याखारगि दयालु पुख्रिसे याखारगि जाजाबा ब्रिप्चिल (गौंथली)दा फ्याङ चुङ्सि ह्राङ्ला नियन्त्रणरि किन्जि । थेदा तिक्खुरिन ग्लोङ्बा फोख्रेन्चिबा मुबा तासाइ थेसे थेह्राङ आलानि । थेसे म्हान्जि– चुह्राङ लासि सोझोन ग्लोङ्बा आउदिन निर्दयी गे हिन्ना, चुह्राङ्बा क्रुर ह्रेवा लाबा ज्याबा आता ।
थेसे चोत्ते म्हान्छि ङ्हाच्छा ब्रिप्चिल ख्यारख्युर गोल्छेसे ह्राङ्दा ख्वारारा ख्युर्सि कुण्डली स्होजि । थेलिच्छा ह्राङ्लान कुण्डलीला जेबाला प्रशंसा लाबारि चुजि ओम ब्रिप्चिलला ध्यान स्यान्दो ग्लारिन दोना लाजि । थेसे ब्रिप्चिलदा विश्वास ताना लाबान पाङ्जि, ‘ङाइमि एला कोङ्ह्रावाला लागि जेक्खे चुह्राङ लाचिबा मुला । ए ह्राङ नोन ङाला कुण्डलीग्याम थोन्सि ज्याना लासि ङाला सुङ न्हाङरि वाङ्जि बिसाम ए झन कोङ्ह्रावा ताला । दारेम एसे ह्राङ्लान थोप्साङरि भरोसा थान्बा ज्याबा ताला ।’
पाले आरेबा जाजाबा ब्रिप्चिल थेला म्हार ह्राङ्बा ङ्याम्बा थेन केकेबा छिगरि फस तिजि । पुख्रिला आश्वासनला लोभरि विश्वास लासि थे ब्रिप्चिल पुख्रिला सुङ न्हाङरि वाङ्बारि निजि– तिक्खुरि पुख्रिसे थेदा क्लोक ग्लोङ्जि ।
ग्लोङ्बाकेन लामा नोन पुख्रिसे ज्युम ङेसि पाङ्जि– ‘च्यागोम, ङा कात्ते दयालु थेन प्रजातान्त्रिक पुख्रि चिम । पुख्रि हिन्ना ! तासाइ ङा स्यान्दो पुख्रि थेन ङ्ह्याम्बु बिमा ल्हानान सभ्य मुला । ङा ह्राङ्ला शिकारदा जबर्जस्ती आहिन, कोङ्ह्रावा पिन्बा ग्रान चासि ताङ्ना लासि जेक्खे ग्लोङ्ला । देन्बान पाङ्गे बिसाम ङा ल्हानान ङ्याम्बा तिङ मुबा पुख्रि हिन्ना । स्यान्दो पुख्रिजुगु ङा ह्राङ्बा खानाङ ताला ओम । थेनिम आउदिन क्रुर, निर्दयी थेन ख्युन मुबा ताला ।’
(छिगकि दोनः ह्रेवा– व्यवहार, कोङ्ह्रावा– सुरक्षा, थोप्साङ– भाग्य, पाले आरेबा– निर्दोष, देन्बा– साँचो, ख्युन– विष, पुख्रि– सर्प, ङ्ह्याम्बु– नाग)
(ग्यानाक (चीन) ह्युलला राप । दोःबा : यकिना अगाध)
तपाईको प्रतिक्रिया दिनुहोस