खाडलमाडी नाम्साला जाजाबा तामाङ नाम्सारि मनमाया थेन म्हेन्दोमाया मिनला जुम्ल्याहा नाना आङ चिमुबा, थेन्दा म्राङ्मा छोर्मुबा– गिक्खेन आत्मा गोर ङ्ही ल्हुइरि सोबा मुला । थेन्ना लि, चालढाल थेन हाउभाउ चोते दुरुस्तान मुबा कि ह्राङ्लान आपा आमा सुताइ झुक्याप तामुबा डा ११ रि डोबा म्हेन्दोमाया ह्राङ्लान ह्रो अमरला चेगाइरि मुबा । मेतेबा म्हुन थे अमरला छ्याम केकेबा छोङ्खाङजुगु मनमायातेन बोलामुबा ओम मनमाया नोन थे रापजुगुदा ह्राङ्लान म्हान्सि ङ्यान्मुबा ।

तासाइ म्हेन्दोमाया तामाङ थेन अमर क्षेत्री ताबासे थेन्ना चेगाइरि जातला सामाजिक डेङ स्योङ्बा मुबा । समाजला लोङ्बासे थेन्से ह्राङ्ला ब्रेल्बा छुम्जि, तसाइ चेगाइला ज्याबाथाङ खानाङ लाला ले ? लिच्छारि दिमथेमेसे थाहा याङ्माहेन्से म्हेन्दोमायाला क्याम्पस निबा ग्याम डुङ्जि । थेलिच्छा, मनमाया नानाला लागि सन्देशवाहक दोजि ओम थेन्ना चेगाइदा चिठीग्याम छोन्बोन थान्जि । तासाइ दुइ थाल्सिकेन निमा, थे चिठीजुगुरि अमर थारेङ तासिकेन निबा स्हेरखाबा छोर्बारि चुजि ।

लिच्छारि, फेबा नाबारि आखाम्ना थेन्से ड्वाफ्रे शुक्ल पञ्चमीला म्हुनगुङरि ह्यार्सिमाम निबा कठोर आप्ता लाजि । तासाइ, नियतिसे स्यान्दोन क्लाङ क्लाङ्पिन्जि । ह्रुप ताबा रे खाबा हप्ता गि ङ्हाच्छान मनमाया तिक्खुरि म्हाजि । चु घट्नातेन अमर थेन म्हेन्दोमायाला सम्पर्क नोन टाङ्जि ओम दिमथेमेसे म्हेन्दोमायाला ब्रेल्साङ स्यान्दोन केटातेन लापिन्जि ।

दिङ ङ्हालिच्छा याम्बुला इन्द्रचोकला भीडरि म्हेन्दोमायाला ह्रुप तिक्खुरि अमरतेन ताजि । थेसे सेमरि दिङ्छाहेन्से बुप्सि चिबा मोक्कोन स्हेर ल्हुजि– आङा म्हाबा घटना, फेबा सम्पर्क थेन ह्राङ्ला विवश ब्रेल्साङला राप ।

म्हेन्दोमायाला ताम थेसि अमर स्तब्ध ताजि । थेला मस्तिष्करि दिङ ङ्हा ङ्हाच्छाला थे दोपदोप्पा म्हुनला घटना ख्वाइख्वाइ स्यासि खाजि । थेसे लोङ्सिकेन ङ्योइजि, ‘ए... मनमाया आहिन ओम ?’

म्हेन्दोमायासे जाकि ज्युम ङेसि पाङ्जि, ‘ल्हा, दाते नोन झुक्याप तास्ह्युचिबा मुला !’

थे निसालसे अमरदा वास्तविकताला कठोर धरातलरि ब्याजि । नियतिला क्रूर क्लाङ थेसे क्योलोलो गोजि । थे म्हुनला याखारगि भयानक भ्रमसे थेला केवादा दिङ ङ्हादोना खाराङ्लासि दोन आरेबा स्होपिन्बाला चिम बिबा देन्बा थेला मि ङ्हाच्छा छर्लङ्ग ताजि ।

(छिगकि दोनः डा– कक्षा, चेगाइरि– प्रेम, ब्रेल्बा– सम्बन्ध, आप्ता– निर्णय, बुप्सि– गुम्सिए, दोन– अर्थ, क्लाङ– खेल)

दोःबा : यकिना अगाध