हेराङ । समालोचक ओसेम बाइ ग्योइ ग्योइकाइ थेन दोङराप ब्रिखेन प्राध्यापक प्रेमशान्ति तुलाधरदा दुगु २९ गते आमाग्योइ ग्याल्साङ साप्तो पुरस्कार–२०८२ पिन्बा मुला ।

आदिवासी जनजाति उत्थान ग्याल्साङ प्रतिष्ठानग्याम मिरे हेराङरि आयोजित काप्तोनरि–समारोहमा आदिवासी जनजाति आयोगला चोहो रामबहादुर थापासे प्राध्यापक तुलाधरदा बुम गि रुपैयाँ नगदला छ्याम पुरस्कार–२०८२ पिन्बा हिन्ना ।

पुरस्कार बोठाबा काप्तोनदा सम्बोधन लाबान आदिवासी जनजाति आयोगला चोहो रामबहादुर थापासे पुरस्कार याङ्बाला लागि खालाइसे नोन आमाग्योइरि गे लाबा आता बिबान आमाग्योइरि योगदान पिन्बा व्यक्तित्वला डेनसे आमाग्योइला डेन ताला पाङ्जि ।

थेसे मोम्कोन जातीय गेन्दुनजुगुसे लाबा आमाग्योइला डेन थेन पुरस्कार गेताङदा आमाग्योइरिन सञ्चालन लाबा नाछाल डिक्ना लाबा म्होइजेन लाजि ।

आदिवासी जनजाति गेन्दुनछेनला चोहो निमा लामासे आमाग्योइ ख्युरछ्या थेन ल्हेछ्याला लागि चुह्राङ्बा डेन महत्वपूर्ण ताबा पाङ्बान आमाग्योइला ख्युरछ्या लासि ङोसेबा कायम थान्बाला लागि मोक्कोन डिक्सिमाम ल्हागतितोबारि बाङ पिन्जि ।

प्रतिष्ठानला ङ्हाच्छाला स्यानचोहो ओसेम पुरस्कार दाम्बा दाछोकला थुछापा जीतपाल किराँतसे थेसे कायम लाबा प्रतिष्ठा थेन योगदानला क्योइका लाबान पुरस्कार पिन्बा आप्तारि दोबा पाङ्जि ।

पुरस्कृत व्यक्तित्व प्राध्यापक तुलाधरसे व्यक्तिगत जेक्खे आताना बाइ ग्योइ थेन मोक्कोन आमाग्योइदा डेन लाबा छोर्बा धारणा थान्जि । थेसे ग्योइ रिमठिम, सभ्यता थेन सम्पदातेन थुइबा ताला बिबान आमाग्योइफिरि कर्तव्य छ्योना लाबा बिसि पुरस्कार याङ्मा ह्राङ्दा ताङ्बा खाबा पाङ्जि ।

तुलाधर बाइ ग्योइ, ग्योइकाइ समालोचना ओसेम रिमठिमकि खेडोबला प्रतिष्ठित अध्येता थेन अवकाश ताबा प्राध्यापक हिन्ना । थेसे ‘पलेस्वां पुचः’ स्हेङ्सि बाइग्योइ ग्योइकाइ गतिविधि ल्हेना लाबारि महत्वपूर्ण भूमिका क्लाङ्बा मुबा । थेसे चु बिमा ङ्हाच्छा श्रेष्ठ सिरपा, वैकुण्ठ लाकौल सिरपा, गिरिधरलाल नेपालभाषा सिरपाला छ्याम ल्होलो डेन याङ्जिन्बा मुला ।

गेताङरि प्रतिष्ठानला निमित्त गेदिम ग्रेन्पो रामकुमार मादेनसे मोक्कोन दिङ फेब्रुअरी ९ तारिखला रे आमाग्योइ दिङ्साङ्ला दुइसाङरि चु पुरस्कार पिन्सिकेख खाबा ग्रादाङ पिन्जि ।

पुरस्कार दाम्बा दाःनला छ्याम पुरस्कृत व्यक्तित्वफिरि पुरस्कार दाम्बा दाछोकला ह्रोमि उपप्राध्यापक ओसेम चोमतामब्रिखेन कुमारी लामासे सेमताम थान्मुबा ।

(छिगकि दोनः आमाग्योइ– मातृभाषा, ग्याल्साङ– राष्ट्रिय, साप्तो– सेवा, काप्तोन– समारोह, बुम– लाख, बोठाबा– वितरण, नाछाल– अवस्था, ख्युरछ्या– संरक्षण, ल्हेछ्या– संबर्धन, ङोसेबा– पहिचान, दाछोक– समिति, थुछापा– संयोजक, क्योइका– मूल्याङ्कन, आप्ता– निर्णय, रिमठिमकि– सांस्कृतिक, खेडोब– अध्ययण, ग्रेन्पो– प्रमुख, दाःन– आधार, ह्रोमि– सदस्य, चोमतामब्रिखेन– निबन्धकार)