याम्बु । तामाङजुगुसे मञ्जुश्री संवत् २८६२ ला सोनाम ल्होछार (ता ल्हो)ला दुइसाङरि याम्बुला टुँडिखेलरि ङ्हीरेला गेताङ स्हेङ्जि । ख्रेला ४ थेन ५ कुनु नेपाल तामाङ घेदुङला थुछापारि ताबा ग्याल्साङ सोनाम ल्होछार २८६२ ता ल्हो मुल काप्तोन दाछोकसे काइब्लोन शुशिला कार्कीला ग्रेनडोन्बोरि गेताङ स्हेङ्बा मुबा ।

गेताङरि निबा दिङ्कादेरि ह्राङ्नोन ल्होलो डोन्बोकादेला ल्हेङ्मो थान्बा, मौलिक स्याबागोबा ओन्बा थेन तामाङ ह्युल्बाला ल्होलो थुमला म्हिकादेदा डेन लाबा मुला । तामाङ गोइलो क्वान्सि गेताङ ठोङ्सेङ लाबा काइब्लोन कार्कीसे तामाङ गोइलोला प्रशंसा लाबान ल्होछारला रेकुनु तामाङ गोइलो थेन तापग कुम्याङमा ह्राङ्नोन तामाङनोन दोबाह्राङ्बा छोर्बा पाङ्जि ।

थेसे नेपालला ङ्हाच्छा ग्रेन जनसंख्या मुबा तामाङ ह्युल्बाला सामाजिक, रिमठिमकि थेन धार्मिक ठिमसे ह्राङ ल्हानान प्रभावित ताबा पाङ्बान चुसे नेपाल ह्युललान ङोसेबा ओन्बारि विशिष्ट योगदान पिन्बा मुला बिसि पाङ्जि ।

गेताङरि नेपाल तामाङ घेदुङला चोहो मोहन गोलेसे तामाङ ह्युल्बाला ग्यालठिपा थेन रिमठिमकि याङ्ताम किन्ताबारि बेनान गिक तातोबा पाङ्जि । थेसे ह्युलरि दात्ते चुनावला माहोल लेप्पा दुइ ताबासे तामाङकादेसे च्याखे जुबा जेक्खे आताना ग्यालठिपा जुवाला खालरि फाप्तोरि दाल्ना लाजि । थेसे संघीयता, समानुपातिक समावेशी थेन धर्र्मनिरपेक्ष ग्याम ह्युलदा ग्याप्से बोर्बा बाङ आलाबारि ग्यालठिपा छार खेबाः दलकादेदा खबरदारी लाजि ।

गेताङरि ङ्हाच्छाला ब्लोनकादे शेरबहादुर तामाङ थेन परशुराम तामाङ, एमाले गोबोन थेन नेपाल तामाङ घेदुङला ग्रोइपा  शान्ति पाख्रिनतेन स्यान्दोकादेसे ज्याबाम्हान्बा सेमताम थान्बा मुबा ।

गेताङरि घेदुङसे ल्होलो थुमरि विद्यावारिधिजुगुतेन स्यान्दो व्यक्तित्वकादेदा डेन लाबा मुबा । डेन याङ्बाकादेरि डा.बलबहादुर तामाङ (त्रिभुवन विश्वविद्यालयग्याम गणित विषयमा विद्यावारिधि), डा.गणेश तामाङ (त्रिभुवन विश्वविद्यालयग्याम प्राणिशास्त्रमा विद्यावारिधि) थेन शिक्षा योन्जन (झेजियाङ नर्मल विश्व विद्यालय चीनग्याम शिक्षाशास्त्रमा विद्यावारिधी) मुला । ओराङ्नोन लासि देवकुमार स्याङबोदा तामाङ ह्युल्बारि गिक्छा रेम नेपाल सरकारला स्यानगाराइरि मिन तेबारि सफल ताबारि डेन लाबा मुबा ।

गेताङरि चतुर कुमार तामाङ, ज्योमोगाङ आरोही थेन पर्यटन छोङ्नापा थेन कराँते क्लाङ्बा सानुमाया थिङ मकवानपुरदा डेन लाबा मुबा । गेताङरि काइपा प्रेमलोप्चन हेन्से सिन्धुली कलाघर दोनाला कलाकारकादेसे स्याबागोबा ओन्बा मुबा ।

फोटो पिन्बा : सन्चु ब्लोन 

(छिगकि दोनः ख्रेला– माघ, थुछापा– संयोजक, ग्याल्साङ– राष्ट्रिय, काप्तोन– समारोह÷उत्सब, दाछोक– समिति, काइब्लोन– प्रधानमन्त्री, रिमठिमकि– सांस्कृतिक, ग्यालठिपा– राजनीतिक, दाल्ना– आव्हान, खेबाः– पुरानो, ब्लोन– मन्त्री, सेमताम –मन्तव्य, स्यानगाउराइ– उपसचिव)