याम्बु । नेपाल तामाङ युवा घेदुङग्याम आयोजित ‘तामाङ युवाजुगुला सवाल थेन नीतिगत डिछ्या ब्रेल्बा क्षमता ल्हेना लाबा’ प्रशिक्षण गेताङ दुगु १२ गते बौद्ध टुसालला क्बाभ ऋजधबलक ऋबाभ रि ताबा मुला ।

गेताङ घम्ब तामाङ (मिलन)ला चोहोदानरि ताबा मुबा बिसाम ग्रेनडोन्बा आदिवासी जनजाति ग्याल्साङ उत्थान प्रतिष्ठानला स्यानचोहो रेशम गुरुङ मुबा । गेताङरि विशिष्ट डोन्बो नेपाल तामाङ घेदुङला संघीय चोहो मोहन गोले मुबा ।

ग्रेनडोन्बो रेशम गुरुङसे तामाङ समुदायला याङ्ताम, ङोसेबा थेन सशक्तिकरणला लागि चुह्राङ्बा प्रशिक्षण गेताङ आउदिन तोबा धारणा थान्जि ।

विशिष्ट डोन्बो मोहन गोलेसे तामाङ समुदाय ह्राङ्ला बाङ थेन ङोसेबाफिरि तोतेबा सचेत आताबा ङ्यान्दि ‘नाङ्साल दिला दोप’ ह्राङ्बा नाछालरि मुबा बिबान राजधानी क्यारक्युर चिबा ताना तानान ग्यालठिपा दबाब थेन फेबासे समुदाय लिच्छा परतिबा धारणा व्यक्त लाजि ।

वरिष्ठ स्यानचोहो रामकृष्ण ब्लोन गेताङला दोन्ताफिरि ज्याबाम्हान्बा व्यक्त लाबान ह्रेङ्बा संगठनात्मक ल्हामसे ह्राङ्दा जिम्मेवार स्होबा पाङ्जि । छ्यामरि, छारिब्योनजुगुदा समुदाय गोसि नेतृत्वरि ङ्हाच्छा वाङ्बारि प्रेरित लाजि ।

प्रशिक्षण सत्र स्यानग्रेनगाउराइ हर्क तामाङसे तामाङ छारिब्योनजुगुला सवाल, ग्यालठिपा, सामाजिक ओसेम रिमठिमकि तिलोदा ह्रुप्सि समावेशी नीति व्हना समुदायला याङ्ताम सुनिश्चित लातोबा नुररि प्रशिक्षण पिन्जि ।

युवा घेदुङला ङ्हाच्छाला बिलाम मुक्तानसे २०५८ दिङहेन्से संगठनरि सक्रिय तासिकेन डुप्बा अनुभवजुगु देप्जि । थेसे नेतृत्व हस्तान्तरण लिच्छा नोन संगठनरि निरन्तर सक्रिय तातोबारि बाङ पिन्बान ह्युलनाङ संगठन फेल्ना लाबा दुइसाङ याङ्मा ताङ्बा व्यक्त लाजि । छ्यामरि, छारिब्योनजुगुदा संगठन स्होबारि स्युगरि वाङ्बारि दाल्ना लाजि ।

गेताङरि लोप्खेन घेदुङ चोहो ईन्द्र तामाङ, बोन्बो घेदुङ चोहो पदम जिम्बा, लोप्खेन नेता सफलता थिङला छ्याम ल्होलो गुदुङ गेन्दुनला गोछापाजुगुसे उल्लेखनीय बोकिन्बा मुबा ।

गेताङला जोम्बाचोहो घम्ब तामाङ (मिलन)से चु प्रशिक्षणसे तामाङ छारिब्योनजुगुला क्षमता ल्हेना लाबा, नेतृत्व फेल्गेबा थेन नीतिगत सचेतनारि महत्वपूर्ण योगदान पिन्सेला विश्वास व्यक्त लाजि ।

गेताङरि डेन सेमताम युवा घेदुङला स्यानचोहो मनोज योन्जनसे थान्बा मुबा ।

(छिगकि दोनः डिछ्या– व्यवस्था, ब्रेल्बा– सम्बन्धी, दुगु– बैशाख, ग्याल्साङ– राष्ट्रिय, स्यानचोहो– उपाध्यक्ष, ङ्यान्दि– कारण, ग्यालठिपा– राजनीतिक, दोन्ता– उद्देश्य, स्यानग्रेनगाउराइ– उपमहासचिव, रिमठिमकि– सांस्कृतिक, तिलो– पक्ष, व्हना– तर्फ, नुर– विषय, डुप्बा– प्राप्त, फेल्ना– विस्तार, दुइसाङ– अवसर, स्युग– तीब्र, दाल्ना– आव्हान, लोप्खेन– विद्यार्थी, गेन्दुन– संस्था, गोछापा– प्रतिनिधि, जोम्बाचोहो– सभाध्यक्ष, फेल्गेबा– विकास)