स्ह्यो हेन्सेन क्योङरि लडाइँसे याखारगि जेबो काप्बा मुबा । हतियार गिसेम गिसे ब्यान्बा परिस्थितिसे झन लडाइँरि वाङ्बारि गाबो काप्बा जेक्खे आहिन, गर्जाङ चुचुरेला खि किन्बारि हतार ताना लाबा मुबा । फोर्सदा कोङ्बा स्होसिमाम म्हुनाला मोर्चाबन्दी स्होजि ओम लडाइँला लागि ग्रेन्पो फोर्स शाही सेना मुबा ग्ला ऐसेंलुखर्करि निजि ।
ङानि बिसाम रेला घाईतेजुगुला क्योन्बारि तल्लीन ताजि । म्हुक्गिला लडाइँलिच्छा स्ह्यो दुइरि घाईतेजुगु खाबारि चुजि । घाइतेला छ्याम छ्याम, युद्ध पाङ्ग्याल ग्याम कमरेड नाम्गेलतेन ल्हानान ह्रोजुगु सहिद दोजि बिसमाम मिन खाबारि चुजि । युद्धसे दोसि थेनोन गर्जाङला निरन्तरता पिन्जि– फेबा, स्हेर, घाईते ओम ओस्बान ब्रेबा । स्ह्यो दुइरि दोगाबा घाईतेजुगुला हुलरि सिल्पिङला स्टेचररि कमरेड अमित नोन दोगाजि । ल्हानान म्हेला क्योन्बा लिच्छा क. कुमारीसे अमितला फोला ब्यान्डेज ब्लामा म्राङ्बा दृश्यसे ङादा चोननिजि । ङा लोङ्सिमाम काइ तेगे लामा कुमारीसे ङाला काङरि ङ्हेप्सिमाम जिजि ओम आलोङ्गो बिसि छोत उन्पाङ्जि कि नाबाजुगु हतास आतागाइ । फोर्सेपला जोसे कट्टनला जाजाबा प्लेनदा खुकु बेटाडिनरि ब्लुम्बान अमितला पोरदा ड्रेसिङ लामा न्हाङ्ला फो माङ्ग्यार थोन्मुबा ओम ङाइ थेदा च्याबातेन ङाला यासे कुमारीला पाखुरारि बाङ्से चुङ्मुबा । चु दुइरि कुमारीसे ङादा छोत लाचिबा तामुबा– डोबा, लोङ्बा थाताउ बिसिमाम ।
दुइ दुइरि अमितसे ङ्योइमुबा– ‘कुमारी कमरेड पोर खाराङ्बा मुला ?’
कुमारीसे निसाल पिन्मुबा– ‘सामान्य नोन मुला, लोङ्आस्ह्युगो । तासाइ, ल्हाना क्यारमार कोआस्ह्युगो ।’
कुमारीला ताम थेमाहेन्से अमितसे पाङ्जि,– ‘ओइ कुमारी कमरेड ! ङामि चुह्राङ्बा घाईते कात्ते ताजि ताजि । चुमि सामान्य हिन्ना । पाखुरा नोन गाल चाल्माम हतियार आख्लानि ।’
कुमारीसे पाङ्जि– ‘हिन्ना ! सामान्य नोन मुला तासाइ मोक्कोन सामान्य सातान सामान्य आताबारि खाम्ला । तिनिम फोरि टाबा मुला जाकि ल्हाना ख्याल थान्नोन तोला ।’ थेलिच्छा कुमारीसे सेकेन्डरी क्योन्बा चुजि । अमितला लागि I=V salain ओपन लासिमाम ।
क. अमित न्हुपग्याम स्यारला लडाइँला लागि कमरेड जीवितला कमान्डरि स्याररि खाबा मुबा । मुतेबा नेपाली क्रान्तिला लागि अर्जेन्टिना(लिच्छा बोलिभिया क्रान्तिरि सेबा मुबा) क्रान्तियोद्धा चे ग्वेभारा ह्राङ । हिन्ना, अमित नोन स्यार क्रान्तिला लागि चे ग्वेभारा नोन मुबा । न्हुपला थेह्राङ्बान तोङ्जा तोङ्जासे मुतेबा क्रान्तिला लागि स्यारला क्रान्तिदा योगदान थेन बलिदान पिन्जि । अमितजुगुसे स्यार क्रान्तिला लागि साहस, गाबो, जेबो जेक्खे बासि खाबा आरेमुबा, सिस्ने, जलजलाला राप, रोल्पा, रुकुमला जनकम्युनला ग्यारेमला छ्याम रोइला, देउडा नोन बासि खाबा मुबा । थेसे ङान्दा देउडारि गोङ्मा ल्हेबारि लोप्जि । रोइलाला टुक्का राबाला छ्याम जाकि अन्तरविरोध नोन बासि खाबा मुबा । थेदा ङान्छे रेमरेम समीक्षा थेन आत्मासमिक्षा लासि समायोजन थेन निराकरण लाबा प्रयास लाबा मुबा । दोसि समायोजन तासिमाम लडाइँरि बोकिन्बा लामुबा ।
रेगिला क्योन्बा लिच्छा दोसि म्हुक्गिला ल्हाम तिजि । दर्जनौ घाईतेजुगुदा पुइसिमाम । सामान्य म्हि ब्रामा घन्टा ङ्हीला ल्हाम म्हुक्गि ल्हागाब लासि घाईतेला ग्ला ह्रावाङ लाजि । शेर्पा नाम्सा, शेर्पा रिमठिम, शेर्पा संरचना ल्हाना च्याङ्ना मोक्कोन डिछ्याबा नोन तामुबा । क्युइरि लेप्बा सिम्बा ङ्हीनोन, इन्धनरि सिङ थेन ग्रेनग्रेन ताङ मोक्कोन ।
चु ह्रेङ्बा ल्हामला दोन्ता भोजपुर बिबा लडाइँ ताजिन्माहेन्से जेक्खे थाहा याङ्जि । तासाइ थेबिमा ङ्हाच्छान गर्जाङ भिडन्त ताजिन्बा मुबा । चु ङ्हीछा ग्रेन लडाइँ मुबा । गर्जाङ्ग बेथान गिक्खे लड्ब ताबा मुबा । तासाइ, ऐसेलुखर्का गोर सोम व्रिगेड बिले क्योङ स्यारला बाङसे । थेसे स्यारला टिमरि मिन चल्तिबा डाक्टरजुगु हिमेश, निशाना, नविन ह्राङ्बाजुगुदा ह्रुप ताबारि म्याङ्बा गाबो मुबा । ह्रुप बिसाम युद्ध पाङ्ग्यालरिन ताजि । माङ्ग्यार रेफरला लागि केन्द्रीकृत ताबा घाईतेजुगुला छ्यामरि थेन्से बोकिन्बा मुबा ।
म्हुक्गि ह्युल माङ्ग्यार बोर्तोबा मिनला तयारी ताजि । अमितसे बिसाम ह्राङ्लान डाक्टरदा म्हाइजि । कुमारी थेन अपिलसे ल्हाना गोना लाजि– माङ्ग्यार नितोला बिसिमाम । थेसे बिसाम दारे ताइ लाबा लडाइँरि खात्दामान लासि निला बिसि कर लाबारि चुजि । ‘ङा निबारि खाम्ला’ बिसिमाम कोहोरेगि कर लाचिजि । खाम आखाम ङ्यान्ना लामाहेन्से थे रेफर टोलिरि परतिजि । माङ्ग्यार क्योन्बारि बोर्बा म्हेदा गिक्खेन दिमरि थान्जि ।
अमितदा ह्रुन्ब ब्रा बिमा तिगाइ चाबारि पिन्बा आरेमुबा । सलाईनतेन रोरोला खुकु सम्भव आरेमुबा । म्हुनहेन्से अमितला काइरि तिल्माला ह्राङ्बा बाङ आरेमुबा । ङान्छे म्हुक्गि दर्जनौ घाईतेजुगुला कोङ्ह्रावा जिम्मा किन्सि चिजि । क्योन्बारि बिसाम हिमेश, निशानानि नोन मुबा । म्हुन आउदिन गोङ्बा मुबा । ग्लिङफिरि ग्लिङ्लान कभर स्होसि कोङ्ह्रावा पिन्चिजि । दर्जनौ घाईतेजुगु गुङ्ला क. प्रमोद थेन क. सृजन झन ल्हाना गम्भीर घाईते मुबा । थे म्हुन सिङ्नोन सिङसे स्होबा शेर्पा ज्योज्योला दिमरि प्रमोदला स्हेरला स्हिक्बा म्हुन गुङहेन्से झन ल्हेबाकेन मुबा ।
ङाइ कुमारीदा ङ्योइमुबा– ‘नाना सोना लाबारि खाम्ला ओम ?’
थेसे चोत्ते बिमुबा– ‘ग्रेन डाक्टरजुगु मुला ।’
‘अमितला ग्रुङ तिगा ताला नाना ?’ ङाला ङ्योइबारि थेसे बिजि– ‘ब्राउ ! च्याबारि अमितदा ।’
ङानि अमितला ङामरि दोजि । अमित तिल्माला ह्राङ्बा आरेमुबा । गेल्सि जिन्बा नाछालरि मुबा । चुर्से प्रमोदला स्हिक्बा ओस्बान मुबा । थेनोन स्हिक्बाला गुङरि स्ह्योला ब्लि ङ्ह्याबा दुइरिक्यार प्रमोदला भौतिक ल्हुइ सातानला लागि ङानिग्याम फेजि । थेह्राङ्नोन लासि सृजन नोन स्यान्दोन ब्रिगेडला मुबा । दोरम्बाला आन्तरिक दुर्घटनारि कमरेड सुरजला डोङ्बा लिच्छा चु ङ्हीछा स्हेरखाबा डोङ्बादा ङामग्याम च्याबा मुबा ।
रेगि अमितला छ्याम चिमा हेन्से माङ्ग्यार बोर्बारि घाइतेजुगुदा तयार लाजि । ओइमा दिनि फेमा युद्धसे डाबा रुइबा मुबा । ङ्यासे दिनि नुप्बाकेन लामा स्यान्दो डाबा निस्चित लाबारि म्हुनाला मोर्चबन्दी लडाइँरि अमितला फोरि गोली टासिमाम घाइते ताबा मुबा । दोसि ओस्बान लासि दिनि नुप्बारि म्हाइबाकेन मुबा, ज्योमोगाङला जोजुगुग्याम दिनिसे ह्राङ्ला होइसेर तेबाकेन मुबा । न्हाङ्गार फेसेला सुनिश्चिततारि । तासाइ, फेसेला दिनि ह्राङ्नोन अमित ल्हुइथाङसि फेला कि नुप्बा दिनिह्राङ होइसेर बोर्सि सातानला लागि नुप्ला, सेम आउदिन बेचैन मुबा । स्यारला युद्धला लागि खाबा न्हुपला योद्धादा च्यानाच्यानान स्टेचररि थान्सि ग्युरु वाङ्जि ह्राङ्साप्तोपा ह्रोजुगु ।
ङानि स्यान्दो युद्धला लागि हान्डो क्रेजि । छ्यायोद्धाला छेन्देफिरि क्रेसिमाम ल्हाम ब्राबा थे ग्यानाक जनमुक्तिसेनाला राप । ह्रेङ्बा ल्हामरि ह्राङ्लान सिबा ह्रोला स्या चासि लड्तिबा युद्धला दृश्य चलचित्ररि च्यामाह्राङ दारे थेला ङामरि ङानि दोगे लाबा छोर्मुबा । ओइमा गर्जाङ्ग दाते ऐशेंलुखर्का दारे न्हाङ्गार खाजिबाइ स्यान्दो ओस्बा ओस्बान । न्हाङ्गारदाङसे धर्मेगाङरि दोमा दोसि ओस्बान ङ्यासे ताबाकेन मुबा । क्योङ सा फिट ङ्हा बिमा फिरि ग्लिङसे गाप्बा मुबा । ङान्ना एस.टि.एफसे याखारगि ग्यु गोठेला अवशेष स्याप्जि– ख्यारख्युर युङ्बाला डेङ मुबा । थेरि ङान्छे ख्यरख्युर पाडाला स्याउला तिजि । थे दुइतेमा दोसि दिनिसे ओस्बान लासि ल्हागाङला जो, ज्योमोगाङला जोजोग्याम ह्राङ्ला होइसेर तेबा मुबा । तासाइ, तिल्मा अमितजुगु छ्याम मुबा तिनि आरेमुबा । म्हुन छिङ्गाइ म्ल्हाला जाजाकार तरनरि थाजि । स्ह्योरि ग्लिङ म्ह्युना लासि कान दाइजि । गाङ्साल छिङ्गाइ कानदा थेरि मुबा फोर्ससे पालोन पालो गिक्खेन प्लास्टिकरि थान्सि चाजि ओम दोसि ल्हाम चुजि । युद्धला लागि ।
भोजपुर डासिमाम फ्लिकदोसि खाबाकेन लामा ङ्यासेरिक्यार तामसोर थेजि– क. अमितसे सिमाना ङामरि शहादत याङ्जि । चु तामसोर थेमाहेन्से ङाला क्रास्यारि स्याबा चुजि– घाईते तासि दोगाबा थे स्ह्यो । पोर चाङ्ना लाबाकेन लामा म्राङ्बा ग्रुङ, कुमारीसे लाबा थे छोत । ‘ङादा तिगाइ आता । चुह्राङ्बा घाईतेमि कात्ते ताजि कात्ते...’ बिबा अमितला पाङ्बा । काकार लासि क्यामेराला रिल ह्राङ स्याबारि चुजि । थे तामसोरसे कुमारीसे ह्रेङ्बा बु बुन्जि ओम ङामरिन मुबा मेलला याखारगि हाँगा फाक क्युइसि ङ्हाच्छा ब्राजि । युद्धकला सिपाही हिन्ना । न्हा निरास ताबारि न्हा गाबो ताबारिन छुट याङ्ला । मु ङ्हार्ना लासि न्हा ङेम्याङ्ला न्हा सेम साल्ना क्राम्याङ्ला ।
ग्रेन आरेसाइ नोन जाजाबा सेम मुबा । जनयुद्धला सफलताला छ्याम डाबा काप्तोनरि गणतन्त्रला दाज्र्युसे ज्योसि न्हुपला चे ग्वेभाराजुगुदा स्यारला सेलो, साकेला उपहार पिन्छि पुइबा । सिस्ने, जलजलादा ज्योमोलोङ्मो थेन महाभारतला राप पुइबा ओम सुनकोशी थेन अरुणला सुस्केराला छ्याम स्यारला जनयुद्धला बिरासत पुइबा । तासाइ, तिनि चेजुगु चुरिक्यार नोन नुप्जि । ज्योमोलोङ्मा पिकेरिन सुस्ताप ताजि । ए नुप्मा हेन्से हिन्ना गणतन्त्र फेबा । ए सुस्ताप तामाहेन्से हिन्ना राजतन्त्र नुप्बा । थेतासि क्योङ स्ह्यो फेला दिनि एलान डान्बा थोसिमाम, मुतेबा ङ्यासे नुप्ला दिनि एलान डान्बा ख्लासिमाम । तोङ्जाछा न्हुपला चेजुगुला डान्बारि ।
(छिगकि दोनः नुप्बा– अस्ताउनु, ङ्हार्ना– गर्जिने गरी, काप्तोन– उत्सव, ज्योबा– सिंगार्नु, जेबो–उमंग, गाबो–उत्साह, ग्रेन्पो– प्रमुख, क्योन्बा– उपचार, पाङ्ग्याल– मैदान, स्हेर– पीडा, म्हे– जना, छोत– संकेत, उन्पाङ्जि– जनाए, नाबा– बिरामी, निसाल– उत्तर, राप– कथा, ग्यारेम– अभ्यास, ह्रावाङ– सुरक्षित, डिछ्याबा– व्यवस्थित, दोन्ता– उद्देश्य, ह्रुन्बा– घोलिएका, रोरो– फलफुल, कोङ्ह्रावा–सुरक्षा, गोङ्बा– कठिंग्रिएको, स्हिक्बा– चित्कार, गेल्सि– गलिसकेका, नाछाल– अवस्था, ल्हुइथाङ्बा– स्वस्थ्य, ह्राङ्साप्तोपा– स्वयंसेवक, छ्यायोद्धा– सहयोद्धा, छेन्दे– लास, ग्यानाक– चिनियाँ, ग्यु– चौंरी, चाङ्ना– सफा)
दोःबा : यकिना अगाध
तपाईको प्रतिक्रिया दिनुहोस