याम्बु । गोछापा छोबा ह्रोमि कुलभक्त शाक्यसे सरकारी विज्ञापन नीजि यान्पाङ्स्हेग्यादा विज्ञापन आपिन्बा सरकारला आप्ता लिब्रो संसदरि काइ रेन्सेला पाङ्बा मुला । गेताङरि संघीय सांसद शाक्यसे दातेला दुइरि यान्पाङ्स्हेग्याजुगु जटिल नाछालरि गुज्राप ताजिबारि सरकारला लिच्छाला आप्तासे नीजि यान्पाङ्स्हेग्यादा खारे ङ्हेप्बा ह्राङ ताबा पाङ्जि ।

बाइ ग्योइला छोन्बा साप्ताहिक ‘लहना वाःपौ’ ला १३ छा दिङ्साङाप्तोन गेताङरिसांसद शाक्यसे चुह्राङ बिबा हिन्ना । ‘ह्युल्बाला काइ पाङ्बा यान्पाङ्स्हेग्यादा ख्युरछ्या लातोबारि सरकारसे झन लिसो पिन्बा साप्तोन थाबा खेदजनक मुला । ङा चु ब्रेल्बारि नीजि यान्पाङ्स्हेग्याला छ्याम आमाग्योइ यान्पाङ्स्हेग्याला तिलोरि संसदरि काइ रेन्सेला मुला ।’ शाक्यसे पाङ्जि ।

गेताङरि नेवाः देय् दबूला चोहो रश्मिला प्रजापतिसे नक्कली सुकुम्वासीदा ब्याङ्नोन तोबा हिन्ना, तासाइ वास्तविक सुकुम्वासीजुगुदा सरकारसे डिछ्याना लातोबा पाङ्जि । ‘विकल्प आस्होना जबरजस्ती डोजर चालाप लासि मोक्कोनदा उठीबास ल्हागाब लाबा ग्याल्साला बरबरता हिन्ना ।’ प्रजापतिसे पाङ्जि ।

गेताङरि याम्बु महानगरपालिकाला ङ्हाच्छाला ग्रेन्पो विद्यासुन्दर शाक्य, आदिवासी जनजाति स्योमि गेन्दुनछेनला चोहो लक्की चौधरी, प्रेस काउन्सिल नेपालला मुख्य अधिकृत झविन्द्र भुसालला छ्याम स्यान्दोकादेसे लहना साप्ताहिकदा थुजेछे थेन ज्याबाम्हान्बा पिन्बा मुबा । चुह्राङ्नोन लासि डेन ताबाजुगु नेपाल समाचारपत्रला छ्याडिक्खेन महर्जन थेन नगद पुरस्कारला दाताग्याम्से जगतबीर सिंह कंसाकार थेन डा. विजय प्रकाश सैंजुसे ह्राङ्ह्राङ्ला विचार थान्बा मुबा ।

गेताङरि २० तोङ्जा राशीला छ्याम लहना धर्ममोति स्योनाम पुरस्कार दिङ ११४५ ला लागि एपिवानकर्मी राजु नापितदा थेन ११४६ ला लागि खबरसेन्टर अनलाइनला उत्तमकुमार श्रेष्ठदा पिन्बा मुबा । १० तोङ्जा राशीला छ्याम लहना केशव कृष्णवदन आमाग्योइ स्योनाम पुरस्कार ११४५ ला लागि ईमेजकर्मी केके मानन्धरदा थेन ११४६ ला लागि नेपाल टेलिभिजनकर्मी शकुन्तला महर्जनदा पिन्जि । लहना शर्मिष्ठा सुर डेन ११४५ ग्याम वरिष्ठ काठाक्पा पवन जोशी थेन ११४६ ला लागिं कलाकार आराध्यालक्ष्मी खड्गी डेन ताजि ।

चु दिङग्याम लहनासे डोङ्बा स्योमि ङ्ही सुशील बीरसिं कंसाकार थेन सुरेशकिरण मानन्धरला मिनग्याम नोन स्योनाम पुरस्कार तिबा मुला । लहना सुशीलबीर सिंह स्योनाम पुरस्कार ११४६ नेपाल समाचारपत्रला छ्याडिक्खेन सुनिल महर्जनदा पिन्जि । चु पुरस्कारला राशी रु. २० तोङ्जा मुला । चुह्राङ्बान रु.२५ तोङ्जा राशीला छ्याम लहना सुरेशकिरण स्योनाम पुरस्कार ११४६ ग्याम वरिष्ठ कार्टुनिष्ट रविन सायिम् डेन ताजि ।

गेताङरि रविन्द्रराज ताम्रकारग्याम ब्रिबा बाइ ग्योइला पुस्तक रिमठिम, समाज थेन छोङ्नाम’ला विमोचन नोन लाबा मुबा । गेताङरि लहना मिडियासे नेपाः टिभिरि संचालन लाइ लाबा गोर ब्लि गेताङला कापाङ लाबा मुबा । लहना मिडिया थेन कन्फराक्टीभ मिडियासे संयुक्त स्ह्रुगरि आयोजना लाइ लाबा लहनाएक्टीभ म्यूजिक भिडियो अवार्डला कापाङ नोन गेताङरि लाबा मुबा ।

लहना साप्ताहिकला ग्रेनडिक्खेन नृपेन्द्रलाल श्रेष्ठ थेन डिछ्यापा सुरेन्द्रभक्त श्रेष्ठसे ल्होलो दाक्राम छाक्रामदा ख्योसिकेन लहना ङ्हाच्छा वाङ्चिबा थेन लिउरि नोन दुइ आन्सार बार्बुजुगुला छ्याम निरन्तर ङ्हाच्छा वाङ्सेला प्रतिवद्धता उन्पाङ्जि ।

गेताङरि ल्होलो काइपा, काइमो थेन कलाकारजुगुग्याम व्हाइ प्रस्तुतिला छ्याम स्याबा थेन वाद्यवादन प्रस्तुति नोन लाबा मुबा । 

(छिगकि दोनः यान्पाङ्स्हेग्या– संचारमाध्यम, साप्तोन– सुविधा, गोछापाछोबा– प्रतिनिधिसभा, ह्रोमि– सदस्य, आप्ता– निर्णय, नाछाल– अवस्था, छोन्बा– रंगीन, दिङ्साङाप्तोन– वार्षिकोत्सव, ख्युरछ्या– संरक्षण, ब्रेल्बा– सम्बन्धी, तिलो– पक्ष, डिछ्याना– व्यवस्थापन, ग्याल्सा– राज्य, ग्रेन्पो– प्रमुख, स्योमि– पत्रकार, गेन्दुनछेन– महासंघ, स्योनाम– पत्रकारिता, काठाक्पा– निर्देशक, छोङ्नाम– व्यवसाय, कापाङ– घोषणा, स्ह्रुग– रुप, डिछ्यापा– व्यवस्थापक, दाक्राम– बाधा, छाक्राम– अड्चन, लिउ– भविष्य, बार्बु– सामाग्री, उन्पाङ्जि– जनाए)