ल्हामरि कात्ते म्हि स्याप्ला, कात्ते फेला । लेखाजोखा आता । आला नोन । तासाइ नोन कात्ते स्याप्बाजुगु चुह्राङ्बा ताला, थेदा कात्तेन म्लेगे बिसाइ नोन म्लेबारि आखाम ।
ह्राङ्सेन नाबा गिक्खे घटना ।
केवाला ऊर्जाशील दुइजुगु ङ्हाउ ल्हानान दिङहेन्से स्यान्दोला ह्युलरि थाल्ना लाबाकेन मुला । तिनिला मितिदोना । फिह्युलकि केवा गुजारा ज्याबान मुबा बितोला । खालाइसे बदनियतपूर्वक डुइसिमाम बाबा आहिन । ह्राङ्लान ताङ्बारि ह्राङ्लान सेमसे खाबासे ल्हानान ब्रेबा ज्याबा आछोर ।
म्हान्बा ह्राङ्बा, सोचतिबा ह्राङ्बा आतासाइ नोन ङ्हान्बा म्हिला दया थेन चेगाइरि वाङ्बा मुबा थेदुइला केवा ।
फिरग्याप ह्युलरि गेला तोसो बिमा नोन गेदा छ्योकु डान्बा चिम । गे खात्दामान तिदा आतागाइ ।
ङ युरोपेली युनियनरि आबद्ध जाजाबा टापु साइप्रसरि गेलाचिबा मुला, साइप्रस युरोपेली ह्युल तासाइ नोन ठ्याक्का युरोप ह्राङ्बाचा आरे बिमा फेबा आता । एसियाली ह्युल लेबनानहेन्से घन्टा गाङ्साल हवाई ल्हामरि दोबा ग्ला हिन्ना । छेप्पा दुइरि खाडीरि तेबान छेप्पा छाला । छेप्पाबारि छ्युलिङला कुनि आउदिन चेबो ताला ।
ङाला गेला इमानदारिता म्राङ्सि तिगाइ दिङ ङ्हाच्छाला समर भ्याकेसनरि बोससे थेन्तेनछ्याम छ्युलिङला ग्यालाम ताबान ग्रिस कोर्बारि निबा ङ्योइसाङ पिन्जि । ङा ताङ्सिमाम दङ्ग मुबा ।
सन् २०१८ ला अगस्ट लाला गिक्छा हप्ता ङान्ना ल्हामला मिति तय लाजि । थेला ह्राङ्लान व्यक्तिगत सेलिङ बोट मुबा । थेनोन बोट ग्याम्से निबाकेन मुबा ङानिकादे ग्रिस । बोसला ह्रोजुगु थेन ङा लासिमाम थे ल्हामरि ङानि गोर ङीस मुबा ।
अगस्टला गिक्छा हप्ताला सुङरे ङानि पोप ताजि । लिमासोल सहर ङामरि मुबा सन्तरफाल मरिनारि ।
थेनि बिमा ङा ल्हानान उत्साहित मुबा । तिल्दाबिसाम थे ङाला केवाला गिक्छा रेमला ल्हाम मुबा । क्युइला ग्यालाम तासिकेन थारेङदोना निबा ।
जाजाकार सेबा अंग्रेजीरि ताम पाङ्बान बोट मरिनाग्याम थोन्सि छ्युलिङरि दोजि । गोल्छेसे ह्राङ्ला स्युग किन्बारि चुजि । सेलिङ बोटला स्युग ओत्ते ल्हाना आताबा चिम । घन्टा दाङ्से ६–७ माइल ब्राबा चिम ।
स्हिवा छ्युलिङला मौनता बोसिकेन ङानि ङान्ना दोखाङ ताकतिसि न्हुप व्हना ब्योङ्बाकेन मुबा दुइला छ्याम क्युइला ग्यालाम तासिकेन । क्यार्से जासे च्याबा बिबा मिला दूरीसे ख्युप्बादोना क्युइ नोन क्युइ हिन्ना । तोर म्राङ्बा बिबा पिङ पिङ्बा ग्रेनखेप्पा, खानाङ खानाङचा खासुला बुट्टासे स्याम्बा मु ।
दुइ दुइरि सेम लोङ्सि खामुबा । केवारि खाइमाइ थेह्राङ्लासि क्युइला ल्हाम आब्रासे मुसिम सायद । स्ह्योला १० ङ्ह्यामा तिबा ल्हाम ङ्यासे ताइ नोन लामा ङानि लाच्ची हार्बररि दोजि । थे ग्ला बिबा साइप्रसला लिच्छाला सा हिन्ना ।
ङानि थे म्हुना थेरिन थासि न्हाङ्गार स्ह्योरि निबा निधो लाजि । ङा कुटिसि चिबा मुबा, रेगिला ल्हामसे आउदिन ब्लाप्सिमाम ।
लाच्ची हार्बररि पार्किङ लाबा बोटरि म्हुन थाजि । स्ह्योला ३ ङ्ह्याबा दुइरिक्यार रेजि मोक्कोन म्हे । ंलाइफ ज्याकेट क्वान्पुङ्जि । लाइट ब्रेकफास्ट चामाहेन्से ङाला रुइबा आखाबा मान पिन्जि ।
ङाइ थे मान चाजि ।
ओम तिजि ल्हाम ग्रिसला लागि । दोप मुबा गोल्छे गोल्छेसे चुजि ल्हाम । तिगाइ घन्टा लिच्छा दिनिला ह्याल ङ्हेजि साजाम्बुलिङरि । क्यार क्यारदोना क्युइ क्युइ म्राङ्ला । फिरि होन्दोलोङ मुल ।
‘भिभाल्दी’ मिन लाबा बोट छ्युलिङला छालतेन ब्योङ्सिकेन ग्रिस ताकतिसि चलतिबाकेन मुबा । ङानि छ्याम नोन ल्हामरि मुबाजुगु ल्हानाह्राङ्बा मोक्कोन केवाला उत्तरार्ध दोजिन्बा म्हिजुगु मुबा ।
बोस भिक्टोर आउदिन रौसे म्हि ताबासे ओत्ते ल्हाना अप्ठ्यारो छोर्बा आरेमुबा ङादा । दुइ दुइरि क्यालो लामुबा थेसे ।
‘एला ह्युलरि छ्युलिङ मुला ?’ थेसे ङ्योइजि ।
ङाइ ‘आरे’ बिसिमाम थोबो ह्योङ्मुबा । ओम, बिपिन्मुबा– ‘ङान्ना ह्युलरि माउन्ट एभरेष्ट मुला । तासाइ छ्युलिङ आरे ।’
भिक्टोरसे बिुमबा– ‘खाजिबाइ रे निला, एला ह्युलला माउन्ट एभरेष्ट च्याबारि ।’
बोटला क्याप्टेनचा ब्योन नोन मुबासे दुइ थाबारि ओते मुस्किल आतानि ।
बोटरि ग्रिस ग्योइला व्हाइ होङ्बाकेन मुबा । ग्योइ आगोसाइ नोन ह्रोल्ज्याङरि ङाला सेम क्युमुबा ।
निरन्तर छ्योङ्चिबा मुबा बोट ह्राङ्दान स्युगरि । स्ह्योला ३ ङ्ह्यामा ब्राबा ङानि छ्योआछ्यो रे गाङ्साल ताबाकेन लामा बोस भिक्टोरसे बिजि, ‘दारेम आठ–दस घण्टा ल्हागतिला दोखाङरि दोबारि ।
ङा जाजाकार लोङ्जि । जाजाकार क्राङ्क्युर्बा मुबा ङादा । रुइबा हाचिमुबा ।
दाते नोन ओते थारेङ... ।
दिनि न्हुपला क्षितिज व्हना कुर्बाकेन लामा ङाला सेमरि सिम्बा वाङ्जि । काते दुइरि दोला ताला थे ग्लारि, थे ग्लारि ङा गिक्छारेम निबाकेन मुला ।
दिनि नुप्जि, म्हुन ताजि, बोटला ङ्हाच्छा च्याबा नाङ्साल लुङ्जि । सिम्बा ल्हेबाकेन मुबा । लाबा चलतिसि बोटला सेल अनियन्त्रित तासि दुःख पिन्बासे क्याप्टेनले बोटदा अटोरि चलप लाजि । सेल डुङ्सिमाम । दोपरि जाकि अप्ठेरो ताबाचिम बोटदा । खानाङए तिगाइ स्हेतेन तोइला व्हा बिसिमाम ।
दुइ दुइरि बोस भिक्टोरसे ङ्योइमुबा– ‘आर यू ओके मिस्टर लामा ?’
तुन्बा निसाल पिन्मुबा– ‘आईएम ओके ।’
थेनि ह्राङ्लान ग्योइ ताम लामुबा । धन्न बोट क्याप्टेन साइप्रसला आताना बुल्गेरियन नागरिक ताबासे ङादा ताम पाङ्बारि ह्रो ताबा मुबा ।
म्हुनला एघार ङ्ह्यामा ङानि दोजि थेकुनुला दोखाङरि । थे ग्लेदा ‘क्यास्टलोरिजो’ आयरल्याण्ड बिबा चिम । साइप्रसग्याम थोन्मा गिक्छा रेम स्याप्बा ग्रिसला आयरल्याण्ड मुबा चिम थे ग्ला । ङानि छ्योआछ्यो बीस घण्टाला ल्हाम लिच्छा दोजि ।
थे म्हुना बोटदा हार्बर बोर्सिमाम पार्क लाबारि आडिक्नि । दोप म्हुन ओम लुङ्सुरला ङ्यान्दिसे । थेनोन ग्लारि पार्क लाजि । बोटरि थुइबा अंकुशला छ्यामला आइरन चेनदा क्युइ न्हाङरि ताइना लासिमाम । ङादा तिगाइ ग्युइ आरेमुबा बोटला बारेरि । ङामि जेक्खे तिगाइ थाहा आरेबा ल्हाम्पा मुबा ।
बोट पार्कलिच्छा कान चाजि । क्याबिनरि निसिमाम म्हेर्जि । ब्लाप्सि मुसिम छोर्मा ह्याल ताजिन्बा चिम । न्हाङ्गारदाङ्से दिनिसे दर्शन लापिन्जि जेबा ग्लाला ।
देन्बान आउदिन जेबा मुबा थे ग्ला । ग्यार्जा गि प्रेप्रेरि मुसिम जेबा जाजा जाजा ग्रिक स्टाइलला दिमजुगु । ग्रेन मरिना आरेमुबा थेरि । जाजा हार्बर, तिगाइ ग्यार्जा मुसिम म्हिजुगु ।
रेसिमाम ख्वाङ्कोर्जि । कफि थुङ्जि । क्याप्टेनतेन ह्रो दोजिन्बा मुबा ।
ङानि थे ग्लारि म्हुन ङ्ही चिमाहेन्से जेक्खे ङ्हाच्छा निबा ताम लाजि बोससे । थेग्याम नोन किन्तोबा चिम ल्हामला लागि अनुमति स्यो ।
जाजा ग्ला घन्टा गि ङ्ही क्यार्से जासे लाना लानान ङोसेबा ग्ला ह्राङ् छोर्जि ।
रेला चाबाला लागि ङामरि मुबा याखारगि रेष्टुरेन्टरि निजि ङा थेन बोट क्याप्टेन । छ्युलिङ गुरि मुबा रेष्टुरेन्ट जेबा मुबा । तिगाइ दुइ चिमाहेन्से ङानि चिबा टेबुलरि याखारगि वेट्रेस खासिमाम मेनु पिन्जि । ओम, चाबा स्हेला बारेरि गोना लाजि ङान्दा ।
ङान्छे तिगाइ चाबास्हे लाजि । चाबास्हे बाजि ङान्ना लागि । चाजि ओम थोन्जि ङानि थेग्याम ।
ङ्यासे–स्ह्यो थेनोन रेष्टुरेन्टरि चाबारि चुबा न्हाङ्गारदाङसे थे वेट्रेससे ङाला ह्रोदा बिमा ङातेन विशेष लासि ताम पाङ्जि । सम्भवत ङाला फेबा नस्लला ङ्यान्दि मुसिम ।
थेसे ङ्योइजि– ‘ए खाजिबा ग्ला ग्याम खाबा हिन्ना ?’
‘ङाला दिम नेपाल हिन्ना । गे साइप्रसरि लामुला, थेग्याम नोन खाबा हिन्ना ।’ ङाइ बिजि ।
ङाइ थेदा ङ्योइजि– ‘एचा ?’
थेसे बिजि, ‘ङा ग्रिसग्याम नोन हिन्ना, तासाइ ङाला दिम एथेन्सरि परतिला ।’
दोसि थेसे ङ्योइजि, ‘एला मिन ?’
ङाइ ह्राङला मिन पाङ्जि ।
ङाइ नोन थेला मिन ङ्योइजि ।
‘सोफिया ङाला मिन’, थेसे पाङ्जि ।
ङानि गुङरि ताम ताबाकेन मुबा । स्यान्दो टेबुलरि गेष्ट खाजि । थे थेरिक्यार नोन निजि । दोसि ताम लाला बिसिमाम ।
चुह्राङ्लासि ङ्हीरेला चिबारि थे अनकन्टाररि थेतेन ङोसेजि । तोसोगिला थारेङला ह्रो दोजि । ह्रो दोबाला ङ्यान्दि थेला आपा ज्योमोलोङ्मा क्रेबारि तिगाइ दिङ ङ्हाच्छा नेपाल निबाला चिम ।
थेदा नेपालला फिरि तिगाइ थाहा मुबाचिम । थेतासि ङान्ना दोस्ति कायम ताजि बिले । संयोग बस ।
क्यास्टलोरिजोरि ङ्हीरेला चिबा लिच्छा ङान्ना ल्हाम दोसि चुजि । ग्रिसरि चोत्ते ल्हाना टापुजुगु मुला, थेरि कोर्बारि ल्हानान दुइ ल्हागाब ताला रो ।
क्यास्टलोरिजोग्याम ब्राजि ङानि । ब्रामा सोफियादा दोसि खामा ह्रुप ताला बिसिमाम ।
ङान्ना ङ्हीछा दोखाङ मुबा सिमी आयरल्याण्ड ।
थेरि दोबारि छ्योआछ्यो तिरे ल्हागाब ताबाचिम । ल्हाम आउदिन ताङ्बा तोसोला मुबा । छ्युलिङला गुङ गुङरि जाजा जाजा गाङरि ह्रि तामुबा । खानाए गाङ जेक्खे युङ्बान युङ्बाला । दुइरिन दोजि । बास चिजि । चुह्राङ्लासि ल्हानान आयल्याण्डजुगुरि दोबा थोप्साङ याङ्जि । ङा गाङ नोन गाङसे स्होबा ह्युलला म्हि । ङाला ह्युलदा छ्युलिङसे थुर्बा आरे । तासाइ, ङाला ह्युलरि जाम्बुलिङलान तोच्चा जो ज्योमोलोङ्मा मुला ।
केवाला गिक्छा रेम ओते ल्हाना क्युइला जाम्बुलिङ कोर्बारि याङ्बासे आताङ्बा ताम नोन आतानि । बोटग्याम्सेन बल्छी क्लाङ्मुबा । ल्होलो तोसोला तारङा बल्छीरि पारतिसि ल्हानान तोसोला ब्रोइ म्ह्याङ्बा मौका याङ्जि ।
ल्हाम आउदिन सेमछुबा थेन म्लेआखाम्बा दोबा मुबा । बेनान आयरल्याण्डला फेबा फेबा विशेषता याङ्मुबा । खानाङए पिङ्गाइ ह्रिला ङामरि तामुबा, खानाङए म्लाङ्गाइ युङ्बान युङ्बा । खानाङए ओस्सो च्यामा तार म्राङ्बा बालुवासे ख्वाङ्बा टापु स्याप्मुबा ।
चुह्राङ्लासि ल्हानान आयरल्याण्डजुगु बिले सिमी, फाल्गी, रोड्स, लिन्डोस क्रिट, बालेख बीच, मिलोस ल्होलो ल्हानान ग्ला कोर्बा थोप्साङ डिक्जि केवारि ।
चुह्राङ्लासि केवारि गिक्छा थेन लिच्छा रेम नोन बिले, सायद दारे आदो ताला थे ग्लाजुगुरि दोसि–दोसि । हप्ता सोमला ल्हाम छ्योना लासि दोसि ङानि थोनोन ङ्हाच्छाला क्यास्टलोरिजो टापुरि दोगाजि ।
थेनोन ग्लाला हार्बररि चिजि ।
थेनोन रेष्टुरेन्टरि चाबास्हेला पालेरि निजि । सोफियासे गाबोकि तासि ङ्योइजि– ‘खाराङ्बा छोर्जि ग्रिस ?
‘आउदिन जेबा !’ ङाइ गाबोकि तासि पाङ्जि ।
दोसि ङ्योइजि– ‘जिन्जि एला होली डे ?’
‘जिन्जि । दारेम न्हाङ्गार निबाकेन मुला साइप्रस ।’
जामाकुनु ल्हानान ताम ताजि थेतेन । थेसे ह्राङ्ला इमेल आइडी पिन्जि ।सामाजिक सञ्जालरि ह्रो दोजि ।
थेसे दुइ डिक्ना लासिमाम साइप्रस खाबा ताम लाजि । थेलिच्छा नेपाल नोन कोर्बारि निसेला ताम लाजि ।
ङाइ थेसे बिबा मोक्कोन तामदा ‘ताला’ बिसिमाम निसाल पिन्जि ।
न्हाङ्गारदाङ्से बिले अगस्ट लिच्छारिक्यार ङान्ना टिम फ्लिक दोजि साइप्रस । थेनोन ग्याम खाजिबा ग्याम तासिमाम निबा मुबा ङानि ।
ल्हानान ज्याबा खाइमाइ आम्लेबा दुइ ह्रुप्सिमाम दोगाजि गे लाबा ह्युलरि । साइप्रस दोगामाहेन्से दोसि चुजि गे । व्यस्त ताबारि चुजि । खाइमागि म्यासेज तामुबा सोफियातेन । थे गोल्छेसे ङाला ज्याबा ह्रो दोजिन्बा मुबा ।
ङानि ङ्ही फेबा फेबा ह्युलला तासाइ नोन, फेबा फेबा समाज ग्याम खाबा तासाइ नोन । ल्हानान ज्याबा दोस्ति छ्याबा मुबा ङानि गुङरि ।
तिगाइ ला लिच्छा सोफिया साइप्रस कोर्बारि खाबा ताम ताजि । थे खाजि बिबा मितिरिन तिगाइ रेला छुट्टी किन्सिमाम । ह्रापह्रुप ताजि । ङादा बिमा ल्हाना ग्रादाङ मुबा साइप्रसला बारेरि थेदा ।
ङाइमि जेक्खे ह्रो दोसिमाम ह्रोला भूमिका निर्वाह लाजि । बरू थेसे कोर्ना लापिन्जि साइप्रसला छार छार ग्ला । ङा खाइमाइ आदोबा खेःबा नाम्सा नाम्स थेरि ङा ङ्हाच्छा खाइमाइ दोबा आरेमुबा । थेला छुट्टी तुन्बा मुबा । छुट्टी जिन्ना लासि थे फ्लिकदोजि ग्रिस । ज्याबा डान्बाजुगु ख्लासिमाम । दोसि दोसि ह्रुप ताबा का ख्लासिमाम ।
रेजुगु थाल्बाकेन मुबा ह्राङ्लान स्युगरि ।
फिरग्याप ह्युलला नाता बिबा गे हिन्ना । गे आलाना ङ्हीरे कोठारि चिजि बिसाम दोप्ता ल्होलो ङ्योइबा ङ्योइसिमाम हैरान ताना लााल । खाम आखाम निर्वाह लातोला ह्राङ्ला भूमिका । थे थेन्से फेबा ताला म्हिला बोरि ।
समर सिजन जिन्ना लासि अटम सिजन चुजिन्बा मुबा । गोल्छेसे छेप्बा च्याङ्बाकेन मुबा । जाजाकार खाइमागि नाम ताइबारि चुबा मुबा । साइप्रसरि मनसुनी वर्षा आताबा चिम । तोसो गिला खाडी ह्युल नोन हिन्ना बिमा फेबा आता ।
ह्याङ्ला ह्युलरि ह्राङ्बा छोन्बा लासि पिङ्गाइ आफेल । सेम क्युङ्बा उजाड जाजा जाजा बुथुमजुगु थेन छ्युलिङला कुनिरि चिबा जाजा जाजा सहरसे स्होबा मुला ठिक्काला जाजाबा ग्याल्सा ह्याङ्ला ह्युलला याखारगि अञ्चलसे हाप्बा सा तेत्थेबा ।
थेनोन दिङला म्हेनिङ तिहाररि दिमरि निबा ताम मुबा ङाला । समर होली डेरि सोफियातेन ताबा ह्रापह्रुपला ङ्यान्दिसे ङाला थे दिङ दिमरि निबा ताम क्यान्सिल लाजि । तिल्दाबिसाम थेसे खाबा दिङ ङा नोन नेपाल निला बिबा तामसे ।
भौतिक स्ह्रुगसे थारेङ तासाइ नोन ङानि रेदाङ्से ह्राङ्बा अनलाइन ग्याम्से ताम लामुबा । थेसे थेला बारेरि पाङ्मुबा । ङाइ ङाला बारेरि ।
ल्हानान घनिष्ठ ताबा मुबा दोस्तिला ब्रेल्बा । मोक्कोन तामजुगु सेयर लामुबा थेसे । हिन्बाम थेन्ना सामाजिक माहोल नोन फेबा मुला । ह्याङ्ला स्यारला समाज बिमा ।
ल्हानान फरासिली मुबा सोफिया । सेम ह्राङ्बान जेबा मुबा थेला ल्हुइकि स्होबा । नोबा, बान्की परतिबा ल्हुइ, ग्रेन ग्रेन मि । सेबा मूर्तिकारसे दुइ ल्हागाब लासि स्होबा जेबा मूर्ति ह्राङ्बान ।
सन् २०१८ ला अगस्टरि ताबा मुबा ङान्ना ह्रुप । तिगाइ ला लिच्छा छार दिङ ल्हागाब ताजि । थेनोन दिङ्ला लिच्छारिक्यार थेसे नेपाल खाबा योजना स्होबा मुबा । थेसे ज्याबा योजना स्होबा मुबा नेपाल कोर्बा बारेरि । ज्योमोलोङ्मो आक्रेबा तासाइ ज्योमोलोङ्मोला टा दोना ट्रेकिङ निबा, हाइकिङ, डिक्साम राफ्टिङ नितोला बिबा तामजुगु लामुबा । थेलान ङ्यान्दिसे दिम खाबा छुट्टी दिङ गि क्यार ल्हेसिमाम ङा ह्राङ्ला गेरि तल्लीन ताजि ।
दुइ ह्राङ्लान स्युगरि ब्योङ्चिबा मुबा । दुइला छ्याम म्हिला केवाजुगु खेसिकेन निबा मुबा ।
सोफिया गेरि ल्हानान व्यस्त ताबा पाङ्मुबा । होलिडे निबाला लागि अतिरिक्त न्होर छाबाला लागि बिसिमाम ।
थे दिङ गाङ्साल ताबाकेन लामा थेसे नेपाल निबारि टुरिष्ट भिसाला लागि एप्लाई लाबा ताम ङादा पाङ्बा मुबा । ताङ्सिकेन ।
थेसे बिबाकेन मुबा, ‘ङा बिमा ङ्हाच्छा ए दोतोला नेपालरि । ङा नेपाल खामा एसे रिसिभ लाबारि खातोला ।’
छुगला मुला, केवा कात्ते ल्हाना भावनारि ब्लुम्सिमाम कोरतिला लिउरि स्होसेला योजनाजुगुला छिङ्गाइ छिङ्गाइ खाकाजुगु । कात्ते सफल ताला । कात्ते असफल ।
नोभेम्बर लाला ङ्हीछा हप्ताला तिरेला ङ्यासे सोफियासे कल लाजि ङादा ।
मोक्कोन ताम तयार ताजि । भिसा याङ्जि । सपिङ लाजि । टिकट बुक लाजि । ताङ्बा मुबा थे ल्हानान । मोक्कोन ताम ङादा थेना लाचिबा मुबा ।
थेला ताङ्बारि ङाइ नोन बोकिन्जि । ङा नोने दिङ ङ्हा लिच्छा ह्राङ्ला केबा ह्युलरि निबाकेन मुला ।
चुह्राङ्लासि संयोगबस याखारगि रेष्टुरेन्टरि ह्रुप ताबारि दोजि । ह्रो दोजि । थेला नेपालफिला चेगाइ । थेला आपाला नेपाल ल्हाम ल्होलो ङ्यान्दिजुगुसे लामा ङान्तेन छ्याम नोन नेपाल कोर्बारि स्होबा मुबा योजना । चुह्राङ्लासि स्होबा ङान्ना योजनारि तिक्खुरि स्हेर थेन वेदनाला खासु च्यार्बारि चुजि । थे विरहला खासु जेक्खे ह्याङ्ला केवारि परतिबा आरेमुबा । चु क्योङ जाम्बुलिङदा चुनौती पिन्बा मुबा ।
खाल्दा तिगा थाहा ? न्हाङ्गार तिगा ताला बिसिमाम ?
थेह्राङ्बान ङोआसेबा न्हाङ्गारसे जाम्बुलिङदा नोन बिचलित ताना लासि कोभिड–१९ बासिमाम खाबा मुबा । चुसे ङान्दा ङ्हाच्छा वाङ्बा योजनाला ग्यामरि गारा युजि ।
ह्याङ्लान खिम्जे ह्युलग्याम तिबा चु लोङ्खेप्पा ह्याम जाम्बुलिङनाङ फेल्बा मुबा । याखारगि ह्युलग्याम स्यान्दो ह्युल निबा छुलिङ ग्यालाम, साग्यालाम, हवाई ग्यालाम क्योङ स्ह्रुगरि गोल्छेसे खान्दामान डुङ्जि ।
ह्राङ्ज्युङदा चुनौती पिन्बा ङा नोन हिन्ना बिबा म्हिजुगुला अभिमानदा आम्राङ्बा भाइरससे बुडुइ स्होजि । म्हिजुगु म्हितेन लोङ्सिमाम गिसेम गि गुङरि थारेङ चिजि ।
कोरोनाला ङ्यान्दि ङाला छुट्टीरि दिम निबा तामदा तोकथान्जि । क्यार्से सोफियाला नेपाल कोर्बारि निबा म्हाङदा गुङरि हाक पाङ्जि । थे निर्दयी लोङ्खेप्पा रेजुगुसे बाबा मुतेबा पलजुगुदा स्वीकार लाबाला विकल्प आरेमुबा । कोठा–कोठारि डुङ्बा मुबा म्हिजुगु ।
ङाला रोजगारी तोसो गिसे ब्यान्बा ह्राङ्बान ताबा मुबा । क्यार्से सोफिया गे लाबा रेष्टुरेन्ट बन्द तासिमाम क्यास्टलोरिजोग्याम ह्राङ्लान दिमरि दोसि निबा तामसोर म्यासेजरि पुइगाबा मुबा ।
ङाइ नोन म्यासेज रिप्लाई लासि पुइजि । ह्राङ्ला नाछाल बारेला । ल्हानान सकस परतिबा मुबा । केवा चलप लाबारि । धन्न चाबा थेन चिबारिचा डिछ्या लापिन्बा मुबा गे लाबा ग्लासे ।
नाम्दुङ–दुगुला ह्रिरि निबा मेल्हाम ह्राङ्नो लासि चोल्बा मुबा, दुनियाँनाङ कोरोना ह्याम ।
दुइ दुइरि ताम तामुबा सोफियातेन । गिसेम गिदा सतर्कता किन्गो बिसिमाम ग्रोइ पिन्मुबा ।
थेसे पाङ्मुबा थे मुबा ग्लाला दार्सेला तामसोर । गोल्छेसे इटाली, स्पेन तासिकेन थेला ह्युलरि नोन कोरोना भाइरस वाङ्बा तामसोर थेना लामुबा ।
ङाइ नोन ङा मुबा ग्लाला ताम पाङ्बा लामुबा । छ्याछ्यामरि नेपाल खासिमाम कोर्बा तामजुगुला बारेरि नोन ताम लामुबा ।
कोरोनाला प्रकोप स्युग स्ह्रुगरि फेल्बा ङ्यान्दि अनिश्चित दुइला लागि लकडाउन लाजि ।
झन डोबा ताजि स्थिति । छोन्बो म्हिजुगुला सहररि सन्नाटा ल्हेजि । अस्पतालजुगु गोल्छेसे नाबासे प्लिङ्बारि चुजि ।
तिगाइ रे ताबा मुबा । सोफियातेन ताम आताबा । म्यासेज पुइजि । ङ्हीरे दोना म्यासेज सीन नोन आतानि । कल लामा रिङ निला कल रिसिभ आता ।
थेतेन थेह्राङ्बा खाजिबाइ औपचारिक नाता थेन ब्रेल्बा आथुइबा तासाइ नोन तिल्दा तिल्दा थेफिरि ङा ल्हानान समर्पित ताबा मुबा । थाहा आरे तिल्दा थेह्राङ ताजि बिसिमाम ।
थेसे म्यासेज रिसिभ आलाबा दान्नाइ हप्ता गि ताजिन्बा मुबा । ङाला सेम ल्हानान बोल्बारि चुबा मुबा ।
तिक्खुरि ङादा थेला फेसबुक प्रोफाइलरि भिजिट लाबा सेम खाजि । तिक्खुरि ङा थेला फेसबुक प्रोफालरि वाङ्जि ।
स्क्रोल लासिकेन निमा तिगाइ दुइ ङ्हाच्छा थे थेन थेला याखारगि ह्रो छ्याम नोन चिसिमाम खिचतिबा फोटो म्राङ्जि । संयोगसे थे फोटो थेनोन छारिछामेदा ट्याक लाबाला चिम ।
थे छारिछामेला मिन– ‘नतासा’ चिम ।
ङाइ योना योना फ्रेण्ड रिक्वेस्ट पुइजि । तिगाइ रे लिच्छा थेसे एसेप्ट लाजि । सायद सोफिया म्युचअल फ्रेण्ड म्राङ्सि मुसिम ।
सोफियासे दान्ते नोन म्यासेज सिन लाबा आरेमुबा । झन् कल तिगा थिसेला ले । थेतासि ङाइ सोफियाला बारेरि गोबाला लासग नोन पुइबा मुबा नतासादा फ्रेण्ड रिक्वेस्ट ।
ङाइ नतासादा म्यासेज पुइजि ।
‘हाई नतासा !’
ल्हानान दुइलिच्छा थेसे म्यासेज रिप्लाई लाजि ।
‘हलो खाला हिन्ना ह्राङ ?’
‘ङा सोफियाला ह्रो । दान्नाइ हप्ता गि बिमा ल्हाना ताजि थेतेन कन्ट्याक्ट ताबारि खाम्बा आरे, थेतासिमाम ! ह्राङ थेला ह्रो चिम, थेला बारेरि गोबारि पुइकाबा हिन्ना म्यासेज ह्राङ्दा ।’
क्यार्सेग्याम नतासासे बिजि, ‘सरी सी इज नो मोर !’
ङाइ ‘ह्वाट’ जेक्खे बिजि ।
सन्नाटासे गाप्जि । ताम पाङ्बा हिम्मत आलानि । फोन थाजि ।
ओम, थेसे ह्रेङ्बा म्यासेज पुइगाजि ङादा ।
‘थेदा तिक्खुरि कोभिड ताजि । दिमथेमेसे हस्पिटल भर्ना लाजि । नोइसे नाङ्सिकेन निजि । आइसियूरि थान्सि क्योन्बाकेन मुबा रो । आइसियूरि थान्सि क्योन्ना क्योन्नान थे डोङ्जि । दुःखला ताम थेला फ्युनेरेलरि खालाइसे बोकिन्बारि आम्याङ्नि ।’
थेला क्योङ म्यासेज डोजि ओम बिजि– तामसोरला लागि ल्हाना ल्हानान थुजेछे नतासा ।
तिगाइ रेला ङोसेबा ङादामि चुह्राङ्बा हालत स्होजि बिसाम थेला दिमथेमेला हालत खाराङ्बा मुसिम ! कल्पना जेक्खे लाबारि खाम्ला ।
गोल्छेसे लकडाउन खुकुलो तासिकेन निजि । सरकारसे पिसिआर रिपोर्ट थोसिमाम ल्हाम लाबारि डिक्बा स्होजि । सोफियाला डोङ्बा छ्योआछ्यो दिङ गि लिच्छा छुट्टीरि दिमरि खाजि । नेपालला एयरपोर्ट दोगामा डान्बा मुबा सोफियासे पाङ्बा ताम ।
‘ए नेपाल ङ्हाच्छा निउ ओम ङा खामा एसे ङादा रिसिभ लाबारि खाउ ।’
दारे सोफिया खाइमाइ नेपाल कोर्बारि खासेला आरे । तासाइ थेसे लाबा तामजुगुला डान्बा सायद केवानाङ खाचिला ताला....।
पाँचखाल–११, काभ्रे ।
(छिगकि दोन : नाबा– भोगेको, केवा– जीवन/जिन्दगी, ङ्हाउ– विगत, फिह्युलकि– वैदेशिक, ब्रेबा– खिसिटिउरी, ङ्हान्बा– पराइ, चेगाइ– माया, फिरग्याप ह्युल– परदेश, छ्योकु– पूजा, छ्युलिङ–समुन्द्र, चेबो– प्रिय, स्युग– बेग÷गति, स्हिवा– शान्त, व्हना– तर्फ, स्याम्बा– सजिएको, म्हे– जना, होन्दोलोङ– खुल्ला, ह्रोल्ज्याङ– बाजा, लुङ्सुर– आँधी, ङ्यान्दि– कारण, ल्हाम्पा– यात्री, प्रेप्रेरि– हाराहारी, ज्याबाथोप्साङ–सौभाग्य, थोप्साङ– भाग्य, ख्वाङ्बा– घेरिएको, गाबोकि–उत्साहित, खेःबा– पुरानो, का–वचन, दोप्ता–मालिक, छोन्बा–रंगिन, बुथुम–थुम्की, हाप्बा– ओगटेको, स्ह्रुग– रुप, ब्रेल्बा– सम्बन्ध, ल्हुइकि–शारीरिक, खिम्जे– छिमेकी, ह्याम– महामारी, नोइ– रोग, फेल्बा– फैलिएको, ह्राङ्ज्युङ– प्रकृति, बुडुइ– धुलो, नाछाल– अवस्था, नाम्दुङ/दुगु– चैत/बैशाख, मेल्हाम– डढेलो, चोल्बा–सल्केका, ग्रोइ– सल्लाह, छारिछामे– युवती, क्योन्बा– उपचार)
दोःबा : यकिना अगाध
तपाईको प्रतिक्रिया दिनुहोस