रेगो !
रेगो !!
रेगो !!!
तामाङ छारिब्योन
तिनि दुइ ह्राङ्सेन
ह्याङ्ला म्राप ठोक्चिबा मुला !
ह्याङ मौन चिमा
दोङरापसे ह्याङ्फिरि
फैसला पाङ्जि,
तिनि तामथान्बा पालो
ह्याङ्ला हिन्ना !
ह्याङ ल्हागाङग्याम केबा हिन्ना,
युङ्बासे ग्यालाम काबा आरे
युङ्बासेन
ह्याङ्दा कोङ्ना लाबा मुला !
ह्याङ्ला टु
साप्रारि ताइसि
रिमठिम दोबा मुला,
ह्याङ्ला का
दोङरापरि छ्योल्सि
ङोसेबा दोबा मुला !
बिउ–
ह्याङ खाला हिन्ना ?
ह्याङ तामाङ हिन्ना !
ह्याङ खाजिबाइ दया म्हाइचिबा आरे,
ह्याङ याङ्तामला
न्याय म्हाइचिबा मुला !
गोइलो ह्याङ्ला गौरव हिन्ना,
ग्योइ ह्याङ्ला आत्मा हिन्ना,
बोन संस्कार
ह्याङ्ला चेतनाला मेरुदण्ड हिन्ना !
चु खाजिबाइ
ङ्हाउला अवशेष आहिन
चुमि
लिउला नाङ्साल हिन्ना !
ग्युइसेर ह्याङ्ला हतियार हिन्ना,
चेतना ह्याङ्ला ढाल,
दोपतेन सम्झौता आहिन
ह्यालतेन संघर्ष
ह्याङ्ला ग्यालाम हिन्ना !
प्लेन तासि आहिन
एकतारि ह्याङ्ला बाङ मुला !
लोङ्सि आहिन
संघर्षरि ह्याङ्ला अस्तित्व मुला !
तिनिला चु छेजोमछेन
कागजला जोम्बा आहिन
चुमि
चेतनाला कापाङ हिन्ना !
ह्याङ गोछापा जेक्खे आहिन
ह्याङ ग्युरपोबा हिन्ना !
ह्याङ ङ्यान्खेन जेक्खे आहिन
ह्याङ दोङराप हिन्ना !
रेगो तामाङ छारिब्योन !
रेगो तामाङ चेतना !
रेगो तामाङ लिउ !!
तिल्दाबिसाम...
दोङराप दोसि ब्रिबाकेन मुला...
ओम
चुरेम कलम
ह्याङ्ला यारि मुला !!!
मिरिक, दार्जीलिङ, भारत ।
(छिगकि दोनः– छारिब्योन– युवा, याङ्ताम– अधिकार, ङ्हाउ– भूतकाल, लिउ– भविष्य, ग्युइसेर– शिक्षा, छेजोमछेन– महाधिवेशन, कापाङ– घोषणा, जोम्बा– सभा, ग्युरपोबा– परिवर्तन, ङ्यान्खेन– श्रोता)
दोःबा : यकिना अगाध
तपाईको प्रतिक्रिया दिनुहोस