कलम चुङ्बा याजुगु
ओम लिउरि रकेट स्होबा
सिर्जनशील क्रास्याकादेला हर्कत किन्बारि
खाराङ्लासि खोबा आरेबा दोचिबा मुला ।
क्लाङ्स्हे क्लाङ्बा याजुगुदा
ओम वाला सागररिक्यार ल्हाम ब्राबा
कलिलो काङजुगुदा
तिल्दा बर्बादी स्होचिबा मुला ।
म्हारफ्युर दिनिला बोरि
चिवारि चरी–कंक्रिट
ओम बारुदला मुस्लो तातोबा
काछ्युप लिकादे–
दया, करुणासे
तिल्दा विछिप्त आरे ?
दातेला दुइ चुुरि,
जाम्बुलिङ्ला देन्बाला बो गि
ह्रिचिबा मुला ।
ओइ दयालु म्हि !
चु आज्याबा रेदा
चु आज्याबा दुइदा–
खाजिबा आत्मासे स्वीकार तिला ?
ओइ म्हि सभ्यता !
खाजिबा स्यान्दो साजाम्बुलिङग्याम
बाँसुरीला धुन ह्रापचिबा मुला
थेसे आम्राङ
खार्पानाङ क्राक्रिङ्बा थोसि
सिम्बा मुला सिरकसे रिल्सि
सोचिबा मुला–
सिचिबा मुला–
कलिलो तिङकादे ।
छार हिटलरसे
चु युगरि ह्राङ्ला ‘धब्बा’ ल्हागाब लासिकेन
थेनोन खेबाः का थेन बारुद
दोसिनोन ठाम्बाकेन मुला ।
चु ग्यालामरि
चु विक्षिप्त बगररि–
म्हेन्दोला खेती लाबा
बुद्धिमान थोन्गाइ ।
न्हाब्याङ्दा आज्याना छोर्ला
तिल्दा केजि
बोमो थेन क्रुरताला संघाररि ?
केवा थेन डोङ्बा
वास्तवरिन खाराङ्बा ताला
केवा ङ्हाच्छान नातोला ?
ओइ सेबा म्हि !
ओइ दयालु म्हि !
ङानि याकार ताजि–
ङान्दा लिउ आहिन
ह्राङ्बाङम्हाइबा दातेला दुइ बाउ !
(छिगला अर्थः ह्राङ्बाङम्हाइबा– मुक्तिकामी, लिउ– भविष्य, क्लाङ्स्हे– खेलौना, ल्हाम– यात्रा, म्हारफ्युर– सुनौलो, चिवा– थाप्लो, काछ्युप– रक्तमुछेल, जाम्बुलिङ– विश्व, देन्बा– सत्य, साजाम्बुलिङ– धर्ती, क्राक्रिङ्बा– क्रन्दन, मु– आकाश, खेबाः– पुरानो, नाबा– भोग्नु, सेबा– जान्ने)
दोःबा : यकिना अगाध
तपाईको प्रतिक्रिया दिनुहोस