम्जि । ओम, गिक्छारेम ल्हानान ला लिच्छा मोबाइल बन्द लासि याखारगि किताबला गिक्छा पाना ठ्वाङ्जि– बिले, ङाइ खाजिबाइ आत्महत्याग्याम खालाइदा दोसि केबा पिन्बाकेन मुला ।
मिरिक, दार्जीलिङ, भारत ।
(छिगकि दोनः बुबुन्बा– सुस्केरा, ङ्हार्बा– हुंकार, डिआछ्याबा– अव्यवस्थित, खेःबा– पुरानो, लिपखाप्बा– ओझेल, हिक्पा– अक्षर, दुडुइ– धुलो, स्याम्बा– सजाउनु)
दोःबा : यकिना अगाध
तपाईको प्रतिक्रिया दिनुहोस