पोखरा । नेपाल तामाङ घेदुङ जोङ समन्वय दाछोक कास्कीला ब्रेछा छेजोम ताबा मुला । गेताङ नेपाल तामाङ घेदुङला संघीय स्यानचोहो दीपक वाईबा तामाङला ग्रेनडोन्बोरि ताबा हिन्ना ।
गेताङरि ग्रेनडोन्बो तामाङसे जनजातिला गेदुङ–गुन्दुनजुगुसे लिच्छाला दुइरि समुदायला लागि ओत्ते महत्वपूर्ण गे लाबारि आखाम्बा पाङ्जि । थेसे ग्याल्सा नोन बिबाह्राङ जिम्मेवार आताबासे समुदायला ङोसेबातेन च्योच्यो याङ्तामला ङ्योलोक नोन ताङ्से कमजोर तासिकेन निबा पाङ्जि ।
छेजोमग्याम मिनमाया तामाङला चोहोदानरि १५ ह्रोमिकि छार दाछोक दाम्बा मुला । स्यानचोहोरि ऋतु तामाङ थेन रमेश तामाङ दाम्बा मुला बिसाम गाउराइरि योगिता तामाङ थेन न्होरचोहोरि नरबहादुर तामाङ दाम्बा मुला ।
ह्रोमिजुगुरि शेरबहादुर तामाङ, बुद्धिमाया तामाङ, सन्तोष तामाङ, केशबहादुर तामाङ, राजु तामाङ, यामकुमारी तामाङ, शर्मिला तामाङ थेन कमला तामाङ दाम्बा मुला ।
गेताङरि ग्रेनडोन्बोग्याम घेदुङ कास्की जोङ्ला स्हेङ्खेन ह्रोमि रुप लामा घिसिङदा ‘रमेश रत्न पुरस्कार,’ ह्रोल्ज्याङपा संगीतकार श्यामसुङ तामाङदा ‘अमर रत्न पुरस्कार’ पिन्बा मुबा । गेताङरि स्हेङ्खेन ह्रोमि आईबहादुर तामाङदा खदा दोसल्ला थेन तिगाइ नगद पुरस्कारसे डेन लाबा मुबा ।
जोङ चोहो भक्त तामाङला चोहोदानरि ताबा छेजोमला संचालन वरिष्ठ स्यानचोहो मिनमाया तामाङसे लाबा मुबा बिसाम स्यानचोहो ऋतु तामाङसे डेन सेमताम थान्बा मुबा ।
(छिगकि दोनः छेजोम– अधिवेशन, जोङ– जिल्ला, दाछोक– समिति, स्यानचोहो– उपाध्यक्ष, गेदुङ– संघ, गेन्दुन– संस्था, ग्याल्सा– राज्य, ङोसेबा– पहिचान, याङ्ताम– अधिकार, ह्रोमिकि– सदस्यीय, स्हेङ्खेन– संस्थापक, ह्रोमि– सदस्य, ह्रोल्ज्याङपा– संगीतकार)
तपाईको प्रतिक्रिया दिनुहोस