ह्राङ्दा परतिबा दुःख, ह्राङ्जा परतिबा स्हेर, ह्राङ्से नाबा बिछोड जेक्खे ग्रेन छोर्बा चिम । सायद म्हिला ह्रिक्पा चोस्बान तामुनाम ।
डान्बारि म्युख्लि काराङकोरोङ क्रिप लेङ्बा मुला, आमाला डान्बाजुगु । क्षितिज क्याम्साङ मुरि चिबा पापा धर्सो गि खासु ह्राङ्बान ।
आमा आरेबा ३९ गोर आमाख्वाबा थुमथुमजुगु थाजिन्बा मुला । दारेम योनान ४० छा ं आमाख्वाबा थुमथुम ङामरि खाबाकेन मुला ।
आमा चु जेबा दुनियाँ उपहार पिन्बा दानी । चेगाइ, ममता ओम करुणाला खानी । आमाला लि च्याबा रे चुर्सेला ज्योज्यो क्यार्सेला नाना थारेङ हेन्से आमादा ह्रुप ताबारि, आमाला लि च्याबारि झोला नाङ कोसेली ओम तिङनाङ चेगाइ थोसि खाबा म्राङ्मा ओस्सोन मि साउन दोपिन्ना ।
ङ्यासे म्हेर्बा ङ्हाच्छा आमादा ल्हानान डान्सि म्हेर्ला । आमा म्हाङ नाङ ज्योन्खास्हिगो ओम म्हाङनाङ आमादा ज्याबाज्याबा मिष्ठान सोल्बास्हे थेन तिङनाङला चेगाइ पिन्म्याङ्गाइ बिसिमाम । तासाइ ङाला कल्पना म्हाङरि आछ्यो । अधुरो म्हाङला चाहना ङोन्छुपनाङ मिला बाँध बोसि सेमला सेमरि भिषण डुइ निपिन्ना । ङा थेनोन डुइतेन ब्योङसि ङाला केवाला बिजादुइला ख्युरुरु दोबा याङ्ला ।
आमा आरेबा आमाख्वाबा थुमथुम निरास थेन निर्जन छोर्बा चिम । निरास ओम निर्जन तासिमा आमाला डान्बारि ल्हानान आपाङ्बा निर्जीव कुला ङामरि नाङ्साल म्राला, आस्थाला क्रिप डान्सिमाम ।
खास्योर छ्योर्तेनरि दोमा आमाला मिनरि ॐमाने पद्मे ङासि नाङ्साल म्राला, आमा ब्रास्ह्युबा लालोकरि खाइमाइ दोप आतागाइ बिसिमाम । लाथानरि दोमा रामनाम ङाला, आमाला ल्हामरि छाक्राम आहागाइ बिसिमाम ।
ङादा चु चेबो दुनियाँ उपहार पिन्बा ङाला आमाला गर्भरि ह्राङ्ज्युङकि नियमसे तोक्दिबा दुइदोना चिबा सौभाग्य याङ्जि । बेजाङ रि ताङसि तासि आमाला लोहरी ङ्यान्सिकेन खामा, ङ्हे आखामा का नोन थुङ्जि ताला ।
तिगाइ आगोबा मुबा तिगाइ थाहा आरेमुबा, आमाला कुरि लुटुपुटु तासिकमाम जाजाबा काङफ्लाला जाजाबा ल्याक्पासे ब्वाङ ब्वाङ कुरि छेप्सि छेप्सि ङ्हे थुङ्जि, स्वर्गीय आनन्दला अनुभव ह्रुप्सिमाम । दुइतेन ब्योङ्सि पुइमु ल्हेसिकेन कोसोक कोसोक ब्राबारि खाम्बा स्होस्ह्युजि आमासे ।
ङाला जाजाबा नाबारि म्हुक्काकार आम्हेर्ना चिसि बोन्बोला ङदा मात ख्वाबान डाक्टरी मानरि आमाला चेगाइ छ्योल्सि ख्वासि फान्ना लास्ह्युमुबा । चोत्ते ज्याबा आमाकोलाला लेप्बा चेगाइरि योनान दैवला मि ल्हागतिजि ।
खाइ ! थोप्साङसे बिले व्हा थोप्साङ आरेबासे, ङाइ याङ्बा केवासे आमाला चेगाइ ल्हाना ह्रेङ्बा दुइदोना याङ्बारि आखाम्नि । आमासे नोन कोलाला चेगाइ खाराङ्बा ताला बिबा तामला अनुभूति ह्रुप्बारि आयाङ्जिमान ह्रो शाश्वत देन्बा डोङ्बाला आज्याबा दुइला दाम्बारि परतिस्ह्युजि ।
विसं २०४१ ड्वाफ्रे ४ गते, ङाला ममतामयी आमाला केवासे नाबा लिच्छाला रे । डोङ्बाला ङ्यान्दि ङोसेबारि आखाम्बा नोइ । रिठ्ठे बोन्बोसे पाङ्बा आन्सार वीर थेन वायु डिक्सि ब्यान्बा रो ङाला आमाला केवा ।
आमासे चु जेबा दुनियाँदा सातानला लागि ख्लासि निबाकेन लामा ह्रोसे नाबा दिङ जेक्खे च्युइ सोमला मुबा । केवा जेक्खे चुबा मुबा ह्रोला । आमा म्हाबाकेन लामा ङा जेक्खे दिङ ङ्हाला मुबा रो ।
आमाला तुन्बा छेसे तिगा तिगा आज्याबा लाजि, तिगा तिगा न्होङ्ना लाजि थे दुइला छ्याकछिग निबा सेम फ्रेबा राप ब्रिसि ब्रिबारि आखाम । आज्याबा म्लाङ म्हुनह्राङ्बान मुबा । आउदिन रुङ्बा ह्रिला तिगाइ आम्राङ्बा म्हुनला दोप ह्राङ्बान ।
ङाला केवाला चुतिबा । खाइ तिगा तिगा लासि, खाराङ खाराङ लासिमाम छार्ना लाजि ओम डोपिन्जि ङाला याकार आपासे । आमाला ह्राङ्बान चेगाइ पिन्बारि आखामस्ह्युजि ताला तासाइ ह्रोला हैसियतसे ख्युप्तेदोना कर्तव्य छ्योना लाबारि कसर थानआस्ह्युनि । ह्राङ सोतेदोनाला केवा क्योङ ङाफिरि लगानी लास्ह्युजि ङाला आपासे ।
आमा गोल्छेसे बुल्खु तासिकेन निबाला डान्बारि मुस्ह्युला । आमासे म्लेसिकेन निबा खेःबा डान्बाला मि झ्यालग्याम थोम तासि ङादान च्याचिबा ह्राङ छोर्ला । म्हाङजुगुरि खाइमागि खास्ह्युला । ओस्बान ङादा ख्लासिमाम ब्रास्ह्युबा दिङला ह्राङ्बान ।
गुलाबी छोनला आङरे, गाउनला स्ह्यामा ओम खाँडिला केरि ज्योबा, ङाला डान्बान डान्बाला तोङ, ङाला सेमलोकला निजी काल्पनिक केवारि डोङ्बा लिच्छा सोस्ह्युबा मुला ङाला आमा । खाइमाइ खुयु दोआतो ङाला आमा । ङातेबा खेप्पा नोन दोआतो ।
नियतिले स्होबा नियम आङ्यान्बारि आडिक्बा चिम । आखाम्बा चिम । नातोबा चिम । नाबाला विकल्प याकार याकार तासिमाम क्राबा, क्रिङ्बा, स्हिक्बा बिमा स्यान्दो तिगाइ लाबारि आखाम्बा चिम ।
ङाला केवा ग्याम ममतामयी आमादा दैवसे ब्यान्बा दशक गि छ्योआछ्योरिन दोसि दैवला मि ल्हागतिजि ङाला जाम्बुलिङरि । दैवला मि ङाला आपाला केवारि परतिजि । ह्रोदा ङ्हाच्छा वाङ्बारि आपिन्नि । ह्रोदा ग्लाला ग्लारि काजि । ह्रोसे बुन्बा सा ब्यान्जि । ह्रोला कल्पना, म्हाङ मोक्कोन मोक्कोन ब्यान्जि । कोलादा असल म्हि स्होसिमाम कोलाला पौरखरि सोबा रहर ब्यान्जि । आमादा ह्राङनोन लासि ब्यान्सिन ख्लाजि ङाग्याम ।
आमा म्हाबा तिगाइ दुइलिच्छा ताबा आपाला डोङ्बासे ङाला केवा खण्डहर ह्राङ्बान दोबा मुबा । मेसे चाबा भग्नावशेष ह्राङ्बान दोबा मुबा । मेसे ख्राङ्बा, क्रोबारि आखाम्बा फोङ रेबा डेङ ह्राङ्बान । ङातेन ङाला आपाला आपा आमा स्ह्युमुबा । थेलिच्छा गाङजोरि दोबा दिनि ह्राङ्बान दिङ मुबा म्हेमे मामतेन सोबारि चुजि । ह्रोनिला पाको चेगाइला ह्रो याङ्सि ।
सोसि–सोसिकेन दाते ङा केवाला गाङ्साल ग्यालामरिक्यार दोगाजिन्बा मुला । केबा, डोङ्बा सेबारि खाम्बा ताजिन्बा मुला । तासाइ खाजिबा दुइ ङा ग्याम ङाला चेबो म्हिजुगु रेमदाङ्से म्हाजि तिगा ताजि ताला ङाला सेमरि ? खाराङ्लासि गुजाराप लाजि ताला थे कठोर रेजुगु ? दाते डान्मा ल्हुइनाङ पुजु फुइला ।
ख्ला पिन्गो, तिगा तातोबा मुबा ताजिन्जि । थाल्बा तामदा डान्बा बिमा स्यान्दो तिगाका लाबारि खाम्ला ले ? ङाला ह्राङ्बान राप मुतेबा म्हिरि परतिला ।
नाबा फेबा फेबा ताला ताला । थेतासिम छोर्बा चिम ह्राङ्दा परतिबा स्हेर जाम्बुलिङलान मोक्कोन बिमा ग्रेन । डान्ना, डान्बा बिमा स्यान्दो तिगा लाबारि खाम्ला ले ?
कल्पना लाला, दातेदोना ङाला आपा आमा ङातेन मुबा हिन्साम कात्ते ताङ्बा केवा तासेला मुसिम ! खात्दामान लासाइ नोन आमाला ह्रिबा छ्योना लासेला । आमादा सेम निबा तामजुगु छ्योना लासेला । ङेङगोरला पाङ्बा आन्सार ङाला आमा आउदिन आस्थिक मुस्ह्युमुबा रो । दाते मुबा हिन्साम चार धाम कोर्बारि बोर्सेला ।
खाजिबा दुइ ङातेन ङाला आपा आमा मुस्ह्युमुबा, ङातेन तिगाइ आरेमुबा, ह्रोनिला लागि तिगाइ लाबारि । तिनि ङातेन तिगाइ मुला । ह्रोनिदा तिगाइ लाबारि खाम्ला, ह्रोनिला इच्छा थेन चाहना छ्योना लाबारि खाम्बा ताबा मुला तासाइ ह्रोनि ङातेन आरे । मुला ओम जेक्खे डान्बा, ङाला सेमरि ।
रेम रेम डान्बारि कल्पनासे आमातेन ह्रुप लापिन्ना । तासाइ यथार्थरि न्हा ङाइ आमादा ह्रुप ताबारि खाम्ला, न्हा आमासे ङादा । दिङजुगुला बोसे आमातेन बिछोड लापिन्बा दुइला दूरी थारेङ थारेङ स्होबाकेन मुला । थारेङ तासिकेन निबा दूरीसे ङादा खेप्पा स्होबाकेन मुला ।
खेप्पा दोसिमाम ङा नोन आमा आपा ह्राङ्नोन डोङ्बाला चेबो दोला । केवाला शाश्वत देन्बातेन हातेमालो लाला । ओम छोर्ला सेमरि डोङ्बा लिच्छा स्याप्ला ताला कि आस्याप ताला ङाला आपा आमातेन ? ङाला भ्रम हिन्ना चु । ङाला कोरा कल्पना हिन्ना । जाकि योनान वियोगान्तला देन्बारापसे खिल्बा ङाला केवाला अनुभूति हिन्ना चु ।
यथार्थरि ङा सोबा मुला । ह्रोनि आरेबा अधुरो दिमथेमेतेन । छ्यामरि ङातेन जेक्खे डान्बा मुला । ओम केवा गोआम्याङ्बा दिङरि लोङ्सि आमा थेन आपादा दागबत्ती पिन्सि ख्राङ्बा सिम्बा दुर्सा मुला । हार्दिक श्रद्धासुमन आपा आमा !
(छिगकि दोनः म्युख्लि– धूमिल, क्रिप– बिम्ब÷छाँया, नाबा– भोगेको, चेगाइ– माया/प्रेम, नातोबा– सहनु पर्ने, चेबो– प्रिय, ह्रिक्पा– स्वभाव, गोर– वटा, थुमथुम– औंसी, केवा– जीवन, बिजादुइ– बालापन, कु– मूर्ति, खास्योर– बौद्ध, छाक्राम– अवरोध, ह्राङ्ज्युङकि– प्राकृतिक, बेजाङ– कोक्रो, नाबा– बिमार, ङ– मन्त्र, थोप्साङ –भाग्य, ङ्यान्दि– कारण, नोइ– रोग, चुतिबा– आरम्भ, याकार– एक्लो, खेःबा– पुरानो, ज्योबा– सजिएकी, तोङ–शून्य, केबा– जन्मेको)
दोःबा : यकिना अगाध
तपाईको प्रतिक्रिया दिनुहोस