थेसे बिबाकेन मुला–
आम्राङ्बा थेन आम्हाबा पोर म्लेसि
दातेनोन युद्ध लेङ्बा मुला ले !
छार नेपाल स्होबारि 
नेपाल आमाला स्ह्याल पोबारि
प्राङ्बोला व्हाङरि ल्हेबा प्राङ्बोला केवा थिबारि
अन्यायरि परतिबाजुगुला लागि
सर्लक्क न्याय पिन्बारि 
एसे लाबा युद्धला ङ्यान्दि
कात्ते तिगा ताजि ?
कात्तेसे तिगा तिगा जेक्खे म्हाना लाआतोनि
मुला लेखाजोखा ?
जेक्खे म्हासि निबा केवाला
लाबा मुला– हिसाबकिताब ?
    
ङाइ ल्हानाह्राङ्बा म्हुनरि मु च्याला
सारजुगु टिलपिल चाम्काप ताबा याङ्ला ।
थेनोन सारला हुलप।
कल्पनारि म्राङ्ला, 
ओम सातान दिमागरि ज्योन्खास्ह्युला । 
थेसे उन्बा ग्यालामरि ब्राना ब्रानान
गाङ्साल ग्यालामरि 
बेवारिसे छेन्दे दोसि गिद्धा थेन ल्हुन्दिला आहारा दोसि
लाछा दोना दुर्सा आयाङ्ना कंकाल दोबा
ङाइ म्हाना लाबा ङाला ह्राङ्ला
तिङ विदारक केवाला राप
ओम ङा केवा सोबाकेन लाबा
सेमनाङ आम्राङ्बा पोरला 
खाटा चिबा फिमाङ होग्बाकेन लामा
थेसे बिस्ह्युला दातेनोन
दातेनोन युद्ध लेङ्बा मुला रो !

खालाइसे खालाइदा पिन्बा
आश्वासन थेन मोलम–
कामनाला ताम फेबा तामुबा
फ्लिकदोसि ङ्हाउ ग्युरपोबारि आखाम 
आशा मुला दुइसे वास्तवरिन मोक्कोन ताम फान्ना लासेला मुला । 
आशाला बल्छिरि केवा स्युसि
जेक्खे काल्पनिक ताङ्बाला स्योङ्ला गुरि
केवादा न्हासि थान्बा मुला
पोरजुगुग्याम दोसि का, न्हा आब्योङ्गाइ बिसि
थेसे उन्बा सिद्धान्तला न्हान बोसि
ॐ माने पद्मे ङा लाबान
स्हिवाङला स्तुपा रेन्बा मुला । 
ङाला सेमला होल्गारि
..... थेसे बिसाम दातेनोन युद्ध लेङ्बा मुला बिला 
ङाला सेमला आम्राङ्बा पोर छोर्ना लाबारि ।

थाहा याङ्ना याङ्नान
लिच्छाला शाश्वत देन्बा किन्सि
लेबाफेबाला दागजुगु फ्याला बिबा तामरि
एदा आम्राङ्बा आस्थाला ला स्होसि
दिमथेमेला स्हेर म्लेसि
साशकसे पिन्बा चोटला वजन बिमा
एसे उन्बा मुक्तिला ग्यालाम सहज डान्सि
ग्यु ह्राङ्बा दोसि एला लिच्छा वाङ्जि
तिगाइ आज्याबा दुइ याङ्साइ नोन
तिगाइ ज्याबा दुइ याङ्साइ नोन
डान्बाजुगु साझा लाजि ह्राङ्लादा
डोङ्बाला तामसोरजुगु साझा लाजि ङेङ्गोरदा
का ब्योङ्बा मुबा क्युइ च्योच्यो
क्रास्या ड्वाबा मुबा ब्रुइ युङ्बा च्योच्यो
या काङ टाङ्बा मुबा
दोङ्ला हाँगा प्लिबा च्योच्यो 
मुला ल्होलो आम्राङ् पोर
तासाइ नोन ....
एसे बिबाकेन मुला युद्ध दातेनोन लेङ्बा मुला ?

दातेः लिमासोल, साईप्रस ।

(छिगकि दोनः ङ्यान्दि– कारण, छेन्दे– लाश, लाछा– महिनौं, ङ्हाउ– विगत,  ग्युरपोबा– परिवर्तन, स्हिवाङ– शान्ति, लेबाफेबा– विभेद, स्हेर– पीडा)

दोःबा : यकिना अगाध