ल्हानान दुइ लिच्छा
ल्हिबा छोर्ला
थानथान यारि थोबा
याखारगि याङ्बा दाप नोन । 
थेह्राङ्बान छोर्बा मुसिम
खारेरि च्योबा जन्जिर
ह्राङ्बाङ्बा म्हाबा
नाकिदा ।

खिबा नाकि
जेक्खे खिबा आता जन्जिरसे
थे ग्याप्पा ह्राङ खिबा ताला नियमसे
स्ह्योरि रेमाहेन्से
न्हाङ्गार स्ह्योरि आरेतेदोना
अविरल अविराम 
तयार खात्दामा दुइ 
ग्याप्पाला भूमिकारि ।

खिबा नाकि चितोबा ताला
कुटिसि खाजिबाइ अपराधी ह्राङ
दोप्तासे स्होपिन्बा कठघरारि 
ओम लातोबा ताला प्रमाणित 
ह्राङ इमानदार मुबा
ह्राङ्दा खिथान्बा दोप्ताफिरि ।

नियम हिन्ना थे
दोप्ताला काकार छिग
छोतरि ताङ्बा उन्बारि
क्राथोरि थान्बान आज्ञा
ह्योङ्तोबा ताला मे । 
आताङ्मा खाइमागि
नाकिला चुबा
प्रष्टन थाहा मुला दोप्तादा 
चुबा नाकिसे आख्राप बिसिमाम । 
दोन आरेबा ताला
चुबाजुगु कात्तेन ग्रेन काइरि मुसाइ नोन ।

दोन आरेबा ताला ओम चुह्राङ्नोन लासि
ह्याङ्ला काइजुगु नोन ?
वेवास्ता लाला ओम थेह्राङ्नोन लासि
ह्याङ्ला आताङ्बाजुगु नोन ?

फेबा आरे ले
नाकि थेन ह्याङरि ?
नाकिदा दोप्दासे दाम्ला 
ह्याङ्से दोप्दादा दाम्ला ।

(छिगकि दोनः याङ्बा– हलुंगो, ह्राङ्बाङ्बा– स्वतन्त्रता, ग्याप्पा– दास, दोप्ता– मालिक, छोत– संकेत, दोन– अर्थ)

दोःबा : यकिना अगाध