वीरगन्ज ५ दुगु । भोजपुरी ग्योइ, ग्योइकाइ ज्योस्हेङ थेन रिमठिमला फेल्गेबारि योगदान पिन्बा नेपाल थेन ग्यागारलिङला ग्योइकाइब्रिखेन थेन कलाकारजुगुदा वीरगन्जरि पुरस्कृत लासि डेन लाबा मुला । वीरगन्ज महानगरपालिकाग्याम स्हेङ्बा भोजपुरी प्रतिष्ठान वीरगन्जसे कामरे नेपाल थेन ग्यागारलिङला ग्योइकाइब्रिखेन थेन कलाकारजुगुदा पुरस्कृत थेन डेन लाबा हिन्ना ।

गेताङरि ‘पण्डित दीपनारायण मिश्र स्यानह्युल पुरस्कार–२०८२’ ग्याम ग्यागारलिङला झारखण्ड ग्याल्साला राँचीरि चिबा भोजपपुरी ग्योइला ग्योइकाइब्रिखेन कनक किशोरदा पिन्जि । ‘उमाशंकर द्विवेदी ग्याल्साङ पुरस्कार–२०८२’ बाराला कलैया उपमहानगरपालिकारि चिबा ग्योइकाइब्रिखेन रामप्रसाद साहदा थेन ‘भोजपुरी ग्याल्साङ प्रतिभा पुरस्कार–२०८२’ वीरगन्जला डा. शशीभूषण बर्णवालदा पिन्जि ।

‘भोजपुरी प्रतिष्ठान प्रतिभा पुरस्कार’ग्याम डा. शशिभूषण साह, मोतिउर रहमान, विक्रम साह, फोनिज संघीय दाछोक ह्रोमि प्रतिमा चौधरी, गणेश परियार थेन लालमुनि देवीदा म्हिदाङ्से ११ तोङ्जा रुपैयाँ नगद, डेनस्यो ओसेम दोसल्ला कुसि डेन लाबा मुबा । ‘भोजपुरी प्रतिष्ठान प्रोत्साहन पुरस्कार’ रोशन कुमार कलवारदा नगद ११ तोङ्जा रुपैयाँ, डेनस्यो ओसेम दोसल्ला पिन्बा प्रतिष्ठानला ह्रोमि अजय चौरसियासे ग्रादाङ पिन्जि ।

गेताङरि वीरगन्ज महानगरपालिकाला मेयर राजेशमान सिंहसे थे मोक्कोन स्रष्टाजुगुदा दोशल्ला कुसि कदरस्यो थेन नगद राशीला छ्याम पुरस्कार पिन्बा मुबा ।

गेताङरि ग्रेनडोन्बो वीरगन्ज महानगरका मेयर राजेशमान सिंहसे ग्योइ थेन रिमठिमला ख्युरछ्यारि महानगरपालिका सातान सकारात्मक मुबा पाङ्जि । थेसे भोजपुरी प्रतिष्ठानला लागि ग्रेन योजनाला छ्याम ङ्हाच्छा वाङ्बा उल्लेख लाबान खाबा रेरि प्रतिष्ठानला लागि भौतिक संरचना डिछ्याना व्हना सुताइ गे लासेला पाङ्जि ।

गेताङरि मधेश विश्वविद्यालयला उपकुलपति डा. दीपक शाक्य, नेपाल स्योमि गेन्दुनछेन पर्साला चोहो ओमप्रकाश खनाल, प्रतिष्ठानला चोहो अनिता साहसे ह्राङ्ह्राङ्ला सेमताम थान्बा मुबा ।

स्योमि माधुरी महतोसे संचालन लाबा गेताङरि प्रतिष्ठानला ग्रोइपा प्रमोद पाण्डेसे डेन सेमताम थान्बा मुबा । 

(छिगकि दोनः ग्यागारलिङ– भारत, ज्योस्हेङ– कला, फेल्गेबा– विकास, स्ह्यानह्युल– अन्तराष्ट्रिय, ग्याल्सा– राज्य, ग्याल्साङ– राष्ट्रिय, तोङ्जा– हजार, ह्रोमि– सदस्य, ग्रादाङ– जानकारी, ख्युरछ्या– संरक्षण, डिछ्याना– व्यवस्थापन, व्हना– तर्फ, स्योमि– पत्रकार, गेन्दुनछेन– महासंघ, ग्रोइपा– सल्लाहकार)