थे आउदिन हिंस्रक मुला
आततायी मुला ।

थे चोते क्रूर मुला कि 
क्योलोलो थुङ्सि ग्लुकग्लुक म्हिला का
म्रेन्ना ओम कोबारि चुला–
‘प्राङ्बोला चमेली पाङ्पिन्बा खालाइ आरे ।’

खाइमा थे योनाना छोर्ला
थेदा ङ्हाच्छाला डुइबारि तोला–
ह्युलआरेबा सुकुम्बासीला लेपलेप गिलास नाङ का ।

थेला अमेरिकन ब्रेकफास्टला रिसिपिरि स्याम्तोला
१९ दिङेला आचिप्बा छारिब्योन रविन तामाङला ‘तिङ ह्रोबा’
६१ दिङला इन्द्रबहादुर राइला ‘क्रास्या ह्रोबा’
चोस्बान थेदा तोला–
निमुखा खुयु आमाला मिख्लिा खुकु
कोलामा नानाला हार्बा ङ्हे ज्योर्सिमाम स्होबा मिल्कसेक 
डोबासे दार्जिबा लाइनुजुगुला कलिलो सुङ्फिजुगुला स्यान्डविच  
थेलिच्छा थेला टेबलरि दोगाला
गिलास नाङ लेप लेप का
ओम, कोबारि चुला थे–
‘प्राङ्बोला चमेली पाङ्पिन्बा खालाइ आरे ।’

दारे चुसेला मुला
आतंकला हिपप् स्याबा 
ङ्ह्यासेला मुला तानाशाही हुकुमला डिजेइङ 
थेसेला मुला– आमाजुगुला स्हिक्बा
डेसेला मुला– लाइनुजुगुला क, ख 
ल्हुसेला मुला– लाइनुजुगुला फ्याङ्गुलिङ
ओम, कोबारि चुसेला मुला थे–
‘प्राङ्बोला चमेली पाङ्पिन्बा खालाइ आरे ।’

आतंकला आर्तनादग्याम ब्लाप्बा दिनिसे
खाइमा च्युम्सेला मुला दिनि
चुसेला मुला बार्बक्यु पार्टी ।
श्री ३ ग्याल्बोजुगुला राउन्ड टेबलरि स्याम्सेला मुला
भर्खरै सिकार गरिल्याइएको 
रविन तामाङ थेन इन्द्रबहादुर राईला
तिङ, न्हे, ल्हे, क्रास्या, ग्लोबा, ह्याकुला, फलस्या, मृगौला 
ओम ङ्याम्बा ङ्याम्बा बोनम्यारो । 
प्लिङ्सेला मुला ह्विस्की गिलासजुगुरि लेपलेप का थेन,
कोबारि चुसेला मुला सामुहिक कोरस–
‘प्राङ्बोला चमेली पाङ्पिन्बा खालाइ आरे ।’

चमेलीजुगुला अस्मिता । चमेलीजुगुला दुःख । 
चमेलीजुगुला ख्रेन्बा । चमेलीजुगुला स्हिक्बा हरुको चीत्कार ।
थेदा मोक्कोन बिमा सेमनिबा राइमजुगु हिन्ना, 
थेनोन राइमजुगुरि बोडोक्बान तिक्खुरि सिंहासन क्रेजि थे
ओम कापाङ लाजि–
‘ङा हिन्ना श्री ३ जंगबहादुर ।’

चुह्राङ्लासि ...
क्योलोलो श्री ३ औतारी ग्याल्बोला केबा ताबा मुला ।

(छिगकि दोनः ग्याल्बो– महाराज, केबा– जन्म, ह्युलआरेबा– भूमिहीन, स्याम्बा– सजिएको, स्हिक्बा– चित्कार/क्रन्दन, बोडोक्बा– बरबराउनु, कापाङ– घोषणा)  

दोःबा : यकिना अगाध